ފުރަމޭ ފެއިލްވެ ފުރަމޭ ބަދަލު ކުރަން ޖެހިފައިވާ އުމުރުން 35 އަހަރުގެ އުމަރު ނިޝާމްގެ އޮޕަރޭޝަން ކުރުމަށް ބޭނުންވާ ފަސްދޮޅަށް ހާސް އެމެރިކާ ޑޮލަރު (ނުވަލައްކަ ރުފިޔާ) ހޯދުމަށް އޭނާއަށް ހެޔޮއެދޭ ފަރާތްތަކުން ކުރަމުންދާ މަސައްކަތްތަކުގެ ތެރެއިން ބާއްވަން ހަމަޖެހިފައިވާ އިވެންޓުތަށް މިއަދު ހަވީރު ބާއްވާ ގޮތަށް ވަނީ ހަމަޖެހިފައެވެ.
އެގޮތުން ގޮތުން މާފަންނު މަދަރުސާގައި ބާއްވަން ހަމަޖެހިފައިވާ ޖަމްބަލް ސޭލް މިއަދު ހަވީރު 16:00 އިން ރޭގަނޑު 21:00 އަށް އޮންނާނެއެވެ. އާންމުންނާއި ހެޔޮއެދޭ ފަރާތްތަކު އެހީއާއެކު ބާއްވާ މި ފަންޑް ރައިޒިން އިވެންޓުގައި ގޭތެރޭގައި ހިފާގެންގުޅޭ ތަކެއްޗާއި، ފައިވާނާއި، ސްކޫލް ދަބަހާއި އަންނައުނު ފަދަ ތަކެތި ވިއްކަމުންދާނެއެވެ. މީގެ އިތުރުން ކާ ތަކެތި ވެސް މާފަނު މަދަރުސާގައި ބާއްވާ މި އިވެންޓުގައި ވިއްކާނެވެ.
މީގެ އިތުރުން އުމަރުގެ އޮޕަރޭޝަނަށް ބޭނުންވާ ފައިސާ އެއްކުރުމުގެ ގޮތުން ކަޕް ކޭކް ވިއްކުމުގެ އިވެންޓެއް ވެސް މިއަދު ހަވީރު ބޭއްވުމަށް ވަނީ ރާވާފައެވެ. އެގޮތުން މާލެ، ވިލިނގިލި އަދި ހުޅުމާލޭގެ އެކި ސަރަހައްދު ތަކުގައި ކަޕްކޭކް ވިއްކަން ވަނީ ހަމަޖެހިފައެވެ. މާލޭގައި ކަޕްކޭކް ވިއްކަން ހަމަޖެހިފައި ވަނީ ސިޓްރޯން ކައިރީގައި ހުންނަ އިސްކަންދަރު މަރިޒާނުގައި، ބްރިޖް ޕްލެޓްފޯމް ސަރަހައްދުގައި، މާފަނު މަދަރުސާގައި، ރަސްފަންނުގައި އަދި އާޓިފިޝަލް ބީޗުގައެވެ. ހުޅުމާލޭގައި ކަޕްކޭކް ވިއްކަން ހަމަޖެހިފައި ވަނީ ސެންޓްރަލް ޕާކުގައި، ފެރީ ޓާމިނަލުގައި، ކުޑަކުދިންގެ ޕާކުގައި އަދި ބާބެކިއު ސަރަހައްދުގައެވެ. އަދި ވިލިނގިލީގެ އެކި ސަރަހައްދު ތަކުގައި ކަޕްކޭކްގެ އިތުރުން ސޮސެޖާއި ޖޫސްޕެޓީ ވިއްކަމުން ހިނގާނެ ކަމަށްވެސް އިވެންޓު އިންތިޒާމް ކުރާ ފަރާތްތަކުން ވަނީ ބުނެފައެވެ.
މީގެ އިތުރުން އަދި ހުޅުމާލޭގައި ވަނީ އުމަރަށް އެހީ ވުމަށް ފަންޑް ފޮއްޓެއް ވެސް ބަހައްޓާފައެވެ.
މާލީ ތަނަވަސްކަން ނެތުމުގެ ސަބަބުން އުމަރުގެ އާއިލާއަށް ވަނީ ވީހާވެސް އަވަހަށް ދިވެހި ރައްޔިތުންގެ ދީލަތި އެހީ ބޭނުންވެފައެވެ. ކިތަންމެ ކުޑަ މިންވަރެއް ހަދިޔާ ކުރިނަމަވެސް އެކަން ވެގެންދާނީ އުމަރަށް ލިބިގެންދާ ބޮޑު އެހީ އަކަށެވެ. އެހެންކަމުން ކޮންމެ ރައްޔިތަކުވެސް މިއަދު ބާއްވާ އިވެންޓުތަކަށް ވަޑައިގެންނަމަވެސް ވީވަރަކުން އެހީތެރިކަން ފޯރުކޮށްދިނުމަކީ އަޅުގަނޑުމެންގެ ޓީމުގެވެސް ވަރަށް ބޮޑު އެދުމެކެވެ.
އުމަރަށް ދިމާވެފައިވާ ބަލި ހާލަތާއި ގުޅޭ އިތުރު މައުލޫމާތު ހޯދައި އެހީތެރިވާން ބޭނުންވާ ފަރާތްތަކުން އުމަރުގެ އަނބިމީހާ ފާތުމަތް މޫސާ 9186787 އަށް ނުވަތަ ފާތްމަތް މޫސާގެ ކޮއްކޮ އައިމިނަތު އަފާ 7754444 އަށް ގުޅުއްވައިގެން މައުލޫމާތު ހޯދެވުމަށް ދަންނަވަމެވެ. އެހީތެރިވެއްދެވަން ބޭނުންފުޅުވާ ފަރާތްތަކުން އުމަރު ނިޝާމްގެ ބީއެމްއެލް ރުފިޔާ އެކައުންޓް 7701167232102 އަދި ޑޮލަރު އެކައުންޓް 7730000007672 އަށް ފައިސާ ޖަމާކޮށްދިނުމަށް އާއިލާ އިން އެދެއެވެ.
މާތްﷲ އުމަރަށް އަވަސް ޝިފާއެއް މިންވަރު ކުރައްވައި، އުމަރުގެ އާއިލާއަށް ބާއްޖަވެރި މުސްތަޤުބަލެއް މިންވަރު ކުރައްވާށިއެވެ. އަދި އަޅަމެންނީ އެކަކު އަނެކަކަށް އެހީތެރިވެދޭ ބަޔަކުކަމުގައި ލައްވާށިއެވެ. އަދި އަޅަމެންގެ މި މުޖުތަމަޢަކީ ބަލިމަޑުކަމާއި ނުރައްކާތެރި ރޯގާތަކުން ރައްކާތެރި، ދުޅަހެޔޮ މުޖުތަމައެއްކަމުގައި ލައްވާށިއެވެ. އާމީން!