ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގައި އިމާރާތް ކުރި އާ ޕްރީ ސްކޫލްގެ މަސައްކަތް ނިންމައި އެ އިމާރާތް އެޑިޔުކޭޝަން މިނިސްޓްރީއާ މިއަދު ހަވާލުކުރިއިރު، އެތަން ހިންގަން ފަސް ފަރާތަކުން ބިޑް ހުށަހަޅާފައިވާ ކަމަށް އެ މިނިސްޓްރީން ބުނެފި އެވެ.ހުޅުމާލޭގައި މިއަދު ބޭއްވި ބައްދަލުވުމެއްގައި އެ އިމާރާތާ ހަވާލުވުމަށް ފަހު އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އިބްރާހިމް އިސްމާއިލް ވިދާޅުވީ އަންނަ ދިރާސީ އަހަރާ އެކު އާ ޕްރީ ސްކޫލްގައި ވެސް ކިޔަވައިދޭން
ފެށުމަށް ކުރަން ޖެހޭ މަސައްކަތްތައް މިހާރު ވެސް ކުރަމުން އަންނަ
ކަމަށެވެ. އަދި އެތަން ހިންގަން ބަޔަކާ ހަވާލުކުރަނީ ޕަބްލިކް ޕްރައިވެޓް ޕާޓްނަޝިޕްގެ ދަށުން ކަމަށް ވިދާޅުވި އެވެ.ހުޅުމާލޭގެ އާ ޕްރީ ސްކޫލް އިމާރާތުގައި އަށް ކްލާސްރޫމް ހުންނައިރު ކޮންމެ ކްލާހެއްގައި 25 ކުދިންގެ ޖާގަ ހިމެނެ އެވެ. އަދި ތިން ގަޑިއިރުގެ ކޮންމެ
ސެޝަނެއްގައި 200 ކުދިންނަށް އެ ސްކޫލްގައި ކިޔަވައިދެވޭނެ ކަމަށް އެޑިއުކޭޝަނުން ބުނެ އެވެ.މީގެ އިތުރުން ކޮމްޕިއުޓަރު ލެބަކާއި އޯޑިއޯ ވިޒުއަލް ކުލާހަކާއި ހޯލެއް ވެސް ޕްރީ ސްކޫލުގައި ވަނީ ހަދައިފަ އެވެ.އިމާރާތް އެޑިއުކޭޝަނާ ހަވާލުކުރުމުގެ ރަސްމިއްޔާތުގައި އެޗްޑީސީގެ މެނޭޖިން ޑިރެކްޓަރު ސުހައިލް އަހުމަދު ވިދާޅުވީ އާ ޕްރީ ސްކޫލްގެ އިތުރުން ވެސް ހުޅުމާލޭގައި އަމިއްލަ ފަރާތަކުން ހަދިޔާކުރާ ޕްރީ ސްކޫލެއްގެ މަސައްކަތް ވަރަށް ބާރަށް ކުރިއަށް ދާ ކަމަށެވެ. އަދި އެ އިމާރާތުގެ މަސައްކަތް އަންނަ އަހަރުގެ ފަހުކޮޅު ނިމި 2016ގައި ބޭނުންކުރަން ފެށޭ ވަރުވާނެ ކަމަށް އޭނާ ވިދާޅުވި އެވެ.