ރައީސް މުހައްމަދު މުއިއްޒުއާ އެކު އޮތް ކައުންސިލެއް ކޮންމެހެން އިންތިހާބުކުރަން ޖެހޭ ކަމަށާއި ނޫނީ އޭގެ ގެއްލުން ހުރިހާ ރައްޔިތުންނަށް ކުރާނެ ކަމަށް އެ މަނިކުފާނުގެ އަނބިކަނބަލުން ސާޖިދާ މުހައްމަދު ރޭ ވިދާޅުވެއްޖެ އެވެ.
ވީކިހިނެއް؟ - މާލޭގެ މޭޔަރު ކަމަށް ވާދަކުރައްވާ ޕީއެންސީގެ ކެންޑިޑޭޓް އަދި ކުރީގެ ޑިފެންސް މިނިސްޓަރު މޫސާ އަލީ ޖަލީލާއި މާލެ ސިޓީ ކައުންސިލާއި އަންހެނުންގެ ކޮމިޓީގެ މާފަންނު ދެކުނު ދާއިރާގެ ކެންޑިޑޭޓުންގެ ކެމްޕެއިން ހަރަކާތުގައި ރޭ ސާޖިދާ ވާހަކަ ދެއްކެވި އެވެ.
މާފަންނު ދެކުނު ދާއިރާއަކީ ރައީސް މުއިއްޒާއި އެ މަނިކުފާނުގެ އާއިލާ ނިސްބަތްވާ ދާއިރާ އެވެ.
ބުނީ ކީކޭ؟ - މާލޭގެ މޭޔަރު ކަމުގައި ރައީސް ހުންނެވި ދެ އަހަރާއި ވެރިކަމުގައި މިދިޔަ ދެ އަހަރު ދުވަހު ވެސް ރައީސް ގެންދަވަނީ ރައްޔިތުންނަށް ވަރަށް ބުރަކޮށް މަސައްކަތްކުރައްވަމުން ކަމަށް ސާޖިދާ ވިދާޅުވި އެވެ.
"ރައްޔިތުންނަށްޓަކައި މި ވަރަށް މަސައްކަތްކުރާ ވެރިއަކާ އެކު ހުންނަ ކައުންސިލަރުން، ޑަބްލިއުޑީސީ، މޭޔަރެއް އިންތިހާބުކުރުމަކީ ކޮންމެހެން ކުރަން ޖެހޭ ކަމެއް،" ފަސްޓް ލޭޑީ ސާޖިދާ ވިދާޅުވި އެވެ.
ވޭޕް މަނާކުރުމާއި ވަކި ޖީލަކުން ފެށިގެން ދުންފަތް މަަނާކުރުން ފަދަ ބައެއް ނިންމުންތަކާއި ދީނީ ގޮތުން ސަރުކާރުން އަޅަމުންދާ ބައެއް ފަަދަ ނިންމުންތަކަށް އިޝާރާތްކުރައްވަމުން ސާޖިދާ ވިދާޅުވީ އެއީ ރަނގަޅު އުސޫލުތަކެއްކަން ގިނަ ބަޔަކު ދެކެނޭ ކަމަށް ގަބޫލުކުރައްވާ ކަމަށެވެ.
"އިޖުތިމާއީ ގޮންޖެހުންތައް ހުރި ގައުމެއްގައި ވަރަށް އުނދަގޫ ނިންމުންތަކެއް ނިންމަވަމުން ރައީސުލްޖުމްހޫރިއްޔާ ވަޑައިގަންނަވާއިރު އެ ސަރުކާރަކަށް އެއްބާރުލުން ނުދޭ ކައުންސިލެއް ހޮވައިފި ނަމަ އޭގެ ގެއްލުން އަޅުގަނޑުމެން ހުރިހާ ރައްޔިތުންނަށް ވެސް ކުރާނެ،" އެކަމަނާ ވިދާޅުވި އެވެ.
ސަރުކާރާ ދެކޮޅުވެރި ވުމުގެ ވިސްނުމުގައި ތިބި ބަޔަކު ކައުންސިލަށް ހޮވުމުން، ރައްޔިތުންނަށް ހިދުމަތްކުރާ ސަރުކާރަކާ އެކު މަސައްކަތްނުކުރާ ނަމަ ރައްޔިތުންނަށް އެއިން ވާނެ އެއްވެސް ފައިދާއެއް ނެތް ކަމަށް ދެބަސްވާނެ ބަޔަކު ނުތިބޭނެ ކަމަށް ވެސް ސާޖިދާ ވިދާޅުވި އެވެ.