ވާހަކަ ފެށެނީ ޢީދު ބަންދެއްގައި ރަށަކަށް ގިނަ ބައަކު ގޮސް އުޅުނު ހިސާބުންނެވެ. އެއީ އަވިގަދަ ދުވަހެކެވެ. ވަރަށް ގިނަ ބައަކު ތިބީ މޫދުގައެވެ. އޮއި ވަރަށް ބާރެވެ. އިސްކޮޅު ނުޖެހޭ ހިސާބު ބޭރަށް ނުދާން ބޮޑެތި މީހުން ދިއައީ އިލްތިމާސްކުރަމުންނެވެ. އެހެންކަމާއިއެކވެސު މަޖާކުރަމުން މަޑުމަޑުން ބޭރަށް ދެވެމުން ގޮސް ޒީބާއަށް މާބޭރަށް ދެވުނުތަނާ ފަޔަށް ގޮތެއްވެފައި އަކުނިވަޔަށް ދަމައިގަތެވެ. އެވަގުތު އޮޔާއި ޒީބާ ބޭރަށް ދަމައިގަތެވެ. 
އޮއިބާރުކަމުން ޒުވާން ފިރިހެންކުދިންވެސް ކަންބޮޑުވެފައި ބަލަހައްޓައިގެން ތިބީއެވެ. ނަމަވެސް ޙުސައިނަކަށް މަންޒަރު ބަލަން ހުންނާކަށް ކެތެއް ނުކުރެވުނެވެ. ފެތުނުހައި ބާރަކަށް ފަތަމުން ގޮސް ޒީބާގެ ގައިގައި ހިފެހެއްޓިއެވެ. ޙުސައިންވެސް އަޑިއަށް ދަމައިގަތެވެ. ސަލާމަތް ނުވެވިދާނެހެން ހީވާ ކިތަންމެ ފަހަރެއް ދިއައެވެ. ނަމަވެސް ހިތްވަރު ދޫކޮށްނުލައި އަމިއްލަ ފުރާނަ އަތްމައްޗަށް ލައިގެން ކުރި މަސައްކަތުން އިސްކޮޅު ޖެހޭ ހިސާބަށް ޒީބާ ގެނެވުމުން އެހެން މީހުން ގޮސް ޒީބާނަގައިފިއެވެ. އެވަގުތަކީ ޙުސައިންވެސް ހޭނެތުނު ވަގުތެވެ. 
ޙުސައިނަށް ހޭވެރިކަންވީ ޞިއްޙީ މަރުކަޒުގައި އޮއްވައެވެ. ފުރަތަމަވެސް ސުވާލުކުރީ ޒީބާއަށްވީ ގޮތަކާއިމެދުގައެވެ. ޖަވާބުގައި ބުނީ ޒީބާ އަދި ހޭނާރާކަމަށާއި ނަމަވެސް ހޭއަރާނެ ކަމުގެ އުންމީދު ވަރަށް ބޮޑުކަމަށެވެ. 
ޒީބާއަކީ ޙުސައިން ކުރިން ދަންނަވެސް ކުއްޖެއް ނޫނެވެ. އެހެންކަމާއިއެކުވެސް ޒީބާގެ ވާހަކަ ފުރަތަމަވެސް ސުވާލުކުރެވުނީ އޭނާ ޒީބާ ސަލާމަތްކުރަން އެހައިބޮޑު ޤުރްބާނީއެއްވީތީ އެކަމުގެ ނަތީޖާ އޮޅުންފިލުވުމަށެވެ. 
ޒީބާ ހޭއެރީ އިރުކޮޅެއްފަހުންނެވެ. ފުއްޕާމެއަށްވެސް ލޮނު އެޅިފައި ހުރުމުން ޖެހުނީ އިމަރޖެންސީގައި ލޯންޗަކަށް ލައިގެން ޒީބާ މާލެގެންނާށެވެ. އެހިސާބުން ޙުސައިނަކަށް ޒީބާއަކާއި ބައްދަލެއް ނުވެއެވެ. އަދި ހޯދާކަށްވެސް ނުއުޅެއެވެ. ގެނބުނު ޒީބާގެ ޙާލު ރަނގަޅުވެއްޖެކަމަށް ނޫސްތަކުގައި ލިޔެފައި އޮއްވައި ފެނުމުން އެހިސާބުން ޙުސައިން ވަނީ އެކަން ނިންމާލައިފައެވެ. 
