އިންޑިޔާގެ ހައިދަރުއާބާދުގައި ބޭއްވުމަށް ހަމަޖެހިފައިވާ އިންޑިޔާ – އޭޝިޔާ ބިޒްނަސް ކޮންކްލޭވް ގައި ބައިވެރިވުމުގެ ފުރުސަތު ދިވެހި ވިޔަފާރިތަކަށް ހުޅުވާލައިފިއެވެ.
މި ބޮޑު ބައްދަލުވުން ބޭއްވުމަށް ތާވަލުކުރެވިފައިވަނީ  ޖުލައި 31 އިން އޯގަސްޓް 1 ގެ ނިޔަލަށެވެ.
މި ބިޒްނަސް ކޮންކްލޭވް އަކީ އޭޝިޔާ ސަރަހައްދުގެ 20 އަށް ވުރެ ގިނަ ގައުމުގެ ވިޔަފާރިވެރިންނާއި، ސިނާއީ އިސްވެރިން އަދި ސިޔާސަތު ކަނޑައަޅާ ފަރާތްތައް އެއްތަނަކުން ބައްދަލުވާނެ ބައިނަލްއަގުވާމީ މުހިންމު ޕްލެޓްފޯމެކެވެ. މިއީ ސަރަހައްދީ ވިޔަފާރީގެ ގުޅުންތައް ބަދަހިކުރުމަށް ލިބޭ ރަނގަޅު ފުރުސަތެކެވެ.
މި ބައްދަލުވުމުގައި ބައިވެރިވާ ދިވެހި ވިޔަފާރިތަކަށް ބައިނަލްއަގުވާމީ ފެންވަރުގައި ނެޓްވޯކް ކުރުމުގެ ފުރުސަތު ލިބިގެންދާނެއެވެ. މީގެ އިތުރުން، އާ އިންވެސްޓްމަންޓްތައް ހޯދުމާއި، ބޭރުގެ ކުންފުނިތަކާއެކު ޖޮއިންޓް ވެންޗަރތައް އުފެއްދުމަށް ބޭނުންވާ މަގުތައް މި ކޮންކްލޭވްގެ ތެރެއިން ފަހިވެގެންދާނެ ކަމަށް ބެލެވެއެވެ.
ޚާއްސަގޮތެއްގައި ފަތުރުވެރިކަން، އިއާދަކުރަނިވި ހަކަތަ، ސިއްހީ ދާއިރާ އަދި ތައުލީމީ ދާއިރާ ފަދަ ރާއްޖެއަށް މުހިންމު ދާއިރާތަކުން ސްޓްރެޓެޖިކް ޕާޓްނަރޝިޕްތައް ބިނާކުރުމުގެ ފުރުސަތު ބައިވެރިންނަށް ލިބޭނެއެވެ. މިއީ މި ދާއިރާތަކުން ދިވެހި ވިޔަފާރިތައް ފުޅާކުރުމަށް ލިބޭނެ ބޮޑު ކުރިއެރުމެކެވެ.
މި ކޮންކްލޭވްގައި ބައިވެރިވާން ޝައުގުވެރިވާ ދިވެހި ވިޔަފާރިތަކުން، ކަނޑައެޅިފައިވާ ގޫގުލް ފޯމް މެދުވެރިކޮށް ރަޖިސްޓްރީ ކުރުމުގެ ފުރުސަތު މިހާރު ވަނީ ހުޅުވާލެވިފައެވެ.