މަޖިލީހުގެ 12 މެންބަރުންގެ ގޮނޑިއާއިމެދު ސުވާލު އުފައްދާ އެ މެންބަރުން މަޖިލީހަށް ވަނުމަށް ހުރަސްއަޅާފައިވާތާ އަހަރު ދުވަސްވެފައިވާއިރު، އެ މެންބަރުންނަށް ގާނޫނީ ވާޖިބު އަދާކުރުމަށް ފުރުސަތު ދެއްވުމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހިމް ގޮވާލައްވައިފިއެވެ.
އެކަމަށް ގޮވާލާ ގާސިމް އިބްރާހިމް ކުރައްވާފައިވާ ޓްވީޓެއްގައި ވިދާޅުވީ މީގެ އަހަރު ދުވަސްކުރިން، ބާރަ ދާއިރާއެއްގެ މެންބަރުންނަށް މަޖިލީހުގައި ތަމްސީލްވުމުގެ ފުރުސަތު ގެއްލުވާލާފައިވާކަމަށެވެ. އެއީ ދިވެހި ރައްޔިތުންގެ ތެރެއިން 60،000 ރައްޔިތުންގެ އަޑު މަޖިލީހުގައި އިއްވުމަށް އެޅުނު ހުރަހެއްކަމަށާ އެ ހައްގުން ރައްޔިތުން އަހަރު ދުވަސްވަންދެން މަހުރޫމްކޮށްފައިވާކަމަށެވެ.
ގާސިމް އިބްރާހިމް ވިދާޅުވީ މި ފަރާތްތަކުގެ ހައްގުތައް ލިބިދީ، ޑިމޮކްރަސީގައި މިއިން ކޮންމެ ރައްޔިތެއްގެ ހިއްސާ އަދާކުރުމަށް ފުރުސަތު ދިނުމަށް ދައުލަތުގެ ހުރިހާ މުއައްސަސާތަކަށް ގޮވާލައްވާކަމަށެވެ.