އުމްރާ ގުރޫޕްތަކަށް މި ފަހަކަށް އައިސް މައްސަލަތަކާ ކުރިމަތިލާން ޖެހެނީ ކުރިން ލިބެމުން އައި ބައެއް ލުއިތައް މިހާރު ލިބެން ނުހުންނާތީ ކަމަށް ކުރީގެ އިސްލާމިކް މިނިސްޓަރު އަޙްމަދު ޒިޔާދު ބާޤިރު ވިދާޅުވެއްޖެއެވެ. އުމްރާއަށް މީހުން ގެންދާ ގުރޫޕްތަކުގެ މައްސަލަތައް އިތުރުވެފައި ވަނިކޮށް ކުރީގެ އިސްލާމިކް މިނިސްޓަރު ޒިޔާދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ މިވީ ދެއަހަރު ތެރޭގައި ހަތަރު އުމްރާ ގުރޫޕެއްގެ ބޮޑެތި މައްސަލަތައް ފެންމަތިވެފައިވާކަމަށެވެ. https://sun.mv/218728 ޒިޔާދު އެހެން ވިދާޅުވެފައިވާއިރު، އުމްރާ ގުރޫޕަކުން، މިދިޔަ އަންގާރަ ދުވަހުން ފެށިގެން މިމަހުގެ 26ވަނަ ދުވަހުގެ ނިޔަލަށް ކުރުމަށް ހަމަޖައްސާފައިވާ ޢުމްރާ ދަތުރަށް ޢުމްރާވެރިން ފުރުމަށް އެންމެ ފަހުގެ ތައްޔާރީތައް ވަމުން ދަނިކޮށް، ދަތުރު ކެންސަލް ކޮށްފައިވެއެވެ. އެ މައްސަލައިގައި، އިސްލާމިކް މިނިސްޓްރީން ވަނީ އެ ކުންފުނީގެ ހުއްދަ ވަގުތީ ގޮތުން ހިފަހައްޓައިފައެވެ. އެހެން ކަންކަން ވާން މެދުވެރިވާ ސަބަބެއް ކަމުގައި ޒިޔާދު ވިދާޅުވެފައި ވަނީ ގްރޫޕްތަކަށް ކުރިން ހުއްދަ ދިނުމުގައި އެމީހުންގެ މާލީ ތަނަވަސްކަމަށާއި، އެކަން ޔަގީންކުރުމަށްޓަކައި ބޭންކު ގެރެންޓީއެއް ބަހައްޓަން ޖެހޭ އޮތުން މިހާރު އުވާލާފައި އޮތުން ކަމަށެވެ. ކުރިން ގުރޫޕްތަކުން ސަޢޫދީއަށް ފޮނުވަންޖެހޭ ޓީޓީ ހެދުމުގައި ދިވެހި ބޭންކުތަކުން ބޭންކު ރޭޓަށް ގުރޫޕްތަކަށް ފައިސާ ދޫކުރަމުން ދިޔަ ނަމަވެސް މިހާރު އެކަންވެސް ވަނީ ހުއްޓާލާފައި. މީގެ ނަތީޖާއަކަށް ވަނީ ގުރޫޕްތަކުން ބޮޑު އަގުގައި ކަޅު ބާޒާރުން ޑޮލަރު ގަންނަން ޖެހުން. މިކަމުން ގުރޫޕްތަކަށް މާލީ ގެއްލުންތަކެއް ލިބެމުންދޭ. މިއީ ދުވަހަކުވެސް މީގެކުރިން ދިވެހި ޢުމްރާ ގުރޫޕް ތަކަށް ދިމާވި މައްސަލައެއް ނޫން، މީގެ އިތުރުން، މި ރަމަޟާން މަހު ޢުމްރާއަށް ދިޔަ ހަތަރު ގުރޫޕަކުން، ރާއްޖެއިން ގެންދިޔަ ހުރީހާ ކާބޯތަކެތި ސަޢޫދީއަށް އެތެރެ ނުކުރެވި އުކާލަންޖެހިފައިވާ ކަމަށް އޭނާ ވިދާޅުވިއެވެ. އަދި މީގެ ކުރިންވެސް މިކަން އެހެން ގުރޫޕްތަކަށް ދިމާވެފައިވާކަން އޭނާ ވަނީ ފާހަގަ ކުރައްވާފައެވެ. ހަމައެއާއެކު މިދިޔަ ޑިސެމްބަރުގައި ދިވެހި ޢުމްރާވެރިޔަކު ޖިއްދާ އެއާޕޯޓުގައި ތާށިވެ އެތަށް ގަޑިއިރެއް ފަހުން އެ ގުރޫޕް މީހުންގެ ފަރާތުން ވާހަކަ ދައްކައިގެން އޭނަ ނެރެވުނު ކަމަށް ޒިޔާދު ވިދާޅުވިއެވެ. ސަބަބަކީ ޕާސްޕޯޓުގައިވާ ފޮޓޯއާއި، މީހާގެ މިހާރުގެ އަސްލު ސޫރަ ދިމާނުވުން ކަމަށް އޭނާ ވިދާޅުވިއެވެ. ޒިޔާދު ވިދާޅުވީ މިފަދަ ކަންކަމަކީ ކުރިންވެސް ދިމާވާ ކަންކަން ކަމަށާއި، އެހެންނަވެސް އޭރުގެ ދިވެހި ސަރުކާރުގެ އިންތިޒާމުތައް ރަގަޅުކަމަށެވެ. ދިވެހި އެންބަސީ ސަޢޫދީގަ ހުޅުވި ދުވަހުން ފެށިގެން މިފަދަ ކަންކަމަށް ވަރަށް އެހީތެރިކަން ލިބެމުންދިޔަ ކަމަށާއި ޢުމާރާވެރިންގެ އިސްތިގުބާލުގައި ދިވެހި މިޝަންގެ ބޭފުޅުން އަބަދުވެސް އެއާޕޯޓްގައި ތިއްބަވާ ކަމަށް އޭނާ ވިދާޅުވިއެވެ. އަދި އެފަދަ ކަންކަމަށްވުރެ ވުރެ މާ އުނދަގޫ މައްސަލަތައް ހައްލުކޮށްފައިވާކަމަށް ކަމަށް އޭނާ ވިދާޅުވިއެވެ. ޒިޔާދު އިތުރަށް ވިދާޅުވީ ސަޢޫދީ ސަރުކާރުގެ ފަރާތުން ދިވެހި އުމްރާވެރިންނަށް ޚާއްސަ އެހީތެެރިކަމެއް ދެއެވެ. އަދި މިހާރާ ޚިލާފަށް ކުރިން ދިވެހި އެންބަސީގައި ތިއްބަވަނީ ދެތިން މުވައްޒަފުން ނަމަވެސް އިންތިޒާމުތައް ހަމަޖައްސާފައިވާ ގޮތް ވަރަށް ރަނގަޅު ކަމަށް އޭނާ ވިދާޅުވިއެވެ. ނަމަވެސް މިހާރު ސައުދީ އެންބަސީގައި ވެސް އެތައް މުވައްޒަފުންނެއް ތިބޭ ކަމަށް އޭނާ ވިދާޅުވިއެވެ.