ރައްޔިތުންގެ މަޖިލީހުގެ ޖަލްސާތައް ހުއްޓުވުމަށް ޓަކައި ޒެޑް ފެކްޝަނުން މިހާރު ހިންގާ ހަރަކާތްތައް ސިފަކުރައްވަނީ ކުރީގެ ރައީސް މައުމޫން އަބްދުލްގައްޔޫމް އަޑީގައި ހުންނަވައިގެން ދައުލަތާ ދެކޮޅަށް ހިންގަވާ ޣައިރު ގާނޫނީ ބަޣާވާތެއްގެ ގޮތުގައި ކަމަށް އެމްޑީޕީގެ ނައިބު ރައީސް އަލްހާން ފަހުމީ ވިދާޅުވެއްޖެ އެވެ.
ދިޓީވީގެ ޕްރޮގްރާމެއްގައި ވާހަކަ ދައްކަވަމުން، ކުރިން ޑީއާރުޕީގެ ޕާލަމެންޓްރީ ގުރޫޕުގައި ހިމެނިވަޑައިގެންނެވި ފޭދޫ ދާއިރާގެ މެމްބަރު މިރޭ ވިދާޅުވީ މައުމޫންގެ 30 އަހަރުގެ ވެރިކަން ނިމިއްޖެ ކަމަށް އެމަނިކުފާނު ގަބޫލުކުރައްވަން ވެއްޖެ ކަމަށާއި "ޑީއާރުޕީ ވެސް އަތުން ބީވެގެން ހިނގައްޖެ"ކަން ގަބޫލުކުރައްވަން ވެއްޖެ ކަމަށެވެ.
މި ޕްރޮގްރާމްގައި ބައިވެރިވެ ވަޑައިގެންނެވި ޒެޑް ފެކްޝަންގެ ވައިކަރަދޫ ދާއިރާގެ މެމްބަރު އަލީ އާރިފު އެ ވާހަކަތައް ހުއްޓުވަން، މައުމޫނުގެ ވާހަކަތައް ދެއްކުމަކީ އެމްޑީޕީ އަށް ޖެހިފައި އޮތް ބައްޔެއް ކަމަށް ވިދާޅުވުމުން އަލްހާން ވިދާޅުވީ މައުމޫނަކީ "ގައުމަށް ޖެހިފައި އޮތް ބައްޔެއް" ކަމަށެވެ.
އަލްހާން ވިދާޅުވީ، ރޮކެޓް ސައިންސިސްޓުންނަށް ޒެޑް ފެކްޝަންގެ ބޭފުޅުން ބަދަލުވީ ނޫން ކަމަށާއި 30 އަހަރުން ނުވި ކަމެއް ދެން ނުވާނެ ކަމަށެވެ.
" 30 އަހަރު އިނަފް އޭ އިނގޭތޯ،" އަލްހާން ވިދާޅުވި އެވެ.
އޭނާ އަދި ވިދާޅުވީ މި ގައުމުގައި ފިތުނަ ފަސާދަ އުފައްދަން ދެން ޖާގަ ނުދެއްވާނެ ކަމަށެވެ. އަދި އޭނާ ވަނީ ޒެޑް ފެކްޝަނުގައި ހިމެނިވަޑައިގަންނަވާ ޑީއާރުޕީގެ މެމްބަރުން އެ ޕާޓީން ވަކިކުރުމަށް ވެސް ގޮވާލައްވައިފަ އެވެ.
އަލީ އާރިފަށް އިޝާރާތް ކުރައްވައި، އަލްހާން ވިދާޅުވީ "އަޅުގަނޑެކޭ އެއްގޮތަށް" އެ ބޭފުޅުން ވެސް ޑީއާރުޕީން ވަކިކުރަން ޖެހޭ ކަމަށެވެ. އޭނާ ވިދާޅުވީ ޑީއާރުޕީން އޭނާ ވަކިކުރީ ޕާޓީގެ ސިޔާސަތާ ދެކޮޅަށް މަސައްކަތް ކޮށްގެން ކަމަށް ބުނެ ގަވައިދާ ހިލާފަށް ކަމަށާއި އޭރު ޒައީމް ވެސް އޭނާގެ ދިފާއުގައި ނުކުންނަވާ ކަމަށެވެ. ނަމަވެސް "ޒައީމަށް އުމަރުގެ ދިފާއުގައި ނުކުމެވެވިއްޖެ" ކަމަށް އަލްހާން ވިދާޅުވި އެވެ.
އަލްހާން ވިދާޅުވީ ރައްޔިތުންގެ މަޖިލީހުގެ ޖަލްސާތައް ކުރިއަށް ގެންދިއުމަށް ޑީއާރުޕީ އާއި އެމްޑީޕީން މިހާރު ވާހަކަ ދައްކަމުން އަންނަ ކަމަށާއި މަޖިލީހުގެ ރައީސް އަބްދުﷲ ޝާހިދު ރާއްޖެ ވަޑައިގެންނެވިހާ އަވަހަކަށް އެކަން ހަމަޖެހިގެންދާނެ ކަމަށެވެ.