އިސްލާމީ ޤައުމުތަކުގެ ފަތުރުވެރިކަމުގެ ދާއިރާގެ ކޮރަޕްޝަން މައްސަލަތަކާ ގުޅޭ ބައިނަލްއަޤްވާމީ ފޯރަމެއް ރާއްޖޭގައި ބާއްވަނީ

އިސްލާމީ ޤައުމުތަކުގެ ފަތުރުވެރިކަމުގެ ދާއިރާގައި ހުރި ކޮރަޕްޝަން މައްސަލަތައް ހައްލުކުރުމަށް ބައިނަލްއަޤްވާމީ ފޯރަމެއް ރާއްޖޭގައި ބޭއްވުމަށް ނިންމައިފިއެވެ. މި ފޯރަމަކީ ސަޢުދީ އަރަބިއްޔާގެ އޯވަސައިޓް އެންޑް އެންޓި ކޮރަޕްޝަން އޮތޯރިޓީ (ނަޒާހާ) އާއި ދިވެހިރާއްޖޭގެ އެންޓި ކޮރަޕްޝަން ކޮމިޝަން ގުޅިގެން ބާއްވާ ފޯރަމެކެވެ.
އޭސީސީން މަޢުލޫމާތު ދެއްވާފައިވާ ގޮތުގައި، މި ފޯރަމް ބޭއްވުމުގެ މައިގަނޑު މަޤްޞަދަކީ އިސްލާމީ ޤައުމުތަކުގެ ފަތުރުވެރިކަމުގެ ދާއިރާގައި ހުރި ކޮރަޕްޝަންގެ މައްސަލަތައް ދެނެގަނެ، އެކަންކަމާމެދު މަޝްވަރާކުރާނެ ޕްލެޓްފޯމެއް ޤާއިމުކުރުމެވެ. މި ފޯރަމް އޮންނާނީ މޭ މަހުގެ 6 އިން 7 އަށް ވިލާ ނޯޓިކާ ރިސޯޓުގައެވެ.
ފޯރަމްގައި ބައިވެރިވާނީ އޯގަނައިޒޭޝަން ފޯރ އިސްލާމިކް ކަންޓްރީސް (އޯއައިސީ) ގެ މެންބަރު ޤައުމުތަކުގެ އެންޓި ކޮރަޕްޝަން އިދާރާތަކާއި، އެ ޤައުމުތަކުގެ ފަތުރުވެރިކަމުގެ އިދާރާތަކާއި އަދި ބައިނަލްއަޤްވާމީ އެހީދޭ ޖަމާޢަތްތަކުންނެވެ. އޭސީސީން ފާހަގަކުރައްވާފައިވާ ގޮތުގައި މިހާތަނަށް 50 އަށްވުރެ ގިނަ ފަރާތުން ވަނީ ރަޖިސްޓްރީ ކޮށްފައެވެ.
ފޯރަމްގައި ބައިވެރިވުމުގެ ފުރުޞަތު މި މަހުގެ 10 ވަނަ ދުވަހާ ހަމައަށް ހުޅުވާލާފައިވާއިރު، ފޯރަމް ނިމޭއިރު ފަތުރުވެރިކަމުގެ ދާއިރާގައި ހުރި ހިރާސްތައް ނައްތާލުމަށް ބޭނުންވާ އުސޫލުތަކެއް އެކުލަވާލެވޭނެ ކަމަށް އޭސީސީން މަޢުލޫމާތު ދެއްވާފައިވެއެވެ.
އޭސީސީން އިތުރަށް ފާހަގަކުރެއްވި ގޮތުގައި، މި އުސޫލުތައް އެކުލަވާލެވޭނީ ފޯރަމްގައި ބައިވެރިވާ ޤައުމުތަކުން ހޯދާ މަޢުލޫމާތުގެ މައްޗަށް ބިނާކޮށެވެ. މި ފޯރަމަކީ އިސްލާމީ ޤައުމުތަކުގެ ފަތުރުވެރިކަމުގެ ދާއިރާގައި ނަޒާހަތްތެރިކަން އިތުރުކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