އާއިލާއަކީ ކޮންމެ މުޖުތަމަޢެއްގެވެސް ބިންގަލެވެ. ދުޅަހެޔޮ، ހަމަޖެހޭ އަދި އުފާވެރި އާއިލާއެއް ބިނާކުރުމަކީ ވަރަށް ބޮޑު މަސްއޫލިއްޔަތެކެވެ. އާއިލާއެއް ފެށުމުގެ ކުރިން، ދެމީހުންގެ ދިރިއުޅުން ހަމަޖައްސައި، އުފާވެރި މާހައުލެއް ބިނާކުރުމަށްޓަކައި ބަލައިލަންޖެހޭ ގިނަ ކަންތައްތަކެއްވެއެވެ. މިކަންކަމަށް ސަމާލުކަންދީ، ރަނގަޅަށް ތައްޔާރުވުމަކީ ދިގުދެމިގެންދާ އުފާވެރި ގުޅުމެއްގެ އަސާސެވެ. ފުރަތަމަ ކަމަކަށް ބަލައިލަންޖެހޭނީ މާލީ ގޮތުން ތަނަވަސްކަމަށާއި އިޤްތިޞާދީ ހާލަތަށެވެ. ކޮންމެ އާއިލާއެއްގެވެސް އަސާސީ ބޭނުންތަކެއް ހުންނާނެއެވެ. ކެއުންބުއިމާއި، ހެދުންލުމާއި، ދިރިއުޅުމަށް ބޭނުންވާ ތަކެއްޗާއި، ތަޢުލީމާއި، ސިއްޙީ ޚިދުމަތްތަކަށް ހޭދަކުރަންޖެހެއެވެ. މި ބޭނުންތައް ފުއްދޭނެ މިންވަރަށް މާލީ ތަނަވަސްކަން ހުރެ، އިޤްތިޞާދީ ގޮތުން ދެމެހެއްޓެނިވި ހާލަތެއްގައި ހުރުމަކީ ވަރަށް މުހިންމު ކަމެކެވެ. މާލީ ދަތިކަން ކުރިމަތިވުމަކީ ގިނަ އާއިލާތަކުގައި މައްސަލަތައް އުފެދޭ އެއް ސަބަބެވެ. ދެވަނަ ކަމަކަށް ބަލައިލަންވީ ޝުޢޫރީ އަދި ނަފްސާނީ ތައްޔާރުވުމަށެވެ. އާއިލާއެއް ފެށުމަށްޓަކައި ދެމީހުންވެސް ޖިސްމާނީ ގޮތުންނާއި ނަފްސާނީ ގޮތުން ތަސައްރަފްފުދި ތައްޔާރުވެފައިވުމަކީ ވަރަށް މުހިންމު ކަމެކެވެ. އުފުލަންޖެހޭ މަސްއޫލިއްޔަތުތަކަށް ކެތްތެރިވެ، ދެމީހުންގެ ދެމެދުގައި ހަމަޖެހުން ގާއިމުކުރުމަށްޓަކައި އިހުސާސްތައް ދެނެގަތުމާއި، ތަފާތު ހާލަތްތަކުގައި ސަމާލުކަމާއެކު ޢަމަލުކުރެވޭނެ މިންވަރަށް ވިސްނުންތެރިވެފައި ހުރުމަކީ މުހިންމު ސިފައެކެވެ. ކުދިން ބަލައި ބޮޑުކުރުމަށްޓަކައި ލޯތްބާއި، ކެތްތެރިކަމާއި، ވަގުތު ހޭދަކުރުމުގެ ހިތްވަރު ހުރުންވެސް ހިމެނެއެވެ. ތިންވަނަ ކަމަކީ ދެމީހުންގެ ޢަޤީދާ، ވިސްނުން އަދި ޙަޔާތުގެ މަޤްޞަދުތައް އެއްގޮތްވެ އެއްވިސްނުމެއްގައިތިބުމެވެ. އިސްލާމީ ދިރިއުޅުމެއް އުޅެން ބޭނުންވާ ދެމީހުން އެކަކު އަނެކަކަށް ގުޅޭ އަދި ސީދާވާ، އެއް ޢަޤީދާއެއްގެ ނުވަތަ އެއް ވިސްނުމެއްގެ މަތީގައި ތިބުމަކީ އާއިލާގެ ހަމަޖެހުމަށްޓަކައި ވަރަށް އަސާސީ ކަމެކެވެ. ދެމީހުންގެ ޢިލްމީ ފެންވަރާއި، ވިސްނުމާއި، ޢަމަލުތައް ގާތްވުމަކީ ދުވަހީ ދިރިއުޅުމުގައި ފެންމަތިވާ ކޮންޖެހުންތަކުން އަރައިގަތުމަށް އެހީތެރިވެދޭނެ ކަމެކެވެ. އަދި ޙަޔާތުގެ ބޮޑެތި މަޤްޞަދުތައް ކަނޑައަޅައި، އެކަންކަމަށް އެއްބަސްވުމަކީ މުސްތަޤްބަލުގައި ހިނގާނެ ކަންކަމަށްޓަކައި ތައްޔާރުވުމެވެ. ހަތަރުވަނަ ކަމަކަށް ބަލައިލަންޖެހެނީ ގުޅުން ބަދަހިކުރުމަށާއި މުޢާމަލާތުކުރުމުގެ މުހިންމުކަމަށެވެ. އުފާވެރި އާއިލާއެއް ބިނާކުރުމަށްޓަކައި ދެމީހުންގެ ދެމެދުގައި ހާމަކަންބޮޑު ގުޅުމެއް އޮންނަންޖެހެއެވެ. ހިޔާލު ބަދަލުކުރުމާއި، ކަންކަމާ މަޝްވަރާކުރުމާއި، އެކަކު އަނެކަކުގެ އިޙްސާސްތަކަށް އިހްތިރާމުކުރުމަކީ މުހިންމު ސިފަތަކެކެވެ. މައްސަލަތައް ދިމާވުމުން އެކަންކަން ހައްލުކުރެވޭނެ ގޮތްތަކާއި، ކެތްތެރިކަމާއެކު އެކަކު އަނެކަކުގެ ބަސް އަޑުއެހުމަކީވެސް ވަރަށް މުހިންމު ކަމެކެވެ. ފަސްވަނަ ކަމަކީ ސިއްޙީ ދުޅަހެޔޮކަމެވެ. އާއިލާއެއް ފެށުމުގެ ކުރިން ދެމީހުންވެސް ޖިސްމާނީ އަދި ނަފްސާނީ ގޮތުން ދުޅަހެޔޮ ހާލަތެއްގައި ހުރުމަކީ ވަރަށް ބޭނުންތެރި ކަމެކެވެ. ސިއްޙީގޮތުން ނުރަނަގަޅު އާދައެއްހުރި ނަމަ އެކަމެއް ދޫކޮއްލާށެވެ. ޚާއްސަ ގޮތެއްގައި ކުދިން ލިބުމަށް ތައްޔާރުވާއިރު، ދެމީހުންގެ ސިއްޙަތު ހުރި ނެތްގޮތް ދެނެގަތުމަކީ ބަލިތަކުން ދުރުހެލިވުމަށާއި، ދުޅަހެޔޮ ކުދިން ބަލައިބޮޑުކުރުމަށް އެހީތެރިވެދޭނެ ކަމެކެވެ. ތިމާމެންގެ ދެލޯފުޅަށްޓަކައެވެ. އިސްލާމީ ނަޒަރަކުން ބަލާއިރު، ނިކާޙަކީ ދެމީހުންގެ ދެމެދުގައިވާ މާތް އަދި ބަރަކާތްތެރި ގުޅުމެކެވެ. މިއީ ހަމައެކަނި ދެމީހުން އެކުގައި އުޅޭ ގުޅުމެއް ނޫނެވެ. މިއީ މުޖުތަމަޢުގެ ހަމަޖެހުމަށާއި، އިސްލާމްދީން ކުރިއެރުވުމަށްޓަކައި ކުރެވޭ މުހިންމު މަސައްކަތެކެވެ. މިގޮތުން، ހެޔޮލަފާ އަނބިމީހާ ނުވަތަ ފިރިމީހާ އިޚްތިޔާރުކުރުމާއި، ދެމީހުންގެ ޙައްޤުތަކާއި ވާޖިބުތައް ދެނެގަނެ، އެކަންކަމަށް އަދާކުރުމަކީ އާއިލީ ދިރިއުޅުމުގައި އުފާވެރިކަން ގެނެސްދޭނެ ކަމެކެވެ. ކުދިން ލިބުމުން، އެކުދިންނަށް އިސްލާމީ ތަރުބިއްޔަތެއް ދީ، މުޖުތަމަޢަށް ބޭނުންވާ ހެޔޮލަފާ ބަޔަކަށް ހެދުމަކީ ދެމަފިރިންގެ އެންމެ ބޮޑު މަސްއޫލިއްޔަތެވެ. ވިސްނަންވީ ކަމަކީ އާއިލާއެއް ފެށުމަކީ ކުއްލިއަކަށް ކުރެވޭނެ ކަމެއް ނޫން ކަމުގައެވެ. މިއީ ރޭވުންތެރިކަމާއެކު، ދިގު ރާސްތާއަކަށް ވިސްނައި، ދެމަފިރިންގެ ދެމެދުގައި ވާހަކަ ދެކެވިގެން ފަށަންޖެހޭ މަސައްކަތެކެވެ. މި ފާހަގަ ކޮއްލެވުނީ މަދު މިންވަރެކެވެ. ނަމަވެސް މިދެންނެވި ކަންކަމަށް ސަމާލުކަން ދީގެން އާއިލާއެއް ފަށައިފިނަމަ، އެއީ އުފާވެރިކަމާއި ހިތްހަމަޖެހުން ލިބިގެންދާ، މުޖުތަމަޢަށް ހެޔޮގޮތްތައް ގެނެސްދޭނެ އާއިލާއަކަށް ވެގެންދާނެއެވެ.