ދެކުނު ކޮރެއާގެ އެންމެ މަތީ ކޯޓުން އެ ގައުމުގެ ރައީސް ޔޫން ސުކް ޔޯލް މަގާމުން ވަކިކޮށްފި އެވެ. އެއާ އެކު ޑިސެމްބަރު މަހު މާޝަލް ގާނޫނު އިއުލާނުކޮށްގެން ސިޔާސީ ހަލަބޮލިކަމުގެ ތެރެއަށް ގައުމު ވައްޓާލުމާ އެކު އެތައް މަހެއްވަންދެން އުފެދުނު ނުތަނަވަސްކަމާއި ގާނޫނީ ކޯޅުންތައް ނިމުމަކަށް އައީ އެވެ.
މިއަދު ކޯޓުން ނިންމި ނިންމުމަކީ މިދިޔަ ޑިސެމްބަރު މަހު ރައްޔިތުންގެ މަޖިލީހުން ޔޫން އަޒުލު ކުރުމަށް ނިންމި ނިންމުމަށް ރަސްމީކޮށް ސިއްކަ ޖެހުމެވެ.
އޭނާ މަގާމުން ދުރުކުރަން ނިންމި ނިންމުން ވަގުތުން އަމަލުކުރަން ޖެހެ އެވެ. އަދި އޭގެ މާނައަކީ މިހާރު އޭނާ ހުންނެވި ރިޔާސީ ގެކޮޅުން ވަގުތުން ނުކުމެވަޑައިގަންނަވަން ޖެހެމެވެ. އަދި އޭނާގެ ބަދަލުގައި ރައީސަކު ހޮވުމަށް އިންތިހާބެއް ބާއްވަން މަގުފަހިވާނެ އެވެ.
ދެކުނު ކޮރެއާއަށް ކުރިމަތިވެފައިވާ ނުތަނަވަސްކަމުގެ ސަބަބުން ދުނިޔޭގެ ބޮޑު އިގްތިސާދަކަށް ވަނީ ލޮޅުން އަރައިފަ އެވެ. އަދި އެމެރިކާގެ މުހިންމު ބައިވެރިއެއްގެ އެ އަމަލުގެ ސަބަބުން ދުނިޔޭގެ ކަންކަމުގައި އެމެރިކާ ވަނީ ނުތަނަވަސްވެފަ އެވެ. އަދި އެކަން ހިނގަނީ ހާއްސަކޮށް އެމެރިކާގެ ރައީސް ޑޮނަލްޑް ޓްރަމްޕްގެ "އެމެރިކާ ފަސްޓް" އެޖެންޑާގެ ސަބަބުން ހާރިޖީ ސިޔާސަތުގެ ޒަމާންވީ އުސޫލުތައް އުވާލައި ދުނިޔޭގެ ވިޔަފާރީގެ ނިޒާމު ފުނޑުފުނޑުކޮށްލާފައިވާ ދަނޑިވަޅެއްގަ އެވެ.
ޔޫން އަޒުލުކުރަން މަޖިލީހުން ނިންމި ނިންމުން ދަމަހައްޓަން ދުސްތޫރީ ކޯޓުގެ އަށް ފަނޑިޔާރުންގެ އިއްތިފާގުން  ނިންމި އެވެ. މާޝަލް ގާނޫނުގެ ސަބަބުން ހަލަބޮލިވި ރެއަށް އިޝާރާތްކޮށް، މަޖިލީހަށް ސިފައިން ފޮނުއްވައި، ގަރާރު ހުއްޓުވަން މަސައްކަތް ކުރެއްވި މެމްބަރުން "ދަމައިގަންނަން" ސިފައިންނަށް އަމުރު ކުރެއްވި ކަން ފަނޑިޔާރުން ފާހަގަ ކުރެއްވި އެވެ.
މާޝަލް ގާނޫނު އިއުލާނު ކުރުމުގެ ރަސްމީ މަރުހަލާއާ ރައީސް ވަނީ ހިލާފުވެވަޑައިގެންފަ އެވެ. ރައްޔިތުންގެ މަޖިލީހުގެ މެމްބަރުންގެ ހައްގުތަކަށް އަރައިގަތުމާއި ސިފައިންގެ އެންމެ އިސްވެރިޔާގެ ހައިސިއްޔަތުން އަދާކުރަންޖެހޭ ވާޖިބަށް އަރައިގަތުމަކީ "ރައްޔިތުންގެ އިތުބާރަށް ވަރަށް ބޮޑު ހިޔާނާތްތެރިވުމެއް" ކަމަށް ކޯޓު ހިންގެވުމާ ހަވާލުވެ ހުންނެވި އިސް ފަނޑިޔާރު ވިދާޅުވި އެވެ. ފަނޑިޔާތު އިތުރަށް ވިދާޅުވީ މާޝަލް ގާނޫނުގެ ގަރާރަކީ ގާނޫނު އަސާސީއާ ހިލާފު ގަރާރެއް ކަމަށާއި އޭރު ގައުމީ ބޮޑު ކާރިސާއެއް ގައުމުގައި ނެތް ކަމަށާއި ޔޫން އެކަން އިއުލާނު ކުރެއްވި ސަބަބުތައް ދިފާއު ނުކުރެވޭނެ ކަމަށެވެ.