އެއިގެ 6 އަހަރުފަހެވެ. ޙުސައިންގެ މަންމައަށް ކެންސަރުޖެހުނީއެވެ. އެޒަމާނަކީ އާސަންދައެއް އެހެން ކަމެއް އޮންނަ ޒަމާނެއް ނޫނެވެ. އަމިއްލަ އަތުގައި ތަނަވަސްކަން ނެތްނަމަ ޖެހޭނީ ހުރިހާ ކަމަކަށް ސަލާންޖަހާށެވެ. މިހާރުވިއްޔާ އާސަންދައިން ކޮންމެވެސް ލިބޭތީ ސަލާންޖަހައިގެން ހޯދަންޖެހޭވަރު މަދުވި ނަމަވެސް އެއިރު ޖެހެނީ ހުރިހާ ފައިސާއެއް ސަލާންޖަހައިގެން ހޯދާށެވެ. 
އެކަމުގައި އޮންނަ އާދައިގެމަތިން ބޮޑެތި ތަންތަނަށް ސިޓީލަމުން ސިޓީއެއް ހިފައިގެން ގޮސް ވަދެވުނު ތަނެކެވެ. ވަންތަނާ ދުރުގައި ހުރި އަންހެންކުއްޖަކަށް ޙުސައިން ފެނިގެން އައިސް އެކުއްޖާ އެނގިއްޖެތޯ ސުވާލުކުރުމުން ޙުސައިން ބުނީ ނުއެނގުނު ކަމަށެވެ. "ނުއެނގުނަސް އަންނާށޭ" ބުނެ ހޫސައިން ގޮވައިގެން ދިއައީ ތަނުގެ ބޮޑުމީހާ ގާތަށެވެ. 
"ބައްޕާ! ބައްލަވަ މިހިރީ އެ ޙުސައިން!" ބުނެފަ އޭނާގެ ފޯނުން ޙުސައިންގެ ފޮޓޯތަކެއް ބައްޕައަށް ދެއްކިއެވެ. "އަޅުގަނޑަކަށް ނޭނގެ ކީއްކުރަން ކަމެއްވެސް މިތަނަށް އެއައީ. ފައުޑީ ބުނި އެހީއެއް ހޯދާށޭ!" 
ޙުސައިން ހުރީ ވަރަށް ކަންބޮޑުވެފައެވެ. "އެ ޙުސައިން" ކަމަށްވީގޮތެއް ނުއެނގިފައެވެ. އެހެންވެ ޙުސައިން ޙައިރާންވެފައި ހުއްޓާ ގޮނޑިއެއްގައި ބައިންދާފައި ބައްޕަ ބުންޏެވެ. "ޙުސައިން އެވެ. ޙުސައިނާއިމެދު އަހަރެމެން އަބަދުވެސް މިއަންނަނީ ވިސްނަމުންނެވެ. ތިއައީ ހަމަ އަހަރެމެންގެ ދަރިއެކެވެ. ކަލޭގެ ހަނދާނުގައި ނެތް ނަމަވެސް މިއިނީ އެދުވަހު ކަލޭގެ ފުރާނަ އަމިއްލައަށް ޤުރްބާންކޮށްފައި ސަލާމަތްކުރި ޒީބާއެވެ. މިއީ ޒީބާގެ ބައްޕައެވެ. ޒީބާ އެހެންނަނީ ޙުސައިން އާއި ބައްދަލުކޮށްފައި ނޫނީ ކައިވެންޏެއްވެސް ނުކުރާށެވެ. އަހަރެމެން ވިސްނަމުން މިދަނީ ޙުސައިން ހޯދަން ތިއަރަށަށްދާށެވެ. ބައްދަލުކޮށް އެވާހަކަދައްކާށެވެ! ދަތުރު ލަސްވަނީ މަސައްކަތް ހުރިގޮތުންނެވެ. ދަތުރު ލަސްކުރާތީ ޒީބާގެ މަންމަ މޫނުހަދައިގެން އުޅޭތާ މިހާރު ކިތަންމެ ދުވަހެކެވެ. މިކަމުގައި އޮތީ ޙުސައިން ނިންމާ ގޮތެކެވެ. އަނެއްކާ ޙުސައިން ކައިވެންޏެއް ކޮށްފިން ހެއްޔެވެ؟"
ޙުސައިން ބުނީ މަންމަ ބަލިކަމުން ކައިވެންޏަކާއިމެދު މިހައިތަނަށް ނުވެސް ވިސްނާ ކަމަށެވެ. އެއީ ޢާއިލާއަށް ލިބޭ ހުރިހާ ފައިސާއެއްހެން މަންމައަށް ހޭދަކުރަންޖެހިފައިވާތާ 4 ވަރަކަށް އަހަރުވެފައިވުމުން އަތުގައި އެއްވެސް ފައިސާއެއް ނެތުމުން ކަމަށެވެ. އަދި ޒީބާ ބޭނުންނަމަ ކައިވެނިކުރަން ހުރީ ތައްޔާރަށް ކަމަށާއި އަތުގައި އެއްވެސް ފައިސާއެއް ނެތިގެން މަންމައަށް ބޭސްނުކުރެވިގެން މިހާރުވެސް މިހިނގަނީ ސަލާން ޖަހަމުން ކަމަށެވެ. 
