އުރީދޫއިން ކުރިއަށްގެންދާ ނޭޝަން ކިކްއޯފް ޓޯނަމަންޓްގެ 2026 ވަނަ އަހަރުގެ މުބާރާތުގެ ރަޖިސްޓްރޭޝަނަށް ހުޅުވާލައިފިއެވެ.
އުރީދޫއިން ބުނީ އުރީދޫ ނޭޝަންގެ އަހަރުގެ ފުރަތަމަ މުބާރާތް ރަސްމީކޮށް ފަށުމަށް ހަމަޖެހިފައިވަނީ އޯޕަން ސީރީޒް ސީޒަން 1 އާއެކު ކަމަށެވެ. އެގޮތުން އޯޕަން ސީރީޒް ސީޒަން 1ގެ ކްލޭޝް ރޯޔާލް އަދި އީއޭއެފްސީ އަލްޓިމޭޓް ޓިމް ގައި ބައިވެރިވުމަށް ހުޅުވާލާފައިވާކަމަށް އެކުންފުނިން ބުނެއެވެ.
އުރީދޫއިން ބުނީ އޯޕަން ސީރީޒް މުބާރާތްތަކަކީ
ރާއްޖޭގެ އެކި ކަންކޮޅުތަކުގައި ތިބި ގޭމް ކުޅޭ ފަރާތްތަކަށް އެމީހުންގެ ހުނަރު
ދައްކާލުމާއި، ގޭމިން ކޮމިއުނިޓީއާ ގުޅުވައި، ވާދަވެރި ޕްލެޓްފޯމްތައް
ފަހިކޮށްދިނުމުގެ ގޮތުން ބާއްވާ މުބާރާތެއ ކަމަށެވެ. އެކުންފުނިން ނޭޝަންގެ މި މުބާރާތްތައް
އޮންލައިންކޮށް ބޭއްވުމުގެ މަގުޞަދަކީ ހުރިހާ އަތޮޅެއްގެ ކުޅުންތެރިންނަށް
ހަމަހަމަ އުސޫލުން ބައިވެރިވުމުގެ ފުރުސަތު ފަހިކޮށްދިނުމެވެ.
މިދިޔަ ފަހަރު އުރީދޫއިން ބޭއްވި މުބާރާތުގެ ވަނަތައް އިއުލާނުކުރުމުގެ ތެރެއިން.. ފޮޓޯ: އުރީދޫ
އީ-ސްޕޯޓްސް މެދުވެރިކޮށް
ޑިޖިޓަލް ހުނަރުވެރިން ކުރިއަރުވައި ޒުވާނުންނަށް ފުރުސަތުތައް ފަހިކޮށްދިނުމުގައި
އުރީދޫ ނޭޝަން އިން ދަނީ މުހިންމު ދައުރެއް އަދާކުރަމުންނެވެ. އޯޕަން ސީރީޒަކީ
އުރީދޫގެ ޑިޖިޓަލް ކޮމިއުނިޓީއެއް ބިނާކޮށް، ޓެކްނޮލޮޖީ، ކަނެކްޓިވިޓީ އަދި އީޖާދީ
އުފެއްދުންތަކުގެ ތެރެއިން އަންނަން އޮތް ޖީލު ބާރުވެރިކުރުވުމަށް އުރީދޫއިން
ގެންގުޅޭ ތަސައްވުރެއްކަމަށް އެކުންފުނިން ބުނެއެވެ.
އުރީދޫއިން ބުނީ ނޭޝަންގެ 2026 ވަނަ
އަހަރުގެ އީ-ސްޕޯޓްސް މޫވްމަންޓްގައި ބައިވެރިވުމަށް ރާއްޖޭގެ ހުރިހާ ގޭމަރުންނަށް
ދައުވަތު އަރުވާކަމަށާއި، މި މުބާރާތްތަކަކީ ދިވެހި ގޭމް ކުޅޭ ފަރާތްތަކަށް ވަރަށް ފޯރިގަދަ ފެށުމަކަށް ވެގެންދާނޭކަމަށެވެ.