ފުލުހުން މިހާރު ކުރިއަށްގެންދާ ތަހުގީގަށް މަގުފަހި ކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ 15 މުވައްޒަފަކު ވަކިކޮށްފި އެވެ.
އެޗްޑީސީގެ މެނޭޖިން ޑިރެކްޓަރުގެ މަގާމުގައި ހުންނެވި އިބްރާހިމް ފަޒުލް ރަޝީދު ވެސް ރޭ ވަނީ މަގާމުން އިސްތިއުފާ ދެއްވާފަ އެވެ. ފަޒުލް މަގާމުން އިސްތިއުފާ ދެއްވީ ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ކަމަށްވާ "ބިންވެރިޔާ ސްކީމް"ގެ ބޭރުން ގޯތިތަކެއް ދިން ކަމަށް ތުހުމަތުވާ ކޮރަޕްޝަންގެ މައްސަލަ ފުލުހުންނާއި އޭސީސީން ތަހުގީގު ކުރަމުންދަނިކޮށެވެ. މި މައްސަލައިގައި ފަޒުލްގެ ބޭބެއަށް ބިންވެރިޔާ ސްކީމުން ގޯއްޗެއްގެ ރެޖިސްޓްރީއެއް ހަދާފައިވާ މައްސަލައެއްވެސް ފެންމަތިވި އެވެ.
ބިންވެރިޔާ އަދި ގެދޮރުވެރިޔާ ސްކީމާއި ގުޅޭ ޖިނާއީ ތަހުގީގެއް ހިންގުމަށް ޕްރޮސިކިއުޓާ ޖެނެރަލް (ޕީޖީ) އައްބާސް ޝަރީފް ވެސް ވަނީ ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ)ގެ މައްޗަށް އަމުރު ކޮށްފަ އެވެ.
މިތަހުގީގާއި ގުޅިގެން މީގެކުރިން ވަނީ އެޗްޑީސީގެ އިސް މުވައްޒަފުންތަކެއް ސަސްޕެންޑް ކޮށްފަ އެވެ. މައުލޫމާތު ލިބިފައިވާ ގޮތުގައި އެ ސަސްޕެންޑް ކުރި މުވައްޒަފުން ހިމެނޭގޮތަށް މިއަދު ވަނީ އެޗްޑީސީގެ 15 މީހަކު މަގާމުން ވަކިކޮށްފަ އެވެ.
މިއަދު ވަނީ އެޗްޑީސީއަށް އާ މެނޭޖިން ޑިރެކްޓަރެއް އައްޔަނު ކޮށްފަ އެވެ. އެޗްޑީސީގެ މެނޭޖިން ޑިރެކްޓަރުގެ މަގާމަށް އައްޔަނު ކޮށްފައިވަނީ މުހައްމަދު މައުރޫފް ޖަމީލު އެވެ.