އެމެރިކާގެ އެތެރޭގެ އުފެއްދުންތެރިކަން އިތުރުކުރުމުގެ ގޮތުން ކަމަށް ވިދާޅުވެ ރައީސް ޑޮނަލްޑް ޓްރަމްޕް ރޭ ވަނީ އެ ގައުމަށް އެތެރެކުރާ މުދަލަށް ނަގާ އާ ޓެރިފް ރޭޓްތައް އިއުލާން ކުރައްވައިފަ އެވެ. އެއާ އެކު ކުރިއާ ހިލާފަށް އެ ގައުމަށް އެތެރެކުރާ މުދަލަށް ގިނަ ގައުމުތަކުން ބޮޑު އިމްޕޯޓް ޑިއުޓީއެއް ނުވަތަ ޓެރިފެއް ދައްކަން ޖެހޭނެ އެވެ.
ރައީސް ޓްރަމްޕުގެ އާ ސިޔާސަތުގައި ރާއްޖެ ހިމެނެނީ %10 ޓެރިފް ނަގާ ގައުމުތަކުގެ ކެޓަގަރީގަ އެވެ. އެއީ ޖެނެރަލް ނުވަތަ އާންމު ކެޓަގަރީ އެވެ. އާ ސިޔާސަތުގައި ބުނާ ގޮތުން ހާއްސަ ޓެރިފް ރޭޓެއް ކަނޑަނާޅާ ގައުމުތަކުގެ މުދަލުން ނަގާނީ %10 އެވެ. ރާއްޖެއަކީ މި ސަރަހައްދުގެ ގައުމުތަކާ ބަލާއިރު ކުޑަ ޓެރިފް ރޭޓެއް އޮތް އެއް ގައުމެވެ. 
ކަސްޓަމްސްގެ ތަފާސްހިސާބުތަކުން ދައްކާ ގޮތުން ރާއްޖެއިން އެމެރިކާއަށް މައިގަނޑު ގޮތެއްގައި ބޭރު ކުރަނީ ފިނި ކުރި ބޮޑު ކަންނެއްޏެވެ. އަދި ކޮންމެވެސް ވަރަކަށް ފާނަ އާއި ދިރޭ މަހުގެ މަހުގެ ބާވަތްތައް ވެސް ބޭރު ކުރެ އެވެ. އެގޮތުން މިދިޔަ އަހަރު ރާއްޖެއިން އެމެރިކާއަށް ބޭރު ކުރި މުދަލުގެ އަގު ނުވަތަ މަހުގެ އަގު އުޅެނީ 8.9 މިލިއަން ރުފިޔާ (573,947 ޑޮލަރު)ގަ އެވެ. އަދި އެންމެ ފަހުގެ ތަފާސްހިސާބުތަކުން ދައްކަނީ މިދިޔަ ޖެނުއަރީގައި 154,384 ރުފިޔާގެ މަސް ރާއްޖެއިން އެ ގައުމަށް ބޭރު ކުރި ކަމަށެވެ. 
ރާއްޖެއިން އެމެރިކާއަށް ބޭރުކުރި މަހުގެ އަގު: 
2024 - 8.9 މިލިއަން ރުފިޔާ (573,947 ޑޮލަރު)
2023 - 27.8 މިލިއަން ރުފިޔާ (1.89 މިލިއަން ޑޮލަރު) 
2022 - 29.1 މިލިއަން ރުފިޔާ (1.9 މިލިއަން ޑޮލަރު)
2021 - 19.6 މިލިއަން ރުފިޔާ (1.3 މިލިއަން ޑޮލަރު) 
2020 - 30 މިލިއަން ރުފިޔާ (1.9 މިލިއަން ޑޮލަރު) 
މިދިޔަ ފަސް އަހަރުގެ ތެރޭގައި ރާއްޖެއިން އެމެރިކާއަށް ބޭރުކުރި މަހުގެ އަގަކީ 115 މިލިއަން ރުފިޔާ (7.5 މިލިއަން ޑޮލަރު) އެވެ. 
ރާއްޖެއިން އެންމެ ގިނައިން ބޭރަށް މަސް ބޭރުކުރާ އެއް ކުންފުނި އެންސިސް ފިޝަރީޒްގެ ކޮމާޝަލް ޑައިރެކްޓާ ހުސެއިން އަފީފް 'ދައުރު'އަށް ވިދާޅުވި ގޮތުގައި މިހާރު ވެސް އެމެރިކާ ބާޒާރަށް ބޭރު ކުރާ މަހަށް %10ގެ ޑިއުޓީއެއް އެ ގައުމުން ނަގާ ކަމަށެވެ. އެހެން ކަމުން ޓްރަމްޕް އިއުލާން ކުރެއްވި އާ ސިޔާސަތުގެ ސަބަބުން ރާއްޖެއިން އެމެރިކާ ބާޒާރަށް އާންމުކޮށް ގެންދާ ބޮޑު ކަންނެއްޏަށް ނަގާ ޑިއުޓީގެ ބޮޑުވުމެއް ނާންނާނޭ ކަމަށް އޭނާ ވިދާޅުވި އެވެ. 
