އެމެރިކާ އާއި އިސްރާއީލުން އީރާނާ ދެކޮޅަށް ފަށާފައިވާ ހަނގުރާމައާ ގުޅިގެން، ވޯލްޑް ކަޕްގައި އީރާނުން ކުޅޭ މެޗުތައް މެކްސިކޯއަށް ބަދަލުކޮށްދިނުމަށް އެދުނު އެދުމަށް ފީފާއިން ނޫނެކޭ ބުނެފިއެވެ. ދުނިޔޭގެ ފުޓުބޯޅައިގެ މައި އިދާރާ، ފީފާއިން ބުނެފައިވަނީ 2026 ވަނަ އަހަރުގެ ވޯލްޑް ކަޕްގެ މެޗުތައް ކުރިއަށްދާނީ މިދިޔަ އަހަރު އިއުލާނުކޮށްފައިވާ ޝެޑިއުލާ އެއްގޮތަށް ކަމަށެވެ. މިއާއެކު، އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައާ ގުޅިގެން އީރާނުގެ މެޗުތައް އެމެރިކާއިން މެކްސިކޯއަށް ބަދަލުކުރުމަށް އީރާނުން ކުރަމުންދިޔަ އުންމީދުތަކަށް ވަނީ ނިމުމެއް އައިސްފައެވެ. ފީފާއިން ނެރުނު ބަޔާނެއްގައި ބުނެފައިވަނީ، 2026 ގެ ވޯލްޑް ކަޕްގެ ރޭވުންތަކާ ގުޅޭގޮތުން އީރާނު ހިމެނޭހެން މުބާރާތުގައި ވާދަކުރާ ހުރިހާ ގައުމެއްގެ އެސޯސިއޭޝަންތަކާ އެކު ފީފާއިން ގަވާއިދުން މަޝްވަރާކުރަމުން އަންނަ ކަމަށެވެ. އަދި 2025 ވަނަ އަހަރުގެ ޑިސެމްބަރު މަހުގެ 6 ވަނަ ދުވަހު އިއުލާނުކޮށްފައިވާ މެޗު ޝެޑިއުލާ އެއްގޮތަށް ހުރިހާ ޓީމުތަކުން ވެސް ވާދަކުރާނެ ކަމަށް އުންމީދުކުރާ ކަމަށް އެ އިދާރާއިން ވަނީ ބުނެފައެވެ. މިދިޔަ ފެބްރުއަރީ މަހުގެ 28 ވަނަ ދުވަހު ފެށުނު ހަނގުރާމައާ ގުޅިގެން، މި މުބާރާތުގައި އީރާނުން ބައިވެރިވުމާމެދު ވަނީ ސުވާލު އުފެދިފައެވެ. މިދިޔަ ހަފުތާގައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ، އީރާނަށް އެމެރިކާއަށް އައުމަށް މަރުހަބާ ކިޔާ ކަމަށެވެ. ނަމަވެސް އެ ކުޅުންތެރިންގެ ފުރާނައާއި ސަލާމަތަށްޓަކައި އެމެރިކާގައި ތިބުމަކީ އެންމެ ރަނގަޅު ގޮތް ކަމަށް ގަބޫލުފުޅުނުކުރައްވާ ކަމަށް ވެސް އޭނާ ވިދާޅުވިއެވެ. ޓްރަމްޕްގެ މި ވާހަކަތަކަށް ރައްދުދީ، އީރާނުގެ ގައުމީ ފުޓުބޯޅަ ޓީމުން ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ވޯލްޑް ކަޕުން އީރާނުގެ ގައުމީ ޓީމު ބާކީކުރުމުގެ ބާރު އެއްވެސް ފަރާތަކަށް ލިބިގެން ނުވާ ކަމަށެވެ. އީރާނުގެ ފުޓުބޯޅަ އިދާރާގެ ވެރިޔާ މަހްދީ ތާޖް ދާދި ފަހުން ވިދާޅުވެފައިވަނީ، އީރާނުގެ ގައުމީ ޓީމުގެ ސަލާމަތްތެރިކަން ކަށަވަރުކޮށްނުދެވޭނެ ކަމަށް ޓްރަމްޕް ފާޅުކަންބޮޑު ގޮތެއްގައި ވިދާޅުވެފައިވާތީ، އީރާނުގެ ޓީމު އެމެރިކާއަށް ނުދާނެ ކަމަށެވެ. އަދި އީރާނުގެ މެޗުތައް މެކްސިކޯގައި ކުޅުމަށް ފީފާއާއެކު މަޝްވަރާކުރަމުންދާ ކަމަށް އޭނާ ވިދާޅުވިއެވެ. މީގެ އިތުރުން، މެކްސިކޯގައި ހުންނަވާ އީރާނުގެ ސަފީރު އަބޯލްފަޒްލް ޕަސަންދިދޭ ވަނީ، އީރާނުގެ ވަފުދަށް ވިސާ ދޫކުރުމާއި ލޮޖިސްޓިކް އެހީތެރިކަން ފޯރުކޮށްދިނުމުގައި އެމެރިކާއިން އެއްބާރުލުން ނުދޭ ކަމަށް ވިދާޅުވެ އެކަން ކުށްވެރިކުރައްވާފައެވެ. މިއީ އެމެރިކާ، މެކްސިކޯ އަދި ކެނެޑާ ހިމެނޭހެން ތިން ގައުމެއްގައި ވޯލްޑް ކަޕް ބާއްވާ ފުރަތަމަ ފަހަރެވެ. މެކްސިކޯގައި އީރާނުގެ މެޗުތައް ކުޅެވިދާނެތޯ ސުވާލުކުރުމުން، މެކްސިކޯގެ ރައީސް ކްލައުޑިއާ ޝެއިންބައުމް ވިދާޅުވީ ފުރަތަމަ ބުރުގެ މެޗުތައް ބޭއްވުމަށް އެ ގައުމު އޮތީ ތައްޔާރަށް ކަމަށެވެ. އަދި މެކްސިކޯއަކީ ދުނިޔޭގެ ހުރިހާ ގައުމަކާއެކު ވެސް ޑިޕްލޮމެޓިކް ގުޅުން ބާއްވާ ގައުމެއް ކަމަށާއި، އެހެންކަމުން ފީފާގެ ނިންމުމަކަށް އިންތިޒާރުކުރާނެ ކަމަށް އޭނާ ވިދާޅުވިއެވެ. އީރާނަކީ ޖަޕާނަށްފަހު 2026 ގެ ވޯލްޑް ކަޕަށް ކޮލިފައިވި އޭޝިއާގެ ދެވަނަ ގައުމެވެ. އެ ގައުމުން ވަނީ މީގެ އަހަރެއްހާ ދުވަސް ކުރިން ކޮލިފައިން ގްރޫޕްގެ އެއްވަނަ ހޯދައިގެން މުބާރާތުގެ ޖާގަ ކަށަވަރުކޮށްފައެވެ. ޝެޑިއުލްގައިވާ ގޮތުން އީރާނުން ލޮސް އެންޖެލިސްގައި ނިއުޒީލެންޑް އަދި ބެލްޖިއަމްއާ ދެކޮޅަށް ކުޅޭނެއެވެ. އަދި ސީއެޓްލްގައި މިސްރާ ދެކޮޅަށް ކުޅުމަށް ވަނީ ހަމަޖެހިފައެވެ.