2025 ވަނަ އަހަރުގެ ޖެނުއަރީ 1 ވަނަ ދުވަހުގެ ނިޔަލަށް ދުނިޔޭގެ އާބާދީ 8,092,034,511 އަށް އަރައިފި ކަމަށް އެމެރިކާގެ ސެންސަސް ބިއުރޯއިން އަންދާޒާކޮށްފިއެވެ.
2025 ވަނަ އަހަރުގެ ޖެނުއަރީ މަހު، ކޮންމެ ސިކުންތަކު ދުނިޔޭގައި 4 ކުދިން އުފަންވާއިރު، 2 މީހުން މަރުވާނެ ކަމަށް ސެންސަސް ބިއުރޯއިން ލަފާކުރެއެވެ.
އެމެރިކާގެ އާބާދީ 2025 ވަނަ އަހަރުގެ (އައު އަހަރުގެ) ފުރަތަމަ ދުވަހު 341 މިލިއަނަށް އަރާނެ ކަމަށް ދި އިކޮނޮމިކް ޓައިމްސްއިން ލަފާކޮށްފައިވެއެވެ. މިއީ 2024 ވަނަ އަހަރު 2.6 މިލިއަން މީހުން އިތުރުވުމެކެވެ. އަދި 2020 ގެ އަހަރުތަކުގެ ފެށުމާ އަޅާބަލާއިރު 2.9 އިންސައްތައިގެ ކުރިއެރުމެކެވެ.
އޭބީސީ ނިއުސްއިން ރިޕޯޓުކޮށްފައިވާ ގޮތުގައި، 2025 ވަނަ އަހަރުގެ ޖެނުއަރީ މަހު އެމެރިކާގައި ކޮންމެ 9 ސިކުންތަކުން ކުއްޖަކު އުފަންވާނެ ކަމަށް ލަފާކުރެވެއެވެ. އަދި ކޮންމެ 9.4 ސިކުންތަކުން މީހަކު މަރުވާނެކަމަށްވެސް ވަނީ ލަފާކޮށްފައެވެ.
މީގެ އިތުރުން، ބޭރު ޤައުމުތަކުން އެމެރިކާއަށް ހިޖުރަކުރާ މީހުންގެ ސަބަބުން ކޮންމެ 23.2 ސިކުންތަކުން އެމެރިކާގެ އާބާދީއަށް މީހަކު އިތުރުވާނެއެވެ.
ދި އިކޮނޮމިކް ޓައިމްސްގެ ރިޕޯޓުގައިވާ ގޮތުން، އުފަންވުމާއި މަރުވުމާއި ހިޖުރަކުރުން އެއްކޮށްލުމުން، އެމެރިކާގެ އާބާދީއަށް ކޮންމެ 21.2 ސިކުންތަކުން އެކަކު އިތުރުވާނެ ކަމަށް ލަފާކުރެވެއެވެ.