"އަޅުގަނޑުމެން މި ފޮނުވަނީ ކަރުއަޅާފައި ބޮލާ އެކު މި ހުންނަ ހޯލް ބޮޑު ކަންނެލި. އާ ޓެރިފުން މިހާރަށް ވުރެ ވަކި ބޮޑު ޑިއުޓީއެއް ރާއްޖޭގެ މަހުން ނުނަގާނެ. އެހެންވީމާ މީގެ އަސަރެއް މަސް އެކްސްޕޯޓަކަށް ނުހުންނާނެ،" އަފީފް ވިދާޅުވި އެވެ. 
އެމެރިކާ ބާޒާރަށް މަސް ފޮނުވާ އޯޝަން ހަންޓާ ފިޝަރީޒްގެ ޗެއާމަން ހުސެއިން ޝަރީފް ވެސް ވިދާޅުވީ އެމެރިކާއަށް މިހާރު ވެސް މަސް ބޭރު ކުރަނީ %10 ޓެރިފެއްގައި ކަމުން އެ ގައުމަށް މަސް ބޭރުކުރަން ހުރަހެއް ނޭޅޭނޭ ކަމަށެވެ.
"މި އައި ޓެރިފް ބަދަލުން މީގައި އަޅުގަނޑުމެންނަށް ކުރިމަތިވާނޭ ގެއްލުމެއް ނޯންނާނެ. އެމެރިކާ މާކެޓަކީ އަބަދު ވެސް ލަގްޒަރީ މާކެޓެއް،" ހުސެއިން ޝަރީފް ވިދާޅުވި އެވެ. 
އެންސިސްއިން އަފީފް ވިދާޅުވީ ގޮތުގައި އެމެރިކާގެ އާ ޓެރިފް ސިޔާސަތުގެ ސަބަބުން މަސްވެރިކަމުގައި ރާއްޖެއާ ވާދަކުރާ ބައެއް ގައުމުތަކުގެ މަހަށް އެމެރިކާއިން މިހާރު ނަގާ ޑިއުޓީ ބޮޑުވެގެންދާނެ އެވެ. މިސާލަކަށް ސްރީ ލަންކާ އެވެ. އެ ގައުމުން އެމެރިކާއަށް ބޭރު ކުރާ މުދަލަށް ނަގާ ޓެރިފް %12 އިން %44އަށް ވަނީ ބޮޑުކޮށްފަ އެވެ. 
އަފީފް ވިދާޅުވީ ލަންކާއަކީ މަހުގެ ވިޔަފާރީގައި ސީދާ ރާއްޖެއާ ވާދަކުރާ ގައުމަކަށް ވާއިރު އެކަމުގެ ސަބަބުން އެ ގައުމުގެ މަހުގެ އުފެއްދުންތަކުގެ އަގު އެމެރިކާގެ ބާޒާރުގައި ވަރަށް ބޮޑަށް އުފުލޭނޭ ކަމަށް ލަފާކުރެވޭ ކަމަށެވެ. އެހެން ނަމަވެސް ރާއްޖެއަށް ނަގާ ޓެރިފް ބޮޑު ނުކުރާތީ ދިވެހި މަހުގެ އަގު މިހާރު ވެސް ހުރިވަރުގައި ހިފެހެއްޓޭނޭ ކަމަށް އަފީފް ލަފާކުރައްވަ އެވެ.
"ދިވެހި މަހުގެ ކޮލިޓީ ހިފެހެއްޓެންޏާ ދިވެހި މަހަށް ރަނގަޅު މާކެޓެއް މި ހުޅުވެނީ. ރާއްޖެ ވާދަކުރަން މި ޖެހޭ ގައުމުތަކުގެ މަސް، މާކެޓުގައި އަގު ބޮޑުވީމާ އޭގެ ފައިދާ އޮންނާނޭ ދިވެހި މަސް އެކްސްޕޯޓަރުންނަށް،" އަފީފް ވިދާޅުވި އެވެ.
މީގެ އިތުރަށް އެމެރިކާއަށް އެންމެ ގިނައިން މަސް ބޭރު ކުރާ ކެނެޑާ، ތައިލެންޑް، ވިއެތްނާމް ފަދަ ގައުމުތަކުގެ އުފެއްދުންތަކުން ނަގާ ޓެރިފްތައް ވަނީ ވަރަށް ބޮޑުކޮށްފަ އެވެ. މިކަމުގެ ސަބަބުން އެ ގައުމުތަކުން އެމެރިކާއަށް ބޭރު ކުރާ މަހުގެ އަދަދުތައް ދަށްވުމުގެ ފުރުސަތު ވަރަށް ބޮޑެވެ. 
