ލަންޑަން (އޮކްޓޯބަރ 17) : ޔޫރަޕްގެ ޤައުމުތަކަށް ކުރިމަތިވެފައިވާ މާލީ އަދި އިޤްތިސާދި މައްސަލަތަކަކީ ވަރަށް ބޮޑު މައްސަލަ އެއްކަމަށާއި މިކަމުގެ ސަބަބުން ޔޫރަޕްގެ އިއްތިޙާދު ރޫޅިގެންވެސް ހިނގައިދާނެ ކަމަށް މަޝްހޫރު ބިލިޔަނަރު ޖޯޖް ސޯރޮސް ވިދާޅުވެއްޖެ އެވެ.
އޭނާ ވިދާޅުވީ ޔޫރަޕްގެ އިއްތިޙާދުގެ ފައިސާ ކަމަށްވާ ޔޫރޯގެ މައްސަލަ ނުވަތަ ޔޫރޯ ކްރައިސިސް އަކީ ބޮޑު މައްސަލައެއް ކަމަށާއި ސްޕޭން އާއި ގްރީސް ފަދަ ޤައުމުތަކަށް ކުރިމަތިވެފައިވާ ޤައުމީ ދަރަނީގެ މައްސަލައަކީވެސް އެޤައުމުތައް ރޫޅިގެން ހިނގައިދާނެ ސަބަބެއް ކަމަށެވެ. ސޯރޮސް ވިދާޅުވީ ޔޫރޯގެ މައްސަލައަށް އޮތް ވަގުތީ ޙައްލެއްކަމަށް ފެންނަނީ ޔޫރަޕްގެ އެންމެ ބޮޑު އިޤްތިސާދު ކަމަށްވާ ޖަރުމަން ޔޫރޯ ޒޯނުން ވަކިވުން ކަމަށެވެ. ދެން އޮތް ޙައްލަކީ ޔޫރޯ ޒޯންގެ ޤައުމުތައް ޒިންމާވާގޮތަށް ގުޅިފައިވާ ޓީ ބިލް ވިއްކުން ކަމަށް އޭނާ ވިދާޅުވި އެވެ.
ރޮއިޓާސް އަށް ދެއްވި އެ އިންޓަވިއުގައި އޭނާ ވިދާޅުވީ ޔޫރޯ ކްރައިސިސް އަކީ ޔޫރަޕްގެ އިއްތިޙާދުން އަމިއްލައަށް އުފެއްދި މައްސަލައެއް ކަމަށެވެ. އަދި ސްޕޭން އާއި ގްރީސް ފަދަ ޤައުމުތަކަށް ކުރިމަތިވެފައިވާ ޤައުމީ ދަރަނީގެ މައްސަލައަކީވެސް އެޤައުމުތަކުގެ އިހްމާލް ކަމަށް ސޯރޮސް ވިދާޅުވި އެވެ. ޔޫރޯ ޒޯންގެ ޤައުމުތަކަށް ކުރިމަތިވެފައިވާ ޔޫރޯގެ މައްސަލަ ޙައްލުކުރުމަށް އެޤައުމުތަކުން މިހާރު ބަރޯސާ ކުރަނީ ޔޫރަޕްގެ އެންމެ ބޮޑު އިޤްތިސާދު ކަމަށްވާ ޖަރުމަނަށެވެ. ނަމަވެސް މިމައްސަލާގައި ޖަރުމަނު އެކަނި ޒިންމާ އުފުލަންޖެހޭ ގޮތަށް ފިޔަވަޅު އެޅުމަށް އެ ގައުމުދަނީ ފަސްޖެހެމުންނެވެ.
ޔޫރަޕަށް ކުރިމަތިވެފައިވާ މާލީ އަދި އިޤްތިސާދި މައްސަލަތަކުގެ ޙަޤީޤީ ނުރައްކަލަކީ ޢާންމުންގެ ދިރިއުޅުމުގެ ފެންވަރު ދަށްވެ ދިގު މުއްދަތަކަށް އިޤްތިސާދީ ތަދު މަޑުކަމެއްގެ ތެރޭގައި ޔޫރަޕްގެ ޤައުމުތައް އުޅެންޖެހުން ކަމަށް ސޯރޮސް ވިދާޅުވި އެވެ. (ރޮއިޓާސް)