ބޮލީވުޑްގެ އެކްޓަރު ރާޖްކުމާރު ރާއޯގެ ކުރިއަށް އޮތް ކޯޓުރޫމް ޑްރާމާ "ޕްރަހާރު"ގެ ޓީޒާ ދައްކާލައިފިއެވެ. މި އަހަރުގެ އޮގަސްޓް މަހުގެ ހަތް ވަނަ ދުވަހު ސިނަމާތަކަށް ގެންނަން ނިންމާފައިވާ މި ފިލްމަކީ، 26/11ގެ މުމްބާއީ ޓެރަރިސްޓް ހަމަލާގެ ކުށްވެރިޔާ އަޖްމަލް ކަސާބަށް މަރުގެ އަދަބު ދިނުމަށް ވަކާލާތުކުރި އިންޑިއާގެ މަޝްހޫރު ސްޕެޝަލް ޕަބްލިކް ޕްރޮސެކިއުޓަ އުއްޖަލް ނިކަމްގެ ހަޔާތުގެ މައްޗަށް ބިނާކޮށް އުފައްދާފައިވާ ފިލްމެކެވެ. އުއްޖަލް ނިކަމްގެ ގާނޫނީ ހަޔާތުގައި ކުރިމަތިލީ އެންމެ މުހިންމު ޝަރީއަތުގެ މައްޗަށް ބިނާކޮށް އުފައްދާ މި ފިލްމުގެ ޑައިރެކްޓަރަކީ އަވިނާޝް އަރުންއެވެ. ރާޖްކުމާރު ރާއޯގެ އިތުރުން ވަމީގާ ގައްބީ، ޖައިދީޕް އަހްލާވަތު، ސިކަންދަރު ކޭރު އަދި ތަރުން ޝަރުމާ މުހިންމު ރޯލްތަކުން ފެންނާނެ "ޕްރަހާރު"ގެ ޓީޒާ ހިއްސާކުރަމުން، މެޑޮކް ފިލްމްސް އިން ބުނެފައިވަނީ، އިންސާފަށް އަޑެއް ބޭނުންވި ހިނދު، އެ އަޑަކަށްވީ އުޖްވަލް ކަމަށެވެ. އިންޑިއާގެ ތާރީހުގައި ފާހަގަކޮށްލެވޭ ބޮޑެތި ޖިނާއީ ޝަރީއަތްތަކުގެ މައްޗަށް ބިނާކޮށް އުފައްދާފައިވާ މި ފިލްމުގައި 1993ގެ ބޮމްބޭ ބްލާސްޓްސް އަދި 2008ގެ މުމްބާއީ ރޭލް ހަމަލާތަކާ ގުޅޭ ގާނޫނީ ހަނގުރާމަތަކުގައި ޕްރޮސިކިއުޓަރު އުޖްވަލް ނިކަމް އަދާކުރި މުހިންމު ދައުރު ވެސް ފެންނާނެއެވެ. ފިލްމު "ޕްރަހާރު"ގެ ޕޯސްޓަރެއް--ފޮޓޯ/ޓެލެގްރާފްއިންޑިއާ ދިނޭޝް ވިޖަންގެ މެޑޮކް ފިލްމްސްއިން އުފައްދާ މި ފިލްމަކީ، ރާޖްކުމާރު ރާއޯގެ ފިލްމީ ކެރިއަރުގައި މިހާތަނަށް ފެނިފައިނުވާ ފަދަ ކެރެކްޓާއަކުން އެކްޓަރު ބެލުންތެރިންނާ ކުރިމަތިލާނެ ފިލްމެކެވެ. ރާޖްގެ ކުރިއަށް ހުރި ފިލްމީ ޕްރޮޖެކްޓްތަކުގެތެރޭ، މަޝްހޫރު ކްރިކެޓް ކުޅުންތެރިޔާ ސައުރަވް ގަންގޫލީގެ ހަޔާތުގެ މައްޗަށް ބިނާކޮށް އުފައްދާ ފިލްމުވެސް ހިމެނެއެވެ. ވިކްރަމަދިތުޔާ މޮޓްވާނީ ޑައިރެކްޓްކުރާ މި ފިލްމުގައި ގަންގޫލީގެ ރޯލު ކުޅޭނީ ރާޖްކުމާރު ރާއޯއެވެ.