ޖީލަކަށް ސިނގިރޭޓު މަނަކުރުން ނުވަތަ ޖެނެރޭޝަނަލް ބޭން އާ ގުޅިގެން ރައީސް ޑރ. މުހައްމަދު މުއިއްޒު އާންމުންގެ ޚިޔާލު ހޯއްދަވަން ފައްޓަވައިފިއެވެ. ޖެނަރޭޝަން ބޭންގެ ވާހަކަ އެންމެ ފުރަތަމަ އެމަނިކުފާނު އިއުލާނުކުރެއްވީ 'ރައްޔިތުންނާ އެކު' ޕޮޑްކާސްޓްގެ ފުރަތަމަ އެޕިސޯޑުގައި މިދިޔަ މަހުގެ 27 ވަނަ ދުވަހުއެވެ. އިއްޔެ ބޭއްވި ދެވަނަ ޕޮޑްކާސްޓުގައި ޖެނަރޭޝަން ބޭން އާ ގުޅިގެން ރައީސް ވިދާޅުވީ އެންމެ ބޮޑު އިސްކަމެއް ދެއްވާނީ އުމުރުން 18 އަހަރު ފުރުމުން ނުވަތަ ޒުވާން އުމުރުގައި ދުންފަތުގެ އިސްތިއުމާލު ކުރުން ހުއްޓުވަން ކަމަށެވެ. އެގޮތުން އެމަނިކުފާނު ވަނީ ތިން ހުށަހެޅުމެއް ހުށަހަޅުއްވާފައެވެ. އެއީ: ޖެނުއަރީ 1، 2000ގައި އުފަންވި ކުދިންނަށް ދުންފަތުގެ އިސްތިއުމާލު ކުރުން މަނާކުރުން. ޖެނުއަރީ 1، 2004ގައި އުފަންވި ކުދިންނަށް ދުންފަތުގެ އިސްތިއުމާލު ކުރުން މަނާކުރުން. ޖެނުއަރީ 1، 2007ގައި އުފަންވި ކުދިންނަށް ދުންފަތުގެ އިސްތިއުމާލު ކުރުން މަނާކުރުން. އެއީ މިހާރު އުމުރުން 18 އަހަރާއި 25 އަހަރާއި ދެމެދުގެ ޒުވާނުންނެވެ. މި ހުށަހެޅުންތަކާ ގުޅިގެން ރައީސްގެ އެކްސް އެކައުންޓުގައި އާންމުންގެ ޚިޔާލު ހޯއްދެވުމަށްޓަކައި މިއަދު ވަނީ ޕޯލްއެއް ހުޅުއްވާފައެވެ. https://x.com/MMuizzu/status/1907738161641353601 އެގޮތުން، ޒުވާނުން ސިނގިރޭޓުގެ ނުރައްކަލުން ސަލާމަތް ކުރުމަށް ޖީލަކަށް ސިނގިރޭޓު މަނާކުރާނަމަ، އެކަން ފަށަން ފެންނަނީ ކޮން އުމުރުފުރާ އަކުންތޯ ރައީސް ވަނީ ސުވާލު އުފައްދަވާފައެވެ. އަދި އިއްޔެ ދެއްވި ހުށަހެޅުންތައް މި ޕޯލްގައި ހިމަނުއްވާ، ރައްޔިތުންނަށް ފެންނަ ގޮތަކަށް ވޯޓު ދިނުމުގެ އިޚުތިޔާރު ވަނީ ދެއްވާފައެވެ. އިއްޔެގެ ޕޮޑްކާސްޓުގައި ޖެނެރޭޝަނަލް ބޭން އާ ގުޅިގެން ރައީސް ވިދާޅުވީ، 18 އަހަރާއި 25 އަހަރާއި ދެމެދުގެ ޒުވާނުން ދުންފަތުގެ އިސްތިއުމާލު ކުރަން ފަށާތާ އަދި މާ ގިނަ ދުވަހެއް ނުވާނެ ކަމަށެވެ. އަދި އެކަމުން އެ ކުދިން