ދަ ޑިމޮކްރެޓްސްގެ ރައީސާއި ނައިބު ރައީސްގެ މަގާމު ހުސްވުމާ ގުޅިގެން، އެ މަގާމުތަކަށް މީހުން އައްޔަނު ކުރުމަށް ޓަކައި އަންނަ މަހު 15ގައި އިންތިޚާބު ބޭއްވުމަށް އެ ޕާޓީން ނިންމައިފިއެވެ.
ދަ ޑިމޮކްރެޓްސް ޕާޓީގެ ރައީސް އަދި ނައިބު ރައީސްގެ މަޤާމު ހުސްވެފައިވަނީ އެ ދެ މަޤާމުގައި ތިއްބެވި ބޭފުޅުން އިސްތިއުފާ ދެއްވާ ޕާޓީ ދޫކުރުމުންނެވެ. މިކަމާއި ގުޅިގެން އެޕާޓީގެ ނޭޝަނަލް އެސެމްބްލީގެ ބައްދަލުވުމެއް ބާއްވާ އެ މަޤާމުތަކަށް މީހުން އިންތިޙާބު ކުރުމަށް އިންތިހާބެއް 40 ދުވަހުތެރޭގައި ބޭއްވުމަށް ވަނީ ނިންމާފައެވެ.
ޑިމޮކްރެޓްސްއިން ބުނީ، މި އިންތިޚާބުގައި ވޯޓުދިނުމުގެ ހައްގު ލިބިގެންވާ މެންބަރުންގެ ވަގުތީ ލިސްޓު އާންމުކޮށް، އަންނަ ބުދައިގެ މެންދުރު 12:00އިން އަންނަ ބުރާސްފަތީގެ މެންދުރު 12:00އަށް ޝަކުވާ ހުށަހެޅުމުގެ ފުރުސަތު ހުޅުވައިލާނެ ކަމަށެވެ.
އެ ޕާޓީން ބުނި ގޮތުގައި މި އިންތިޚާބުގައި ވޯޓުދިނުމުގެ ހައްގު ލިބިގެންވާ މެންބަރުންގެ ދާއިމީ ލިސްޓު އިއުލާންކުރަން ކަނޑައެޅިފައިވަނީ އަންނަ ހަފުތާގެ ހޯމަ ދުވަހުގައެވެ.
ޑިމޮކްރެޓްސް އެތެރޭގެ އިންތިޙާބު ބާއްވަން ތައްޔާރުވަމުންދާއިރު، ކުރީގެ ރައީސް މުހައްމަދު ނަޝީދު އިސްކޮށް ހުންނަވާ އުފެއްދެވި މި ޕާޓީގެ ބައެއް މެންބަރުން ޕާޓީއާއި ވަކިވި ނަމަވެސް ޕާޓީގެ ކުރިމަގު އޮތީ އުޖާލާކޮށް ކަމަށް ޕާޓީން ބުނެއެވެ. އަދި ޕާޓީއަށް މެންބަރުން އިތުރުކުރުމުގެ މަސައްކަތް ދާދި އަވަހަށް އަނެއްކާވެސް ފަށާނެ ކަމަށް އެޕާޓީން ވަނީ ހާމަކޮށްފައެވެ.