ބައްޕަ ބުނީ ދެން ހިނގަން ނުޖެހޭނެ ކަމަށާއި އިން ގޮނޑީގައި އިށީނދެލައިގެން އިނީމާ ނިމުނީ ކަމަށެވެ. އެހެން ބުނެފައި މުވައްޒިފަކަށް ގުޅައިގެން ގެނެސްފައި ބުނީ ޙުސައިންގެ މަންމަގެ ބޭސްފަރުވާއަށް ޢާއިލާއިން ބޭނުންވާ ޤައުމަކަށް އަވަހަށް ފުރުވާލުމަށާއި އެކަމަށް ކުރަންޖެހޭ ހުރިހާ ޚަރަދެއް ކުރާނީ އޭނާ ކަމަށެވެ. ޙުސައިން ގާތުގައި ބުނީ ގެއަށް ގޮސް މަންމަގެ ޕާސްޕޯޓާއި އެކުގައި ދާންތިބި ބައެއްގެ ޕާސްޕޯޓް ހިފައިގެން އައުމަށެވެ. ޙުސައިން އައުމުން ބުނީ ފުރަންވާނީ ކައިވެނިކޮށް ޒީބާވެސް ގޮވައިގެން ކަމަށެވެ. 
އެއްދުވަސް މެދަށް ދޫކޮށްފައި އަނެއްރޭ ދެމީހުންގެ ކައިވެނިކުރެވިއްޖެއެވެ. އެކައިވެނީގައި މިހާރު 22 އަހަރުވެއްޖެއެވެ. 6 ކުދިންވެސް ލިބިއްޖެއެވެ. ދެމަފިރިންވެސް ތިބީ ހަމަ ވަރަށް އުފަލުންނެވެ. ޒީބާގެ ބައްޕަގެ މަސައްކަތުގައި އިސްކޮށްތިބީވެސް ދެމަފިރިންނެވެ. 
މިކިޔައިދިނީ އަޅުގަނޑުގެ އެންމެ ގާތް އެކުވެރިޔާ ޒީބާގެ ޙަޔާތުގައި ކަންކަން ދިމާވި ގޮތެވެ. މިއަދުނޫހުގެ ކިޔުންތެރިންނަށް ބުނެލަން ބޭނުންވަނީ އެހެން މީހެއްގެ ފުރާނަ ސަލާމަތްކުރަން މަސައްކަތްކުރަން ލިބޭ ފުރުޞަތު ދޫކޮށްނުލާށެވެ. ކޮންމެ ފަހަރަކު ދުނިޔޭގައި މިފަދަ ބަދަލެއް ނުލިބިދާނެއެވެ. ނަމަވެސް އާޚިރަތުގައި ހިތް އުފަލުން ފުރިގެންދާނެ ފަދަ ބަދަލެއް ﷲ ދެއްވަވާނެއެވެ. 
އަދި އެހެން މީހުންނަށްޓަކައި ކަންކަން ކޮށްދޭންވީ މިދުނިޔޭގައި ލިބިދާނެ ބަދަލަކަށް އުންމީދުކޮށްގެނެއް ނޫނެވެ. ޙުސައިން ޢަމަލުކުރިފަދައިން ﷲ އަށްޓަކައެވެ. އެއިރުން ﷲ ދެއްވަވާ ބަދަލު މާފުރިހަމަވާނެއެވެ. އިން ޝާ ﷲ
 
- ވަލީދާ / މިއަދުނޫހުގެ ކިޔުންތެރިއެއް