ތައިލެންޑާއި ކެމްބޯޑިއާ އާ ދެމެދު އޮންނަ ބޯޑަރާ މެދު އުފެދިފައިވާ ހިލާފުތަކާ ގުޅިގެން ދެ ގައުމުން އަނެއްކާ ވެސް ހަމަލާ ބަދަލުކުރަން ފަށައިފި އެވެ.
މި އަހަރުގެ ޖުލައި މަހުގެ ތެރޭގައި ވެސް ދެ ގައުމުން ހަމަލާތަކެއް ބަދަލުކުރި އެވެ. އެ ފަހަރު ފަސް ދުވަހަށް ބަދަލުކުރި ހަމަލާތަކުގައި 48 މީހުން މަރުވެ 300،000 އަށްވުރެ ގިނަ މީހުން ވަގުތީ ހިޔާތަކަށް ބަދަލުކުރަން ޖެހުނެވެ. އެ ހަމަލާތައް ހުއްޓާލީ އެމެރިކާ މެދުވެރިވެގެން ހެދި އެއްބަސްވުމެއްގެ ދަށުންނެވެ.
ތައިލެންޑުގެ އަސްކަރިއްޔާއިން ހާމަކޮށްފައިވާ ގޮތުގައި އެ ގައުމުގެ އެންމެ އިރުމަތީގައި އޮންނަ އުބޮން ރަޗަތާނީއަށް ކެމްބޯޑިއާގެ ސިފައިން ވަނީ ހަމަލާ ދީފަ އެވެ. ތައިލެންޑުން ބުނެފައިވާ ގޮތުގައި އެ ހަމަލާތަކުގައި ސިފައިންގެ މީހަކު މަރުވެ އިތުރު ހަތަރު މީހުންނަށް ވަނީ އަނިޔާވެފަ އެވެ.
އޭގެ ރައްދެއްގެ ގޮތުން ބޯޑަރު ސަރަހައްދުގައި ހުރި ކެމްބޯޑިއާގެ އަސްކަރީ ސަރަހައްދުތަކަކަށް ވައިގެ މަގުން ހަމަލާ ދީފައިވާ ކަމަށް ތައިލެންޑުން ބުނެ އެވެ.
ކެމްބޯޑިއާގެ ޑިފެންސް މިނިސްޓްރީން ނެރުނު ބަޔާނެއްގައި ބުނި ގޮތުގައި އެ ގައުމުގެ ދެ ސަރަހައްދަކަށް ތައިލެންޑުގެ އަސްކަރިއްޔާއިން ވަނީ ހަމަލާ ދީފަ އެވެ. ތައިލެންޑަށް އެއްވެސް ހަމަލާއެއް ދީފައި ނުވާ ކަމަށް ކެމްބޯޑިއާއިން ބުނެ އެވެ.
ހަމަލާ ބަދަލުކުރުމުގެ އެއްބަސްވުމުގައި ދެ ގައުމުން ސޮއިކުރީ މެލޭޝިއާގެ ވެރިރަށް ކުއަލަލަމްޕޫރުގަ އެވެ. އެ ރަސްމިއްޔާތުގައި އެމެރިކާގެ ރައީސް ޑޮނާލްޑް ޓްރަމްޕާއި މެލޭޝިއާގެ ބޮޑުވަޒީރު އަންވަރު އިބްރާހިމް ބައިވެރިވެވަޑައިގަތެވެ.