ސަލާމަތްކުރުމަށް ފަސޭހަ ވާނެ ކަމަށް ވެސް އެމަނިކުފާނު ވިދާޅުވިއެވެ. https://sun.mv/204328 އެހެންކަމުން އެމަނިކުފާނު ހުށަހެޅުއްވި ތިން ގޮތް ވެސް ފަންނީ ލެވެލެއްގައި މަޝްވަރާ ކުރުމަށްފަހު، ކޮންމެވެސް އެއް ގޮތެއް ނިންމަވާނެ ކަމަށް ވިދާޅުވިއެވެ. އޭރުން ގާނޫނަކުން އެ އުމުރުގެ ކުދިންނަށް ދުންފަތުގެ އިސްތިއުމާލުކުރުން މަނާވާނެކަން އެމަނިކުފާނު ފާހަގަކުރެއްވިއެވެ. މީގެ އިތުރުން ސިނގިރޭޓު އެތެރެކޮށް، ސިނގިރޭޓުގެ ވިޔަފާރިކުރާ މީހުން، އެ ވިޔަފާރި ދޫކޮށްލަން ވެސް ރައީސް ވަނީ އިއްޔެ ގޮވައިލައްވައިފައެވެ. https://sun.mv/204322 ޖެނެރޭޝަން ބޭން ފިޔަވަޅުތަކަކީ ދުނިޔޭގެ އެކި ގައުމުތަކުގައި އަޅަމުންދާ، ދުންފަތުގެ އިސްތިއުމާލުކުރަން އަލަށް ވަންނަ ކުދިން އެ ކަމުން ދުރުކުރުމަށް އަޅާ ފިޔަވަޅުތަކެކެވެ. އެއީ، ވަކި އުމުރަކުން ދަށުގެ ކުދިންނަށް ސިނގިރޭޓު ބުއިން އެއްކޮށް މަނާކުރުން ކަހަލަ ފިޔަވަޅެކެވެ. ދުންފަތާ ދެކޮޅަށް ކުރާ މަސައްކަތުގެ ތެރެއިން މި ސަރުކާރުން ވަނީ ސިނގިރޭޓުން ނަގާ ޑިއުޓީ ދެގުނަކޮށް، ވޭޕް ބޭނުންކުރުން އެއްކޮށް މަނާކޮށްފައެވެ. އެއާއެކު 110 ރުފިޔާއަށް ލިބުނު ސިނގިރޭޓު ފޮއްޓެއްގެ އަގު ވަނީ 240 ރުފިޔާއަށް ބޮޑުވެފައެވެ. އެ ފިޔަވަޅުތައް އެޅީ އާންމު ސިއްހަތުގެ ނަޒަރަކުން ވިސްނާފައި ކަމަށް ސަރުކާރުން މީގެ ކުރިން ވަނީ ބުނެފައެވެ. ސިނގިރޭޓުގެ އަގު ބޮޑުކުރުމާ އެކު އިދިކޮޅު ފަރާތްތަކުން ވަނީ އެއީ އާމްދަނީ އިތުރުކުރަން އެޅި ފިޔަވަޅެއް ކަމަށް ބުނެ ފާޑުކިޔައިފައެވެ. ފާހަގަކޮށްލެވޭ ގޮތުގައި ސިނގިރޭޓުގެ އަގު ބޮޑުވި ނަމަވެސް ޑިއުޓީން ލިބޭ އާމްދަނީ ވަނީ ދަށްވެފައެވެ. ބާޒާރުގައި 'ވަގަށް' އެތެރެކޮށްގެން ވިއްކާ ސިނގިރޭޓު ވެސް ގިނަވެފައިވާއިރު، ގިނަ އަދަދެއްގެ ސިނގިރޭޓު ވަގަށް އެތެރެކުރި މައްސަލަތަކެއް މީގެ ކުރިން ފެންމަތިވެފައިވެއެވެ. މި ފަހުން ވެސް ގިނަ އަދަދެއްގެ ސިނގިރޭޓު ވަގަށް އެތެރެކުރަން އުޅުނު މައްސަލައެއް ފެންމަތިވިއެވެ.