އޮމަދޫ އިންޖީނު ހަލާކުވެ އެރަށުގެ އަނދިރީގައި ތިބޭތާ ހަތަރު ދުވަސްވުމުން އެރަށުގެ ރައްޔިތުން ނުކުމެ އެރަށުގައި ހުރި ސަރުކާރުގެ އިދާރާތައް ބަންދުކޮށް މުޒާހަރާ ކުރަން ފަށައިފިއެވެ.
ސީއެންއެމަށް މައުލޫމާތު ދެއްވަމުން އޮމަދޫ ކައުންސިލުގެ ނައިބް ރައީސް މުހައްމަދު އިބްރާހީމު ވިދާޅުވީ މީގެ ހަތަރު ދުވަސް ކުރިން އިންޖީނު އެއްކޮށް ހަލާކުވެ ކަރަންޓު ކެނޑިފައިވާ އިރު، އެރަށަށް 24 ގަޑި އިރު ހަމައަށް ކަރަންޓު ނުލިބޭތާ އަހަރެއްހާ ދުވަސްވެފައިވާ ކަމަށެވެ.
"އެބަހުރި ކުޑަ ޖަނަރޭޓަރެއް، އެއިން ކޮންމެ ލައިނަކަށް ތިން ގަޑިއެއްހާއިރުދޭ. އެކަމަކު އެއީ މިހާރު އެއްވެސް އެއްޗަކަށް ނުވޭ،" މުހައްމަދު އިބްރާހީމު ވިދާޅުވިއެވެ.
އޭނާ ވިދާޅުވީ ކަރަންޓު މައްސަލާގައި އެރަށު ކައުންސިލުން އެތައް ފަހަރަކު ފެނަކައައި ވާހަކަ ދައްކާފައިވާ ކަމަށެވެ. އަދި އެގޮތަށް ހައްލު ނުލިބުމުން ސަރުކާރުގެ ކަމާ ބެހޭ އެހެނިހެން ފަރާތްތަކުގައި ވެސް ދަންނަވާފައިވާނެ ކަމަށް މުހައްމަދު އިބްރާހީމު ވިދާޅުވިއެވެ.
ކައުންސިލު އިދާރާއާއި ސިއްހީ މަރުކަޒާއި އިންޖީނުގެ ވެސް ބަންދުކޮށްފައިވާ އިރު، މިއަދު މެންދުރުފަހުން ފެށިގެން އެރަށު ސުކޫލަށް ކުދިން ފޮނުވުން ވެސް ބެލެނިވެރިން ހުއްޓާލާފައިވާ ކަމަށް މުހައްމަދު އިބްރާހީމު ވިދާޅުވިއެވެ. އަދި ރައްޔިތުން ނުކުމެ ކައުންސިލު އިދާރާ ކުރިމައްޗާއި އިދާރާ ހުންނަ ސަރަހައްދުގައި އިހުތިޖާޖު ކުރަމުންދާ ކަމަށް ވެސް އޭނާ ވިދާޅުވިއެވެ.