މިހާތަނަށް ރައްޔިތުންގެ މަޖިލީހުގެ 14 މެމްބަރަކު ޕްރޮގްރެސިވް ޕާޓީ އޮފް މޯލްޑިވްސް )ޕީޕީއެމް(އާ ގުޅިވަޑައިގެންފި ކަމަށާއި މަދުވެގެން 20 މެމްބަރުން އެ ޕާޓީއާ ގުޅޭނެ ކަމަށް ޕީޕީއެމް އިން ބުނެފި އެވެ.
ޕީޕީއެމްގެ ވަގުތީ އޮފީހުގައި އިއްޔެ ބޭއްވި ނިއުސް ކޮންފަރެންސެއްގައި އެ ޕާޓީގެ ވަގުތީ ތަރުޖަމާނު އަދި މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހުލޫފު ވިދާޅުވީ މަޖިލީހުގެ މި އަހަރުގެ އާ ދައުރު ފެށެންވާ އިރަށް އެ ޕާޓީ އަށް ނިސްބަތްވާ މަޖިލީހުގެ މެމްބަރުންގެ އަދަދު އިތުރުވާނެ ކަމަށެވެ.
މަހުލޫފު ވިދާޅުވީ ބައެއް މެމްބަރުން އެ ޕާޓީ އަށް ސޮއިނުކުރައްވާ ތިއްބެވީ، ސަލާމަތީ ހިދުމަތްތަކާ ބެހޭ ރައްޔިތުންގެ މަޖިލީހުގެ ކޮމެޓީ ނުވަތަ 241 ކޮމެޓީން މެމްބަރުންގެ ގޮނޑި ގެއްލޭނެތީ ކަމަށެވެ. އެ ކޮމިޓީގައި މަޖިލީހުގައި ތަމްސީލުކުރާ ހުރިހާ ސިޔާސީ ޕާޓީތަކުން މެމްބަރުން ހިމެނެއެވެ.
މަހުލޫފު ވިދާޅުވީ މިހާތަނަށް ޕީޕީއެމަށް ސޮއިކުރައްވާފައިވާ މަޖިލީހުގެ މެމްބަރުންގެ ތެރޭގައި އޭނާގެ އިތުރުން ހިމެނިވަޑައިގަންނަވަނީ ގެމަނަފުށީ ދާއިރާގެ މެމްބަރު އަހްމަދު އިލްހާމާއި ވިލިމާފަންނު ދާއިރާގެ މެމްބަރު އަހްމަދު ނިހާނާއި ވައިކަރަދޫ ދާއިރާގެ މެމްބަރު އަލީ އާރިފާއި އުނގޫފާރު ދާއިރާގެ މެމްބަރު ޑރ. އަފްރާޝީމް އަލީ އާއި އިނގުރައިދާ ދާއިރާގެ މެމްބަރު ހަމްދޫން ހަމީދާއި މުލަކު ދާއިރާގެ މެމްބަރު އަބްދުﷲ ޔާމީނާއި ފުއައްމުލަކު އުތުރު ދާއިރާގެ މެމްބަރު މުހައްމަދު ރަފީގާއި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އާއި އިސްދޫ ދާއިރާގެ މެމްބަރު އަހްމަދު ރަޝީދާއި ގަމު ދާއިރާގެ މެމްބަރު ޔޫސުފް އަބްދުލްޣަފޫރާއި މާވަށު ދާއިރާގެ މެމްބަރު އަބްދުލް އަޒީޒް ޖަމާލު އަބޫބަކުރާއި ނިލަންދޫ ދާއިރާގެ މެމްބަރު އަބްދުލް މުހްސިން ހަމީދާއި މިއަދު އެޕާޓީއާ ގުޅިވަޑައިގެންނެވި އޭދަފުށީ ދާއިރާގެ މެމްބަރު ރެޑްވޭވް އަހްމަދު ސަލީމު ކަމަށެވެ.
ޕީޕީއެމް ރަޖިސްޓްރީކުރުމަށް މިއަދު އިލެކްޝަންސް ކޮމިޝަނަށް ހުށަހަޅޭނެ ކަމަށް އުއްމީދުކުރައްވާ ކަމަށާއި ރަޖިސްޓްރީކުރަން ހުށަހެޅުން ލަސްވަނީ ފޯމްތައް ހުށަހެޅުމުގެ ކުރިން ނިންމަންޖެހޭ އިދާރީ ކަންކަން ގިނަވުމުން ކަމަށް މަހުލޫފު ވިދާޅުވި އެވެ. އަދި ޕީޕީއެމްއަކީ ރާއްޖޭގައި އެންމެ އަވަހަށް ރަޖިސްޓްރީކުރެވޭ ޕާޓީއެއްގެ ރިކޯޑު ހަދާނެ ކަމަށް ވެސް އޭނާ ވިދާޅުވި އެވެ.