ސިވިލް ސާވިސް ކޮމިޝަން (ސީއެސްސީ) ގެ އަންހެން މުވައްޒަފަކަށް އެ ކޮމިޝަންގެ ރައީސް މުހަންމަދު ފަހުމީ ހަސަން ޖިންސީ ގޯނާކުރިކަން ނުވަތަ އެފަދަ ކަމެއް ނުކުރާކަން ސާބިތުވާ ވަރަށް ހެކި ލިބިފައި ނެތް ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ނިންމައިފި އެވެ.
އެ މައްސަލަ ބަލައި ދިނުމަށް އެދި، ފަހުމީ ޖިންސީ ގޯނާކުރި ކަމަށް ބުނާ މުވައްޒަފު އެޗްއާރުސީއެމް އަށް ހުށަހެޅި މައްސަލާގައި މިއަދު ދީފައިވާ ޖަވާބުގައި ބުނެފައި ވަނީ ފަހުމީ އެކަމަށް އިންކާރުކޮށްފައިވާ ކަމަށާއި ޖިންސީ ގޯނާކުރިއިރު އެތަނުގައި ތިބި ކަމަށް ބުނާ މުވައްޒަފުންނަށް ވެސް އެފަދަ މަންޒަރެއް ފެނިފައި ނެތް ކަމަށް އެ މީހުން ބުނާ ކަމަށެވެ. އެހެންވެ އެކަށީގެންވާ ހެކި ލިބިފައި ނުވާތީ، އެ މައްސަލަ ނިމިފައިވާ ކަމަށް ފަހުމީ ޖިންސީ ގޯނާކުރި ކަމަށް ބުނާ އަންހެން މުވައްޒަފަށް އެޗްއާރުސީއެމް އިން ދިން ޖަވާބުގައިވެ އެވެ.
"އާމިނަތު ޝަހުމާ ހަލީމް ހުށަހެޅުއްވި މައްސަލާގައި ކޮމިޝަނަށް ބަޔާންދިން ފަރާތްތަކުގެ މައުލޫމާތުތަކަށް ރިއާޔަތްކުރާއިރު، ސިވިލް ސާވިސް ކޮމިޝަންގެ ރައީސް މުހަންމަދު ފަހުމީ ހަސަން، ޝަހުމާ ހަލީމް އަށް ޖިންސީ ގޯނާކުރި ކަމަށް އާމިނަތު ޝަހުމާ ހަލީމް ބުނެފައިވީ ނަމަވެސް، އާމިނަތު ޝަހުމާ ހަލީމް އަށް ޖިންސީ ގޯނާކުރި ކަމަށް މުހަންމަދު ފަހުމީ ހަސަން އިންކާރުކޮށްފައި ވުމާއި އެކަން ހިނގި ކަމަށް ބުނާ ތަނުގައި އެވަގުތު ތިބި މުވައްޒަފުންނަށް އެފަދަ އެއްވެސް މަންޒަރެއް ފެނިފައި ނުވާ ކަމަށް އެ މުވައްޒަފުން ބުނެފައިވުމާއި މުހަންމަދު ފަހުމީ ހަސަން މައާފަށް އެދި، އާމިނަތު ޝަހުމާ ހަލީމްގެ ފޯނަށް ފޮނުވި މެސެޖުގައި މައާފަށް އެދުނު ވަކި ކަމެއް އެނގެން ނެތުމުން، އާމިނަތު ޝަހުމާ ހަލީމް އަށް، މުހަންމަދު ފަހުމީ ހަސަން ޖިންސީ ގޯނާކުރިކަން ނުވަތަ ނޫންކަން ސާބިތުވާ ވަރަށް ހެކި މި ކޮމިޝަނުގެ ތަހުގީގަށް ލިބިފައި ނުވާތީ، އަލްފާޟިލާ އާމިނަތު ޝަހުމާ ހަލީމް މި ކޮމިޝަނަށް ހުށަހެޅުއްވި މައްސަލަ ނިމުނު ވާހަކަ ދަންނަވަމެވެ،" އެޗްއާރުސީއެމްގެ ލިޔުމުގައިވެ އެވެ.
ޖިންސީ ގޯނާކުރި ކަމުގެ ތުހުމަތުގެ މައްސަލަ ސާބިތުވާ ވަރަށް ހެކި ލިބިފައި ނުވާ ކަމަށް އެޗްއާރުސީއެމުން މިއަދު ޝަހުމާ އަށް އެންގިއިރު، ފަހުމީ މަގާމުން ވަކިކުރުމުގެ މައްސަލަ ރައްޔިތުންގެ މަޖިލީހުގެ މާދަމާގެ ޖަލްސާ އަށް ވަނީ އެޖެންޑާ ކޮށްފަ އެވެ. އެ މައްސަލަ މަޖިލީހުގެ ތަޅުމަށް ފޮނުވީ ޝަހުމާ އަށް ފަހުމީ ޖިންސީ ގޯނާކުރި ކަމަށް މިނިވަން މުއައްސަސާތަކާ ބެހޭ ކޮމެޓީ އަށް ގަބޫލުކުރެވޭއިރު، މަގާމުން އިސްތިއުފާ ދެއްވުމަށް އެ ކޮމެޓީން އެދުމުން އެކަމަށް ފަހުމީ އިޖާބަ ނުދިނުމުންނެވެ.
ޖިންސީ ގޯނާކުރި ކަމަށް ބުނާ މައްސަލައިގެ ތުހުމަތުތަކަށް ފަހުމީ ފެށުނީއްސުރެ ގެންދަވަނީ އިންކާރު ކުރައްވަމުންނެވެ.