އީރާނުގެ ފޮރިން މިނިސްޓަރު އައްބާސް އަރާޤްޗީ ބުދަ ދުވަހު ވިދާޅުވެފައިވަނީ އީރާނުގެ ޔުރޭނިއަމް ފައްކާ ކުރުމުގެ ހައްގަކީ "ވާހަކަދެއްކޭނެ ކަމެއް ނޫން" ކަމަށެވެ. މިހެން ވިދާޅުވެފައި މިވަނީ ހޮނިހިރު ދުވަހު ރޯމްގައި އެމެރިކާއާއެކު ބޭއްވުމަށް ހަމަޖެހިފައިވާ ނިއުކްލިއަ މަޝްވަރާތަކުގެ ދެވަނަ ބުރުގެ ކުރިންނެވެ. މި މަޝްވަރާތަކަކީ މިދިޔަ ހަފްތާގައި އޮމާންގައި ބޭއްވުނު ފުރަތަމަ ބުރުގެ ފަހުން ބޭއްވޭ ބައްދަލުވުމެކެވެ.
އަރާގްޗީގެ ބަސްފުޅަކީ އެމެރިކާގެ މަންދޫބު ސްޓީވް ވިޓްކޮފް އީރާނުން ޔުރޭނިއަމް އެންރިޗްކުރުމުގެ ޕްރޮގްރާމް "ހުއްޓާލައި ނައްތާލަން" ޖެހޭނެ ކަމަށް ވިދާޅުވުމުން ދެއްވާފައިވާ ޖަވާބެކެވެ.
"އަޅުގަނޑުމެން އީރާނުގެ އެންރިޗްމަންޓާ ގުޅޭގޮތުން ހުރެދާނެ ކަންބޮޑުވުންތަކާ ގުޅޭގޮތުން އިތުބާރު ބިނާކުރަން ތައްޔާރަށް މިތިބީ، އެހެންނަމަވެސް އެންރިޗްމަންޓްގެ އުސޫލަކީ ވާހަކަދެއްކޭނެ ކަމެއް ނޫން،" އީރާނުގެ ސްޓޭޓް މީޑިއާ އިން އަރާގްޗީ އާ ހަވާލާދީ ބުނެފައިވެ އެވެ.
މަޝްވަރާތަކުގެ ދެވަނަ ބުރު ރޯމަށް ބަދަލުކުރެވިއްޖެ
ކުރިއަށް އޮތް ބައްދަލުވުން ފުރަތަމަ ބުރު ބޭއްވުނު އޮމާނުގެ މަސްކަޓްގައި ބޭއްވޭނެ ކަމަށް އުންމީދުކުރެވުނެވެ. އެހެންނަމަވެސް، އީރާނުގެ ދައުލަތުގެ ޓެލެވިޒަނުން ބުދަ ދުވަހު ކަށަވަރުކޮށްދިނީ ބައްދަލުވުން އިޓަލީގެ ވެރިރަށަށް ބަދަލުކުރެވިފައިވާއިރު، އޮމާން މަޝްވަރާތަކުގައި ބައިވެރިވާނެ ކަމަށެވެ.
ތަން ބަދަލުކުރުމާއި ގުޅިގެން ހަފްތާއެއްގެ ކުރިން އީރާނުގެ އޮފިޝަލުންގެ ފަރާތުން ފުށުއަރާ ބަޔާންތައް ނެރުމުގެ ސަބަބުން ބޮޑު އޮޅުމެއްއެރި އެވެ. އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ މި ބަދަލުވުމަށް ފާޑުކިޔާ މިއީ "ޕްރޮފެޝަނަލް ކުށެއް" ކަމަށް ވިދާޅުވެ މިފަދަ ކަންކަމުން ފެށުން "ނުރައްކާ ވެދާނެ" ކަމަށް ވަނީ އިންޒާރުދެއްވާފައެވެ.
އިޓަލީގެ ފޮރިން މިނިސްޓަރު އެންޓޯނިއޯ ޓަޖާނީ ރޯމްއިން މި މަޝްވަރާތައް ބާއްވާނެ ކަން ކަށަވަރުކުރައްވާ ވިދާޅުވީ އިޓަލީއިން މަޝްވަރާތަކުގައި ރަސްމީ ދައުރެއް އަދާ ނުކުރާނެ ކަމަށެވެ.
އިންސްޕެކްޝަންހުއްޓިފައި އޮތްއިރު އައިއޭއީއޭގެ ގްރޮސީ ތެހެރާންގައި
އިންޓަނޭޝަނަލް އޭޓޮމިކް އެނާޖީ އޭޖެންސީގެ (އައިއޭއީއޭ) ޑިރެކްޓާ ޖެނެރަލް ރަފައެލް މެރިއާނޯ ގްރޮސީ ބުދަ ދުވަހު ތެހެރާނަށް ވަޑައިގެން ބުރާސްފަތި ދުވަހު ރައީސް މަސްއޫދު ޕެޒެޝްކިއަންއާއި އީރާނުގެ އެހެން އިސް އޮފިޝަލުންނާ ބައްދަލުކުރައްވާނެ ކަމަށް ބެލެވެ އެވެ.
ގްރޮސީގެ މި ވަޑައިގަންނަވަނީ އީރާނުގައި އައިއޭއީއޭއަށް ނިއުކްލިއަ މަރުކަޒުތަކަށް ވަނުން ހިފެހެއްޓިފައިވާއިރު، ސަވޭލަންސް ކެމެރާތައް ހުއްޓި އަދި ގިނަ އިންސްޕެކްޓަރުންނަށް މަނާކުރެވިފައިވާ ވަގުތެއްގަ އެވެ. އީރާނުން މިހާރު 60% ސާފުކަމާއެކު ޔުރޭނިއަމް އެންރިޗްކުރަމުންދާއިރު، މިއީ ހަތިޔާރު ފެންވަރަށް ބޭނުންވާ 90% މިންވަރާ  ކައިރިވެފައިވާ މިންވަރެއްކަމަށްވެ އެވެ.
