ބިޑަށް އާންމުކޮށް ހުޅުވާނުލައި އަމިއްލަ ކުންފުނިތަކަށް މަޝްރޫއުތައް ހަވާލުކުރުމަކީ މިހާތަނަށް ރާއްޖޭގައި ހިންގާ އެންމެ ބޮޑު ކޮރަޕްޝަން ކަމަށާއި އެމްޑީޕީ ވެރިކަމެއްގައި އެކަން ބަލާނެ ކަމަށް ކުރީގެ ފައިނޭންސް މިނިސްޓަރު އިބްރާހިމް އަމީރު މިއަދު ވިދާޅުވެއްޖެ އެވެ.
ވީ ކިހިނެއް؟ - އުމްރާނީ ތަރައްގީއާ ގުޅުންހުރި ނުވަ ދާއިރާއަކުން މަޝްރޫއުތައް ހިންގުމަށް 206 އެއްބަސްވުމެއްގައި އަމިއްލަ ކުންފުނިތަކާ އެކު ސަރުކާރުން މިއަދު ވަނީ ސޮއިކޮށްފަ އެވެ. އާންމުކޮށް އިއުލާން ނުކޮށް، ކޮންޓްރެކްޓަ ފައިނޭންސްގެ އުސޫލުން މި މަޝްރޫއުތައް ހަވާލުކުރީ 53 އަމިއްލަ ކުންފުންޏަކާ އެެވެ.
ސަރުކާރުގެ ބައެއް މަޝްރޫއުތައް ބިޑަށް ހުޅުވާނުލައި ޕްރޮޕޯސަލް ހުށަހެޅޭ ގޮތަށް މާލިއްޔަތު ގަވައިދު އިސްލާހުކުރީ މިދިޔަ މަހު އެވެ.
ބުނީ ކީކޭ؟ - އެމްޑީޕީގެ އިގްތިސާދީ ކޮމިޓީން އެ ޕާޓީގެ އޮފީހުގައި މިއަދު ބޭއްވި ބައްދަލުވުމުގައި އެ ކޮމިޓީގެ މުގައްރިރު އަމީރު ވިދާޅުވީ، ސަރުކާރުން ބޭނުން ބަޔަކަށް މަޝްރޫއުތައް ހަވާލުކުރުމުގެ ނިޔަތުގައި މާލިއްޔަތު ގަވައިދު ބަދަލު ނުކުރެވޭނެ ކަމަށާއި އެ ގަވާއިދު ބަދަލުކުރެވޭނީ ހުދޫދެއްގެ ތެރެއިން ކަމަށެވެ.
އެކަމަކީ ސީދާ ކޮރަޕްޝަނަށް މަގުފަހިކުރުމުގެ ގޮތުން ކުރާ ކަމެއްގެ ގޮތުގައި އަމީރު ސިފަކުރެއްވި އެވެ.
"ސަރުކާރުން ބީއެމްއެލްގެ ފައިސާ ބޭނުންކޮށްގެން ރައީސް މުއިއްޒުގެ ވައުދުތައް ފުއްދުމަށް މާލިއްޔަތު ގަވާއިދާއި ގާނޫނަށް ބެލުމެއްނެތި، ބޭނުންގޮތަކަށް ގަވާއިދުތައް ބަދަލުކޮށްގެން، ސަރުކާރުގެ އިސްވެރިން ބޭނުންވާހާ ބަޔަކަށް މަޝްރޫއުތައް ދީގެން، އެގޮތަށް އެކަން ކުރުމަކީ ޓެންޑާ އަދި ޕްރޮކިއުމަންޓް ހަމަތަކުގެ ބޭރުން ކުރަމުންދާ ކަމެއްކަން ފާހަގަކޮށްލަން. އެކަން އަޅުގަނޑުމެން ބަލައެއް ނުގަންނާނަން،" އަމީރު ވިދާޅުވި އެވެ.
އަމީރު ވިދާޅުވީ:
ބޭނުންހާ ބަޔަކަށް މަޝްރޫއުތައް ދޭން މާލިއްޔަތު ގަވާއިދު ބަދަލެއް ނުކުރެވޭނެ؛ މާލިއްޔަތު ގަވާއިދު ބަދަލުކުރެވޭނީ ވަކި ހުދޫދެއްގެ ތެރެއިން
މިއީ ބޭނުންވާ ބަޔަކަށް ބޭނުންވާ އަދަދެއް ޖަހާފަ ދެވޭ މަޝްރޫއުތަކެއް 
ބޭނުންވާ ބަޔަކަށް މަޝްރޫއުތައް އެދެނީ ސަރުކާރުން ސީދާ ކޮރަޕްޝަން ހިންގަން؛ އަދި މީގަ ބީއެމްއެލް އިން ފަންޑުކުރާތީ
އެކަން އެކުރަނީ ބީއެމްއެލް ވެސް ރިސްކަށް ހުށަހެޅޭ ގޮތަށް
ބޮޑު ރަސްމިޔާތެއް ބާއްވާފައި ކުންފުނިތަކަކާއި ހަވާލުކުރިޔަސް ކުރިއަށް އޮތް ދެ އަހަރު ތެރޭ އެކަން ކުރިއަށް ނުގެންދެވޭނެކަން ޔަގީން؛ އެ ކުންފުނިތަކަށް ދޭން ބޭނުންވާނެ ފައިސާއެއް ވެސް ނެތް
"އަޅުގަނޑުމެން [މިއަދު ސޮއިކުރި] ވަކިވަކި ކޮންމެ މަޝްރޫއެއް ވެސް ބަލާފައި، މިކަންކަން އަޅުގަނޑުމެން ތަހުގީގުކުރާނެކަން ބުނެލަން. ސަރުކާރު ވެސް އަދި ކޮންމެވެސް ދުވަހަކުން ބަދަލުވެގެންދާނެ. މިއަދު އެކުރެވޭ ކަމަކީ މިދިޔަ ހުރިހާ ސަރުކާރުތަކުގައި ވެސް މީގެ ކުރިން ރާއްޖޭގައި ދުވަހަކު ވެސް ނުކުރާވަރުގެ ބޮޑެތި ކޮރަޕްޝަން، މިއަދު އެ ހިންގަނީ ސީދާ ލައިވް ޓީވީގައި. މިކަންކަން ހުއްޓުވަން އޭސީސީ އަދި އޮޑިޓާ ޖެނަރަލް ނިދާފައި ނޯންނަން އަދި އެ މަސައްކަތް މިހާރުން މިހާރަށް ހުއްޓުވާލަން އަޅުގަނޑު ގޮވާލަން،" އަމީރު ވިދާޅުވި އެވެ.