ސިނަމާލެ ހައިވޭގައި ސައިކަލެއް ދެ ކާރެއްގައި ޖެހި އެކްސިޑެންޓްގައި މީހަކަށް އަނިޔާވެއްޖެއެވެ.
ފުލުހުން ބުނީ، މި އެކްސިޑެންޓް ފުލުހުންނަށް މިރޭ ރިޕޯޓްކޮށްފައިވާ އިރު، މި އެކްސިޑެންޓަގައި މީހަކަށް އަނިޔާވެފައިވާ ކަމަށެވެ. އަނިޔާވި މީހާ ހުޅުމާލެ ހޮސްޕިޓަލަށް ފަރުވާ ދިނުމަށް ގެންގޮސްފައިވާ ކަމަށް ވެސް ފުލުހުން ބުނެއެވެ.
މި އެކްސިޑެންޓްގައި އަނިޔާވި މީހާއާ ބެހޭ ތަފްސީލެއް އަދި އެމީހާއަށް ލިބުނު އަނިޔާތަކުގެ ތަފްސީލެއް ފުލުހުން ހާމައެއް ނުކުރެއެވެ. މި މައްސަލަ އަންނަނީ ތަހުގީގު ކުރަމުން ކަމަށް ވެސް ފުލުހުން ބުނެފައި ވެއެވެ.
މިރޭ ބްރިޖުގައި މި އެކްސިޑެންޓް ހިނގި ވަގުތު ހައިވޭ ތޮއް ޖެހި ބްލޮކްވެފައިވާ ކަމަށް ބައެއް ފަރާތްތަކުން ބުނެއެވެ. ސިނަމާލެ ބްރިޖާއި ހައިވޭ އަކީ މާލެ ސަރަހައްދުގައި އެންމެ ގިނަ އެކްސިޑެންޓްތައް ހިނގާ އެއް ސަރަހައްދެވެ.
މިއަހަރުތެރޭ ހިނގި އެކްސިޑެންޓްތައް އިތުރުވުމުގެ ސަބަބުން އުޅަނދު ފަހަރު ދުއްވާ ސްޕީޑަށް ބަލައި، މަގުމަތީގެ ގަވާއިދުތަކާ އެއްގޮތަށް އަމަލު ކުރުމަށް ފުލުހުން ވަނީ އިލްތިމާސްކޮށްފައެވެ. އަދި ބާރު ސްޕީޑުގައި ދުއްވާ އުޅަނދުތަކަށް ފިޔަވަޅު އަޅާފައި ވެސް ވެއެވެ.