އީރާނުން އަބަދުވެސް ނިއުކްލިއަ ހަތިޔާރު ހޯދަން މަސައްކަތް ކުރާކަމަށް ދެކޮޅުހަދާއިރު، ޔުރޭނިއަމް ފައްކާކުރަނީ ސުލްހަވެރި ބޭނުންތަކަށް ކަމަށް ބުނެ އެވެ.
އެމެރިކާގެ މަންދޫބުގެ ސިގްނަލްތަކުން އީރާނުގެ ނުރުހުން އިތުރުވެއްޖެ
ރޯމް މަޝްވަރާތަކުގެ ކުރިން ހިނގި ކަންކަމުގެ ތެރޭގައި އެމެރިކާގެ މެދުއިރުމަތީގެ މަންދޫބު ސްޓީވް ވިޓްކޮފްގެ ތަފާތު ސިގްނަލްތަކުގެ ސަބަބުން ކަންކަން އިތުރަށް ގޯސްވެގެން ދިޔަ އެވެ. ފުރަތަމަ 2015 ވަނަ އަހަރުގެ އެއްބަސްވުމުގެ 3.67% އެންރިޗްމަންޓް ލިމިޓަށް އެނބުރި ދިއުން ވިސްނޭނެ ކަމަށް ހުށަހެޅުމަށްފަހު، ވިޓްކޮފް ފަހުން ވިދާޅުވެފައި ވަނީ "އީރާނާއެކު ވެވޭ އެއްބަސްވުމެއް ފުރިހަމަ ވާނީ އެއީ ޓްރަމްޕް ޑީލްއެއް ކަމަށްވަނީ ނަމަ އެކަނި" ކަމަށެވެ.
"އީރާނުން ނިއުކްލިއަ އެންރިޗްމަންޓް އަދި ހަތިޔާރު އުފެއްދުމުގެ ޕްރޮގްރާމް ހުއްޓާލައި ނައްތާލަންޖެހޭނެ،" ވިޓްކޮފް އެކްސްގައި ޕޯސްޓްކުރެއްވި އެވެ. "ދުނިޔެއަށް ކޮންމެހެން މުހިންމުވަނީ އަޅުގަނޑުމެން ދެމިއޮންނާނެ ހަރުދަނާ، ހަމަހަމަ އެއްބަސްވުމެއް އުފެއްދުމެވެ."
ޑިޕްލޮމެޓިކް ނުރައްކާ އިތުރުވެއްޖެ، ރަޝިޔާ މަޝްވަރާ ތެރެއަށް ވަންނާނެ
ބުރާސްފަތި ދުވަހު، އަރާގްޗީ މޮސްކޯއަށް ވަޑައިގެން އީރާނުގެ ސްޕްރީމް ލީޑަރު އަލީ ޚަމޭނީގެ މެސެޖެއް ރަޝިޔާގެ ރައީސް ވްލަޑިމިރު ޕުޓިންއަށް ފޯރުކޮށްދެއްވުމަށް ހަމަޖެހިފައިވާ ކަން ދައުލަތުގެ މީޑިއާއިން ރިޕޯޓްކުރި އެވެ.
މި ބަދަލުވުން މިއަންނަނީ ކުރިމަގުގައި ވެވޭ އެއްބަސްވުމެއްގެ ދަށުން އީރާނުން ފައްކާކުރި ޔުރޭނިއަމް ސްޓޮކްޕައިލް ބެލެހެއްޓުމުގައި ރަޝިޔާއިން ދައުރެއް އަދާކުރެދާނެ ކަމަށް ލަފާކުރެވެމުންދާއިރު އެވެ. އެހެންނަމަވެސް، ރަޝިއާ ސަރުކާރުން އެކަމާމެދު ކޮމެންޓްކުރުމަށް ދެކޮޅުހަދާފައިވެ އެވެ.
އީރާނުގެ އެމްބެސެޑަރު ކާޒިމް ޖަލާލީ ވިދާޅުވި ގޮތުގައި ތެހެރާނާއި މޮސްކޯއާ ދެމެދު ދެމެހެއްޓެނިވި މުވާސަލާތަކީ "ސަރަހައްދީ އަދި ބައިނަލްއަގްވާމީ އަމާންކަމާއި ހަމަޖެހުމަށް" ކޮންމެހެން ބޭނުންވާ ކަމެކެވެ.
ރޯމް މަޝްވަރާތަކަކީ ރައީސް ޑޮނަލްޑް ޓްރަމްޕް ވެރިކަމަށް ވަޑައިގަތުމަށްފަހު އީރާނުގެ ނިއުކްލިއަ ޕްރޮގްރާމާ ގުޅޭ ގޮތުން ތެހެރާނާއި ވޮޝިންގްޓަނާ ދެމެދު ހިންގޭ ފުރަތަމަ ސީދާ މުވާސަލާތެވެ. ޓްރަމްޕް 2018 ގައި 2015 ވަނަ އަހަރުގެ ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން (ޖޭސީޕީއޯއޭ) އިން އެމެރިކާ ވަކިކުރެއްވި އެވެ. މިހެންވުމުން އެއްބަސްވުން ނިމުމަކަށް އައިސް، އީރާނުން ޔުރޭނިއަމް ފައްކާކުރުން އިތުރުކުރަން ފެށި އެވެ.