ޓެކްނޮލޮޖީގެ މައި ކުންފުނި އެޕަލްއިން، އެ ކުންފުނީގެ އަހަރީ ވޯލްޑްވައިޑް ޑިވެލޮޕާސް ކޮންފަރެންސް 2025 ގައި އައިޕެޑްގެ ބޭނުންކުރެވޭނެ ގޮތްތައް މުޅިން އާ ހަރުފަތަކަށް ގެންގޮސްފިއެވެ. އާ "އައިޕެޑްއޯއެސް 19"އާ އެކު އައިޕެޑަކީ ހަމައެކަނި ކޮންޓެންޓް ބަލާ ނުވަތަ އާދައިގެ ކުދިކުދި ކަންކަން ކުރާ ޑިވައިސްއެއްގެ ބަދަލުގައި، ގިނަ ބަޔަކަށް އެ މީހުންގެ މައި ކޮމްޕިއުޓަރުގެ ގޮތުގައި ބޭނުންކުރެވޭނެ ވަރުގެ ބާރުގަދަ އަދި ފުރިހަމަ ޑިވައިސްއަކަށް ބަދަލުކޮށްލައިފިއެވެ. "ޓެކްކްރަންޗް"ގައި ޝާއިއުކޮށްފައިވާ ރިޕޯޓެއްގައި ބުނެފައިވާ ގޮތުން، މި އާ އަޕްޑޭޓާ އެކު އައިޕެޑާއި މެކްބުކްއާ ދެމެދު އޮތް ފަރަގު ވަރަށް ބޮޑަށް ކުޑަވެއްޖެއެވެ. މި ބޮޑު ބަދަލުގެ އެންމެ މުހިންމު އެއް ސިފައަކީ "ޑެސްކްޓޮޕް މޯޑް"ގެ ނަމުގައި ތައާރަފުކުރި މަލްޓިޓާސްކިން ފީޗާއެވެ. މީގެ ސަބަބުން، ޔޫޒަރުންނަށް މެކްއޯއެސްގައި ލިބޭ ފަދަ ތަޖުރިބާއެއް ލިބި، އެޕްލިކޭޝަން ވިންޑޯތަކުގެ ސައިޒު ބަދަލުކޮށް، އެއް ވިންޑޯ އަނެއް ވިންޑޯމަތީގައި ބެހެއްޓޭނެއެވެ. މީގެ އިތުރުން، އެކްސްޓާނަލް މޮނިޓަރަކަށް ގުޅާލުމުން ސްކްރީން އެކްސްޓެންޑްވެ، މޮނިޓަރަށް ޚާއްސަ ފުރިހަމަ ޑެސްކްޓޮޕް ތަޖުރިބާއެއް ލިބެއެވެ. މިއީ މީގެ ކުރިން އައިޕެޑް ބޭނުންކުރާ މީހުން އެންމެ ބޮޑަށް އެދެމުން އައި އެއް ފީޗާއެވެ. ސޮފްޓްވެއާގެ ދާއިރާއިން ބަލާއިރު، އެޕަލްއިން ވަނީ "ފައިނަލް ކަޓް ޕްރޯ" އަދި "ލޮޖިކް ޕްރޯ" ފަދަ ޕްރޮފެޝަނަލް އެޕްލިކޭޝަންތަކުގެ ފުރިހަމަ ޑެސްކްޓޮޕް-ކްލާސް ވާޝަންތައް އައިޕެޑަށް ގެނެސްފައެވެ. މީގެ ސަބަބުން ވީޑިއޯ އެޑިޓަރުންނާއި، މިއުޒިކް ޕްރޮޑިއުސަރުންނާއި، އަދިވެސް އެހެނިހެން ދާއިރާތަކުގެ ޕްރޮފެޝަނަލުންނަށް އެ މީހުންގެ މަސައްކަތްތައް އައިޕެޑް މަތީގައި އެއްވެސް ދަތިކަމެއްނެތި ފުރިހަމަ ބާރުމިނުގައި ކުރިއަށް ގެންދެވޭނެއެވެ. "ފައިލްސް" އެޕް ވެސް މުޅިން އާކޮށް، މެކްގެ "ފައިންޑާ"އާ އެއްފަދަ އެޕްތައް ހިމަނައި، ފައިލްތައް މެނޭޖްކުރުން ކުރިއަށްވުރެ މާ ފަސޭހަކޮށްފައިވެއެވެ. ޓެކްނޮލޮޖީ ދާއިރާގެ އެނަލިސްޓެއް ކަމަށްވާ ބެން ތޮމްސަން ވިދާޅުވި ގޮތުގައި އެޕަލްއިން މި ބަދަލު ގެނައީ މެކްބުކްގެ ބޭނުން ކަނޑުވާލުމަކަށް ނޫނެވެ. އެކަމަކު، ޔޫޒަރުންނަށް އިތުރު އިޚުތިޔާރެއް ދިނުމަށެވެ. ގިނަ ޕްރޮފެޝަނަލުންނަށް މިހާރު އައިޕެޑަކީ އެ މީހުންގެ މަސައްކަތްތަކަށް އެންމެ އެކަށީގެންވާ ޑިވައިސްއަށް ވާނެއެވެ. އެޕަލްގެ ސޮފްޓްވެއާ އިންޖިނިއަރިންގެ އިސްވެރިޔާ، ކްރެއިގް ފެޑެރީގީ ވެސް ވަނީ މިކަން ފާހަގަކުރައްވާފައެވެ. އޭނާ ވިދާޅުވީ، އެޕަލްގެ އެންމެ ބޮޑު މަޤުޞަދަކީ އައިޕެޑްގެ ފަސޭހަކަމާ އެކު އެންމެ ފުރިހަމަ ގޮތުގައި ޔޫޒަރުންނާ ހަމައަށް ފޯރުކޮށްދިނުމެވެ. ޚުލާސާކޮށް ބުނާނަމަ، އައިޕެޑްގެ ބާރުގަދަ އެމް-ސީރީޒް ޗިޕްތަކުގެ ހަގީގީ ބޭނުން މިހާރު ހިފެން ފަށައިފިއެވެ. އައިޕެޑަކީ މިހާރު ލެޕްޓޮޕްތަކާ އަޅައިކިޔޭ ފެންވަރުގެ ޑިވައިސްއަކަށް ވެފައިވާއިރު، މެކްގެ ބޭނުންކުރާ ޔޫޒަރުންނަށް އެއީ އަދިވެސް އެންމެ އެކަށީގެންވާ ޑިވައިސް ކަމަށް ވެދާނެއެވެ. އެހެންނަމަވެސް، އައިޕެޑްގެ މި އާ ދައުރު ފެށުމާ އެކު، ކޮމްޕިއުޓަރާ މެދު ދެކޭ ގޮތް ބަދަލުވެ، އާންމު ބޭނުންތަކަށާއި ޕްރޮފެޝަނަލް މަސައްކަތްތަކަށް އައިޕެޑް އިތުބާރުކުރާ މީހުންގެ އަދަދު އިތުރުވާނެއެވެ.