ށ. މިލަންދޫއިން ކަރަންޓު ކެނޑުމުގެ ސަބަބުން ރައްޔިތުން ދަތިތަކަކާއި ކުރިމަތިލާން ޖެހިއްޖެ އެވެ.
ވީނިއުސްއަށް މިއަދު މައުލޫމާތު ދެއްވަމުން މިލަންދޫ ކައުންސިލްގެ ނައިބް ރައީސް އަހްމަދު ޝިޔާމް ވިދާޅުވީ އިންޖީނަކަށް ދިމާވި މައްސަލައަކާއި ގުޅިގެން ރެއިން ފެށިގެން ރަށުން ކަރަންޓް ކެނޑިފައިވާ ކަމަށެވެ.
ޝިޔާމް ވިދާޅުވީ ރަށުގެ އެކި ސަރަހައްދުތަކަށް ގަޑި ބަހާލައިގެން ރޭ ކަރަންޓް ފޯރުކޮށްދިން ނަމަވެސް މިހާރު މުޅި ރަށުން ކަރަންޓު ކެނޑިފައިވާ ކަމަށެވެ.
އޭނާ ވިދާޅުވީ މީގެ ކުރިން ދުވަހަކުވެސް ކަރަންޓުގެ މިފަދަ މައްސަލަ އެއް އެ ރަށަށް ކުރިމަތިވެފައިނުވި ނަމަވެސް ފަހަކަށް އައިސް ކަރަންޓުގެ މައްސަލަތައް ދިމާވަމުން އަން ކަމުގައެވެ.
"އަޅުގަނޑުމެންގެ ރަށަށް މީގެ ކުރިން ދުވަހަކުވެސް ކަރަންޓުގެ މިފަދަ މައްސަލއެއް ދިމާނުވޭ. އެކަމަކު ފަހަކަށް އައިސް ރައްޔިތުންގެ ޝަކުވާތަށް ވަރަށް ގިނަ. ކަރަންޓު ލިބޭލެއް ދަށް ކަމުން އުތުރު އަވަށުގެ އެއްވެސް ގެއެއްގެ އަދި ފިހާރައެއްގެ ވެސް އޭސީ އެއް ނުޖެއްސޭ ކަމުގެ ޝަކުވާ. އަދި ފިހާރަތަކުގަ ހުންނަ ފްރިޖްތައްވެސް ނުޖެއްސޭ ކަމުގެ ޝަކުވާ ވަރަށް ގިނައިން ލިބޭ." ރައްޔިތުންގެ ޝަކުވާތަށް ހިއްސާ ކުރަމުން ޝިޔާމް ވިދާޅުވި އެވެ.
ޝިޔާމް އިތުރަށް ވިދާޅުވީ އެ ރަށުގެ އިންޖީނުގެ ސްޓެލްކޯގެ ބެލުމުގެ ދަށުން ހިންގި އިރު މިފަދަ އެއްވެސް މައްސަލަ އެއް ނުޖެހޭ ކަމަށާއި ނަމަވެސް ފެނަކައިން ހަވާލުވީއްސުރެން މިފަދަ މައްސަލަތަކާއި ރައްޔިތުންގެ ޝަކުވާތަކާ ކުރިމަތިލާންޖެހޭ ކަމަށެވެ. އަދި މީގެ ކުރިން އިންޖީނުގޭގެ އެންމެހާ ކަންކަން ބަލަހައްޓަމުން ދިޔަ ގޮތަށް މިހާރު ބަލަހައްޓަމުން ނުދާ ކަމަށްވެސް އޭނާ ވަނީ ފާހަގަ ކުރައްވާފަ އެވެ.
މިކަމާ ގުޅިގެން ފެނަކައިގެ ބަހެއް އަދި ވަނީ ލިބޭ ގޮތް ނުވެފަ އެވެ.
މިލަންދޫ އަކީ އާބާދީގައި 2600 މީހުން ދިރިއުޅެމުންދާ ރަށެވެ.