އަތްމަތި ދަތިވެ، ރައްޔިތުން ވަރަށް ބޮޑަށް ފަގީރުވެއްޖެ ކަމަށް ވެލިދޫ ދައިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ. އައްބާސް އެކްސްގައި ކުރެއްވި ޕޯސްޓެއްގައި ވިދާޅުވީ  މިއަދު ފެނިގެން ދަނީ ގައުމުގެ އިގްތިސޯދު ދަތިވެ، އިންފްލޭޝަން މައްޗަށް ގޮސް، ރާއްޖޭގެ ގިނަ ރައްޔިތުންގެ ދިރިއުޅުން ވަރަށް ދަތިވެފައިވާ މަންޒަރު ކަމަށެވެ.އޭނަ ވިދާޅުވީ ޒަރޫރީ ހިދުމަތްތަކަށް ފައިސާ ނުލިބި، ގައުމުގެ ދަރަނި އިތުރު ވަމުންދާ މި ދަނޑިވަޅުގައި، ދުރު ރާސްތާ ސާފު ޕްލޭނެއް ނެތި ރައީސް ޑރ. މުހައްމަދު މުއިއްޒު ވަޑައިގަންނަވާ ކޮންމެ ރަށެއްގެ ރައްޔިތުން ކުރިފުޅުމަތީގައި އެތަކެއް ވައުދުތަކެއް ވަމުން ގެންދެވުމަކީ ދައުލަތަށް އިތުރު މާލީ ބުރައަކަށް ވެގެންދާނެ ކަމެއް ކަމަށެވެ.  "ޒަރޫރީ ބޭނުންތަކުގެ އަގު ދަށްނުކޮށް، ރައްޔިތުންގެ އަގާއި އަތާ ދިމާނުވާ ހާލަތުގައި ރައްޔިތުންގެ އޮރިޔާން ނިވާނުވާ ހާލަތުގައި ބައިތިއްބައިގެން ރައީސް ޑރ. މުއިއްޒު ވަޑައިގަންނަވާ ކޮންމެ ރަށެއްގައި ވައުދުތަކެއްވެފައި ދުނިޔޭގެ ޤައުމުތަކުގައި ސަލާންޖަހައިގެން ރައްޔިތުންގެ ނަމުގައި ބޮޑެތި ދަރަނި ނަގައިގެން އެއްވެސް އިމާރާތެއް އެޅުމުގެ ބޭނުމެއް ނެތް." އައްބާސް ވިދާޅުވި އެވެ. ރާއްޖޭގެ އިގްތިސޯދީ ކަންބޮޑުވުން އޮތް ކަމަށް އައްބާސް ވިދާޅުވި ނަމަވެސް ސަރުކާރަށް ތާއީދު ކުރާ މެންބަރުން ބުނަމުން އަންނަނީ އަންނަ އަހަރުގެ ދަރަނިތައް ނުދެއްކޭނެ ކަމުގެ ޝައްކުތައް ފިލައިފި ކަމަށެވެ.