ގިނަ މީހުންނަކީ ތަނަވަސްކަން ލިބޭވަރަކަށް ދަހިވެތިކަން އިތުރުވާ ބައެކެވެ. ދީލަތިކަން އިތުރުކުރަނީ މަދުމީހެކެވެ. އެހެންވެ މީހަކަށް ކިތަންމެ ބޮޑު ނިކަމެތިކަމެއް ލިބުނަސް އޭނާގެ ދަރަނި މާފުކުރަން ގިނަ ބައަކު ފަސްޖެހެއެވެ. މިއީ ވަރަށް ދެރަކަމެކެވެ. ހިތާމަހުރި ކަމެކެވެ.  
ދަރަނީގެ މައްސަލައިގެ ދެ ޙާލަތެއް ކުރިމަތިވެއެވެ. އެއް ޙާލަތަކީ ދަރަނިވެރިވެރިޔާ ބަނގުރޫޓުވެ ދަރަނި އަދާކުރެވެން ނެތުމެވެ. އެ ޙާލަތުގައި ތިބާގެ ކިބައިގައި ތަނަވަސްކަން ހުރިނަމަ އޭނާއަށް މާފުކުރާށެވެ! އެއިރުން ތިބާއަށް ﷲ ތަޢާލާ ދެއްވަވާނެ ނިޢްމަތްތައް މާގިނަވާނެއެވެ.  
ދުނިޔޭގައި މީހަކަށް ކުރިމަތިވެފައިވާ ތަކްލީފަކުން ސަލާމަތްކޮށްދީފިނަމަ، އެކަމުގައި އެހީތެރިވެއްޖެނަމަ އެމީހަކަށް އެހީތެރިވެވޮޑިގަތުންމަތީގައި ﷲ ތަޢާލާ ދެމިވޮޑިގެންވާނެތެވެ. އެމީހަކަށް ﷲ ތަޢާލާގެ އެހީތެރިވެވޮޑިގަތުން ލިބިއްޖެނަމަ އެމީހަކަށް ދަތިވާނީ ކޮންކަމެއް ހެއްޔެވެ؟  
ތަނަވަސް މީހުންގެ ތެރެއިން ދަރަނި މާފުކުރާ މީހުންނަށް ބަލާށެވެ. ދަރަނި މާފުކުރީތީ އޭނާއަށް އެއްވެސް އުނިކަމެއް ނުލިބޭނެއެވެ. މުދަލަކުން މަދެއްނުވާނެއެވެ. ދާނީ ގިނަވަމުންނެވެ. އިން ޝާ ﷲ. އެއީ އޭނާއަށް ﷲ ތަޢާލާ ނިޢުމަތްތައް އިތުރުކުރައްވަވާތީއެވެ.  
ދެން އޮތީ ދެވަނަ ޙާލަތެވެ. ތަނަވަސްކަން ނެތުމުން ދަރަނި މާފުކުރެވެން ނެތީ އެވެ. އެހާލަތުގައި ދަރަނި މާފުނުކުރުމަކުން މައްސަލައެއް ނެތެވެ. ނަމަވެސް އެވާހަކަދައްކައި އޭނާ ފަޟީޙަތްކުރަމުން ނުހިނގާށެވެ. އެއީ ﷲ ތަޢާލާ ރުހިވޮޑިގަންނަވާ ކަމެއް ނޫނެވެ. މީހެއްގެ ޢައިބު ފޮރުވައިދީފި މީހެއްގެ ޢައިބު ﷲ ތަޢާލާ ޤިޔާމަތް ދުވަހު ފޮރުއްވަވައިދެއްވަވާނެތެވެ. ވީމާ ލިބެން އޮތް އެ ބޮޑު ނިޢުމަތް ދޫކޮށްނުލާށެވެ.  
 
- މުފްތީ މެންކުގެ ދަރުސަކުން