ހުސެއިން ޝަރީފް ވެސް ވިދާޅުވީ ވާދަވެރިންނާ އަޅާ ބަލާއިރު ރާއްޖޭގެ މަހަށް ނަގާ ޓެރިފް އެމެރިކާގައި ކުޑަވުމުން ދިވެހި މަހަށް އެމެރިކާ ބާޒާރުގައި އަބަދު ވެސް ފުރުސަތު އޮންނަ ކަމަށެވެ.
"އީޔޫގައި މިވާ ގޮތަކީ ވާދަވެރިންނަށް މި ހުންނަނީ ކުޑަ ޓެރިފް. ރާއްޖެއަށް ވަރަށް ބޮޑު. އެހެން ވީމާ އެ ގައުމުތަކާ ރާއްޖެއަށް އެ މާކެޓުގައި ވާދަކުރަން މި އުނދަގުލީ. އެކަމަކު އެމެރިކާގައި މިއައި ބަދަލުން ވާދަވެރިންގެ މި ބޮޑުވެގެން މިއައީ. އަނެއްކާ އެމެރިކާއަކީ ލަގްޒަރީ މާކެޓެއް ވީމާ ފައިދާތައް ހުރޭ ދިވެހި މަހަށް،" ހުސެއިން ޝަރީފް ވިދާޅުވި އެވެ. 
މިދިޔަ ފަސް އަހަރު ތެރޭ ރާއްޖެއިން އެމެރިކާއަށް ބޭރު ކުރާ މަހުގެ ބާވަތްތައް ވަނީ ދަށްވާން ފަށައިފަ އެވެ. އަފީފް ފާހަގަ ކުރެއްވި ގޮތުގައި ސަބަބަކީ އެމެރިކާ ބާޒާރަކީ ވަކި ކޮލިޓީއެއްގައި މަސް ވިއްކަން ޖެހޭ ބާޒާރަކަށް ވުމެވެ. އެހެން ނަމަވެސް ކޮވިޑަށް ފަހު ރާއްޖޭގެ މަހުގެ ކޮލިޓީ ނުހިފެހެއްޓި ދަށަށް ދިޔުމަކީ އެންމެ މައިގަނޑު ސަބަބު ކަމަށް އޭނާ ވިދާޅުވި އެވެ. އެގޮތަށް މެދުވެރިވީ ސައީދު ފާހަގަކުރެއްވި ގޮތުގައި: 
މަސްވެރިކަން ދަށްވުމުން މަސްވެރިކަން ކުރާ ދިވެހިން މަދުވެ ބިދޭސީން އެ މަސައްކަތް ކުރާ ވަރު އިތުރުވެ ކޮލިޓީ ނުހިފެހެއްޓުން 
އިންޑިއާ ކަނޑުގައި ކަންނެލީގެ ސައިޒްތަކަށް ކުޑަވަމުން ދިޔުން 
މަސްވެރިން އެހެނިހެން ވަޒީފާތައް ހޯދުމުން މަސް ދޯނިތަކުގެ އަދަދު މަދުވުން؛ 700 އިން 400 އޮޑިއަށް އަދަދު ވަނީ މަދުވެފައި 
ޝަރީފް ވިދާޅުވާ ގޮތުގައި ރާއްޖެއަށް މި ހުޅުވޭ ފުރުސަތުގައި ބޭނުން ހިފައިންގެން އެމެެރިކާގެ މާކެޓަށް ބޭނުންވާނޭ ލޯ ބޮޑު ކަންނެލި ބޭނޭނޭ ގޮތަށް ރާއްޖޭގެ މަސްވެރިކަން އިންތިޒާމް ކުރަން ޖެހޭ ކަމަށެވެ. އެގޮތުން ހިފެހެއްޓިފައިވާ ހަރުދަނާ އުސޫލުތަކެއްގެ ތެރެއިން ލޯންގް ލައިން ނުވަތަ ލޭނު އެޅުމުގެ މަސްވެރިކަމަށް ދިވެހިންނަށް ފުރުސަތު ލިބެން ޖެހޭ ކަމަށް އޭނާ ވިދާޅުވި އެވެ. 
"ކޮލިޓީ ހިފަހައްޓައިގެން މިކަން ކުރެވިއްޖިއްޔާ މިއީ އަޅުގަނޑުމެންނަށް ލިބޭ ފުރުސަތެއް،" ޝަރީފް ވިދާޅުވި އެވެ.