ރައީސުލްޖުމްހޫރިއްޔާ އަބްދުﷲ ޔާމިން އަބްދުލްގައްޔޫމްގެ ސަރުކާރު ވައްޓާލަން ގޮވާލާ ވާހަކަ ދެއްކި މައްސަލައިގައި ތިމަރަފުށީ ދާއިރާގެ މެމްބަރު މުހައްމަދު މުސްތަފާ މާދަމާ ފުލުސް އޮފީހަށް ހާޒިރުވާން އަންގައިފި އެވެ.
މުސްތަފާ ފުލުސް އޮފީހަށް ހާޒިރުވުމަށް އަންގާފައިވަނީ މާދަމާގެ ހަވީރު 16:00 އަށެވެ.
ފުލުހަށް ހާޒިރުވާން މީގެކުރިންވެސް މުސްތަފާއަށް ވަނީ ޗިޓު ފޮނުވާފައެވެ. ނަމަވެސް އެ ޗިޓު ވަނީ ބާތިލުކޮށްފައެވެ.
އޭނާ ފުލުސް އޮފީހަށް ހާޒިރުވުމަށް އަންގާފައިވަނީ މިދިޔަ މަހުގައި ރާއްޖެޓީވީގެ ޕްރޮގްރާމްއެއްގައި ދެެއްކެވި ވާހަކަތަކަކުން ރައީސް ޔާމީންގެ ވެރިކަން ވައްޓާލުމަށް އިޝާރާތްކުރުމާ ގުޅިގެން ކަމަށް މައުލޫމާތު ލިބެއެވެ.
ފުލުހުން ބުނީ އޭނާ ފުލުހުންގެ އޮފީހަށް ހާޒިރުވާން އަންގާފައިވަނީ ރައްޔިތުން ނިކުމެ، ރައީސް ޔާމީން މަގާމުން ބޭރުކޮށް، ގާނޫނީ ގޮތުން އުފެދިފައިވާ ސަރުކާރު ވައްޓާލުމަށާއި ޣައިރު ގާނޫނީ އަމަލުތަކެއް ހިންގުމަށް ރައްޔިތުންނަށް ހިތްވަރު ލިބޭ ގޮތަށް ވާހަކަ ދެއްކެވި ކަމަށް ތުހުމަތު ކުރެވޭތީ އެކަމުގެ އޯޑިއޯ ސާމްޕަލް ނަގާ އިތުރު ސުވާލުތަކެއް ކުރުމަށް ކަމަށެވެ.