ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާއިން ދިން މެޑިކަލް ވެލްފެއަރގެ ޚިދުމަތްތައް އާސަންދަ ކުންފުނީގެ ދަށަށް ބަދަލު ކުރުމަށް ނިންމައިފިއެވެ. މި ބަދަލު ތަންފީޒުވާން ފަށާނީ، މާދަމާއިން ފެށިގެންނެވެ.
ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާއިން ދެމުން ދިޔަ މެޑިކަލް ވެލްފެއަރގެ ޚިދުމަތްތައް އާސަންދަ ކުންފުނީގެ ދަށަށް ބަދަލު ކުރުމަށް ސަރުކާރުން ނިންމާފައިވަނީ، މިހާރު ޞިއްޙީ ނިޒާމުގެ އެހީގެ ޚިދުމަތް ދެ ތަނަކުންދޭތީ ރައްޔިތުންނަށް ދިމާވާ ދަތިތަކަށް ޙައްލެއް ގެނައުމަށެވެ. މިއާއެކު ޖޫން މަހުގެ 1 ވަނަ ދުވަހުން ފެށިގެން ބޭސްފަރުވާގެ އެހީއަށް އެންސްޕާއިން ދެމުން ދިޔަ ފަސް ޚިދުމަތެއް އާސަންދަ ކުންފުނީގެ ދަށަށް ބަދަލުވާނެއެވެ.
1. ބޭސްފަރުވާއާ ގުޅޭ ކަންކަމުގައި ރައްޔިތުންނަށް ދޭ ޚިދުމަތްތައް
2. ޓެސްޓުތައް ހެދުމާއި، ޚާއްސަ މެޑިކަލް ޑިވައިސްއާ ގުޅޭ ޚިދުމަތްތައް
3. ރާއްޖެއިން ބޭރުގައި ދިރިއުޅޭ ފަރާތްތަކަށް ދޭ ސިއްޚީ ޚިދުމަތްތައް
4. ރިފަރަލް އަދި އެމަޖެންސީ ބަލި މީހުންނަށް ދޭ ޚިދުމަތްތައް
5. ޚާއްސަ ހާލަތްތަކުގައި ދޭ ޚިދުމަތްތައް (ތެލެސީމިއާ އަދި ބޯންމެރޯ ޓްރާންސްޕްލާންޓަށް ދާ މީހުންނަށް ފޮލޯ އަޕް ހެދުމާއި، އަމިއްލަ ބޭސް ފަރުވާއަށް ބޭރަށް ދާ މީހުންނަށް ދޭ އެހީތެރިކަން)
މި ބަދަލާއި ގުޅިގެން ޞިއްޙަތާއި ޢާއިލާއާއި އިޖުތިމާޢީ އެހީއާއި ބެހޭ ވަޒީރު ޤީލާ ޢަލީ ވިދާޅުވީ، މިބަދަލާއެކު ބޭސްފަރުވާގެ އެކި ކަންކަމުގައި ރައްޔިތުންނަށް ބޭނުންވާ އެހީތެރިކަން އެއް އެޕްލިކޭޝަނެއްގެ ތެރެއިން ލިބޭ ގޮތަށް ބަދަލުވެގެން ދާނެ ކަމަށެވެ. އަދި ސަރުކާރުން ފޯރުކޮށްދޭ އެހީތެރިކަން ރައްޔިތުންނަށް އެއް ފުރާޅެއްގެ ދަށުން ލިބިގެންދާނެ ކަމަށް ވަޒީރު ވިދާޅުވިއެވެ.
"މިހާރު ރައްޔިތުންނަށް އެންމެ ދަތިވާ ކަމަކީ އެހީތެރިކަމަށް ބަލާއިރު އާސަންދަ ކުންފުނިން މި އެދެވެނީ ވަކި ކަންކަމަކަށް. އެންސްޕާއިން އިތުރު ކަންކަމަށް އެހީތެރިކަމަށް އެދެމުން މިދަނީ. އެހެންވީމަ މިގޮތަށް ބަދަލުވުން އެއްތަނަކުން މީހުންގެ މައުލޫމާތުވެސް ބެލެހެއްޓިގެންދާނެ އަދި ފޯރުކޮށްދެވޭ އެހީތެރިކަން މާ ސާފުކޮށް އޮޅުން ފިލައިގެންދާނެ. އަޅުގަނޑު އުއްމީދުކުރަނީ، އާންމު ރައްޔިތުންނަށް މި ގެނައި ބަދަލަކީ ވަރަށް ބޮޑު ފަސޭހައަކަށް ވެގެންދާނެ ކަމަށް." ވަޒީރު ޤީލާ ޢަލީ ވިދާޅުވިއެވެ.
އެންސްޕާގެ ދަށުން ދެމުން އައި މެޑިކަލް ވެލްފެއަރ ޚިދުމަތްތައް އާސަންދަ ސްކީމުގެ ދަށަށް ބަދަލުވުމާއެކު މިހާރު އެންސްޕާއަށް އެހީތެރިކަމަށް އެދި ހުށަހަޅާފައިވާ ފަރާތްތަކަށް ޖޫން 1 އިން ފެށިގެން ދެން ޖަވާބު ދެމުންދާނީ އާސަންދަ ކުންފުނިން ކަމަށް ސިއްޙީ ވުޒާރާއިން ވިދާޅުވިއެވެ. އަދި ދެން މި ޚިދުމަތްތަކާއި ގުޅޭ މައުލޫމާތުވެސް ދޭނީ އާސަންދަ ކުންފުނީގެ ފަރާތުން ކަމަށް ސިއްހީ ވުޒާރާއިން ވިދާޅުވިއެވެ.