މާލޭގެ އިމާރާތެއްގެ ކުޑަދޮރަކުން ކުޑަކުއްޖަކު ކިރިޔާ ނުވެއްޓި ސަލާމަތްވެއްޖެ އެވެ.
ވީކިހިނެއް؟ - ހެންވޭރުކޮޅު، ބުރެވި މަގުގައި ހުރި އިިމާރާތެއްގެ ފަސްވަނަ ފަންގިފިލާއިން ކުޑަކުއްޖަކު ކުޑަދޮރެއް ކައިރީ އުޅޭ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ.
ތަފްސީލް - ވީޑިއޯއިން ފެންނަނީ ކުޑަކުއްޖާ ފުރަތަމަ ކުޑަދޮރުގެ ދާރަ މަތީގައި އިށީނދެލައިގެން ފިރުކޭ މަންޒަރެވެ. 
ދެން ދެ ފައި ކުޑަދޮރުން ބޭރަށްލައި ތިރިކޮށްލި އެވެ. ދެ އަތް ދާރަ މަތީގައި ބާއްވައިގެން، ބޭރަށް ފައި ތިރިއަށްވާ ގޮތަށް ދަމާލައި އެލިގަނެގެން އިރުކޮޅެއް ވަންދެން އެ ކުއްޖާ އޮތެވެ.
އޭރު މަގުމަތީގައި ތިބި މީހުން އެ މަންޒަރުގެ ވީޑިއޯ ފޯނުން ނަގާ މަންޒަރާއި ބައެއް މީހުން ހަޅޭއްލަވާ މަންޒަރު ވެސް ވީޑިއޯއިން ފެނެ އެވެ.
އޭގެ ފަހުގައި ކުޑަދޮރުން ގޭގެތެރެއަށް ކުޑަކުއްޖާ ދަމައިގަންނަ ތަން ފެނެ އެވެ.
ފާހަގަކޮށްލެވޭ - މާލޭގެ އުސް އިމާރާތްތަކުގެ ބެލްކަނީންނާއި ކުޑަދޮރު ކައިރީ، ބޮޑު މީހަކު ނެތި މިހެން ކުޑަކުދިން އުޅޭ މަންޒަރު ފެންނަ ވީޑިއޯ ދޭތެރެއަކުން ދައުރުވެ އެވެ.