ކަނޑުމަގުން ހަ ކިލޯއަށްވުރެ ގިނަ އަދަދެއްގެ މަސްތުވާތަކެތި ރާއްޖެ އެތެރެކުރި ކަމުގެ ތުހުމަތުގައި ހައްޔަރު ކުރި ދެ ޒުވާނުންގެ ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވް ވެއްޖެއެވެ. ރާއްޖެއަށް ހަ ކިލޯގެ މަސްތުވާތަކެތި، ކަނޑުމަގުން އެތެރެކުރި ކަމުގެ ތުހުމަތުގައި ހައްޔަރު ކުރި ދެ މީހުންނަކީ، މއ. ތަރިޖެހިއާގެ އުމުރުން 25 އަހަރުގެ ޢިސްމާއީލް އަބާން ޢަބްދުﷲ އާއި ސ. މަރަދޫ، ރަތްމާގެ އުމުރުން 19 އަހަރުގެ އަޙްމަދު ދާން ފަރްހޫދުއެވެ. މިދިޔަ މަހު ފަހުކޮޅުން ފެށިގެން އެ ދެ މީހުން ތިބީ، ހައްޔަރުކޮށްފައެވެ. އެ ދެ މީހުންގެ ބަންދަށް ބުރާސްފަތި ދުވަހު ވަނީ އިތުރު 16 ދުވަސް ޖަހައިފައެވެ. ފުލުހުން ބުނީ މި ދެ މީހުން ހައްޔަރުކޮށްފައި ވަނީ ރާއްޖެއަށް މަސްތުވާތަކެތި އެތެރެކޮށް، ބޭނުންކޮށް ގެންގުޅެ އަދި އެ ތަކެތި ވިއްކައި ވިޔަފާރިކުރާކަމުގެ ތުހުމަތުގައި ކަމަށެވެ. https://sun.mv/218868 މި މީހުން ހައްޔަރުކޮށްފައި ވަނީ މޯލްޑިވްސް ކަސްޓަމްސް ސާވިސްއާއި ފުލުހުންގެ ޑްރަގް އެންފޯސްމަންޓް ގުޅިގެން ހިންގި އޮޕަރޭޝަންގައި މާރިޗު މަހުގެ ފަސްވަނަ ދުވަހެވެ. ދެ މީހުން ހައްޔަރުކޮށް ބަލައި ފާސްކުރިއިރު ހަ ކިލޯއަށްވުރެ ގިނަ މަސްތުވާތަކެތި ފެނިފައިވެއެވެ. މި ދެ މީހުންގެ އެންމެ ފަހު ބަންދު އަމުރުން އެނގޭ ގޮތުގައި ދެ މީހުން ވެސް ވަނީ މަސްތުވާތަކެއްޗަށް ޕޮޒިޓިވްވެފައެވެ. މަސްތުވާތަކެތި ޓްރެފިކް ކުރުމަކީ ދިވެހިރާއްޖޭގައި ވަރަށް ބޮޑު ކުށެކެވެ. މިކަން މަނާކުރާ މައިގަނޑު ޤާނޫނަކީ މަސްތުވާތަކެއްޗާބެހޭ ޤާނޫނެވެ. އެ ގާނޫނުގެ ދަށުން، ހަތަރު ގްރާމަށްވުރެ ގިނަ ޑައިމޯފިން އަތުގައި ހުރުން ނުވަތަ އެ މިންވަރު އެތެރެކުރުމަކީ ޓްރެފިކް ކުރުމެވެ. މީގެ އަދަބަކީ އުމުރަށް ޖަލަށްލުމާއެކު (25 އަހަރު)، 100,000 ރުފިޔާއާއި 10,000,000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ. އަދި ހަމަ އެ ގާނޫނުގެ ދަށުން ކެނެބިސް 14 ގްރާމަށްވުރެ ގިނަ ކެނެބިސް އަތުގައި ހުރުން ނުވަތަ އެ މިންވަރު އެތެރެކުރުމަކީ ޓްރެފިކް ކުރުމެވެ. މީގެ އަދަބަކީ ވެސް އުމުރަށް ޖަލަށްލުމާއެކު 100,000 ރުފިޔާއާއި 10,000,000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ. މަސްތުވާތަކެތި އުފެއްދުން، ރާއްޖެއަށް އެތެރެކުރުން، ބޭރުކުރުން، ވިއްކުން ނުވަތަ ވިއްކުމަށްޓަކައި އަތުގައި ބެހެއްޓުމަކީ ޓްރެފިކް ކުރުމުގެ ޢަމަލުތަކެވެ. ޤާނޫނުގައި ކަނޑައަޅާފައިވާ ވަކި ބަރުދަނަކަށްވުރެ ގިނައިން މަސްތުވާތަކެތި މީހެއްގެ އަތުން ފެނިއްޖެނަމަ، އެ މީހަކީ އެ ތަކެތި ޓްރެފިކް ކުރާ މީހެއް ކަމަށް ޤާނޫނީ ގޮތުން ބެލެވޭނެއެވެ. މިފަދަ މައްސަލަތަކުގައި ދައުލަތުން ސާބިތުކޮށްދޭން ޖެހޭނީ އެ މީހެއްގެ އަތުގައި އެ ތަކެތި ހުރިކަމާއި، އެއީ މަސްތުވާތަކެތިކަން އެނގިހުރެ އަތުގައި ބެހެއްޓިކަމެވެ.