ކ. ކާށިދޫގައި ފުލުހަކަށް ވަޅިއަކުން ހަމަލާދީ މަރާލި މައްސަލައިގައި މަރަން ހުކުމްކޮށްފައިވާ މުހައްމަދު ސަމާހުގެ މައްޗަށް ދަށު ކޯޓުގައި އަލުން ޝަރީއަތް ހިންގުމަށް ސުޕްރީމް ކޯޓުން އަމުރުކޮށްފި އެވެ.
މިއީ ކ. ކާށިދޫގައި، ޖުލައި 2012 ގައި ޑިއުޓީގައި ހުރި ފުލުހުން އޮފިސަރު އާދަމް ހަލީމަށް ވަޅިއަކުން ހަމަލާދީ މަރާލި މައްސަލަ އެވެ. އެ މައްސަލައިގައި ދައުވާކޮށް ޝަރީއަތް ހިންގާފައި ވަނީ އެ ރަށު ސުވާސާގޭ ސަމާހުގެ މައްޗަށް އެކަންޏެވެ. އަދި އޭނާގެ މައްޗަށް ކުށް ސާބިތުވެ އިއްވި ހުކުމަށް ހައިކޯޓުން އޮތީ ތާއީދުކޮށްފަ އެވެ.
މި މައްސަލަ އިސްތިއުނާފު ކުރުމަށް ކްރިމިނަލް ކޯޓަށް ހުށަހެޅީ ސަމާހުގެ ފަރާތުންނެވެ.
ސުޕްރީމް ކޯޓުގެ އަޑުއެހުމުގައި ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވިދާޅުވީ މީހަކު ކުށަކަށް އެއްބަސްވި ނަމަވެސް އެ މީހެއްގެ މައްޗަށް ކުށް ސާބިތުވާކަމަށް ނިންމޭނީ އެ މީހަކު ދައްކާ ވާހަކަތައް އެއްވެސް ޝައްކެއް ނެތް މިންވަރަށް ކަށަވަރު ކުރުމަށް ފަހުކަމަށެވެ. އަދި ހައްދުގެ މައްސަލަތަކުގައި ކީރިތި ރަސޫލާ ވެސް އެއްގޮތަށް އަމަލު ކުރެއްވިކަން ފާހަގަކުރި އެވެ.
ސުއޫދުގެ ރައުޔުގައި ވާގޮތުގައި ހަމަލާ ދިންކަމަށް ސަމާހު އެއްބަސްވި ނަމަވެސް ގަސްތުގައި މީހަކު މެރުމުގެ ނިޔަތް އޮތްކަމަށް އޭނާ އިންކާރު ކުރެ އެވެ. އަދި ހަމަލާ ދީފައި ވަނީ ފުލުސް އޮފިސަރު މަރާލުމުގެ ނިޔަތް އޮވެގެން ނޫންކަން ބުނެފައިވާކަމަށް ހުކުމުގައި ފާހަގަކުރި އެވެ.
ހުކުމުގައިވާ ގޮތުން ސަމާހު ކުށަށް އިއުތިރާފުވުމުން، ދަށު ކޯޓުގެ ޝަރީއަތަށް އިތުރު އެއްވެސް ހެއްކެއް ހުށަހެޅުމަށް ފުލުހުން މަސައްކަތްކޮށްފައި ނުވެ އެވެ. އެހެން ނަމަވެސް އޭގެ ފަހުން ސަމާހު އޭނާގެ އިއުތިރާފު އަނބުރާ ގެންދިޔައިރު، އެ ހާލަތުގައި ދައުވާއަށް ބާރު ދޭނެ އިތުރު ހެއްކެއް ނެތްކަމަށް ވަނީ ބުނެފަ އެވެ. މި ހާލަތުގައި ސަމާހުގެ އިއުތިރާފުގެ ބަޔާން ބައިބައިކޮށް ކުށް ސާބިތުވާނެކަމަށް ނުނިންމޭނެކަމަށް ހުކުމުގައި ވަނީ ބުނެފަ އެވެ.
ހުކުމުގައި ބުނެފައި ވަނީ ސަމާހުވެފައިވާ އިއުތިރާގްގެ ބޭރުން އިތުރު ހެއްކެއް ހުރިތޯ ބެލުމަށް ފަހު އެ މައްސަލަ އަލުން ބަލަން ކްރިމިނަލް ކޯޓަށް ފޮނުވަން ޖެހޭކަމަށް ކަމަށެވެ. މިގޮތަށް ސުޕްރީމް ކޯޓުން އަމުރު ނެރުނީ މައްސަލަ ބެއްލެވި ފަނޑިޔާރުންގެ އިއްތިފާގުންނެވެ.
މައްސަލަ ސުޕްރީމް ކޯޓުގައި ބެއްލެވި ފަނޑިޔާރުންގެ ބެންޗުގައި ސުއޫދުގެ އިތުރަށް ތިއްބެވީ ފަނޑިޔާރު ޑރ. އަޒްމިރަލްދާ ޒާހިރާއި، ފަނޑިޔާރު އައިޝާ ޝުޖޫން މުހައްމަދުގެ އިތުރުން ފަނޑިޔާރު މަހާޒް އަލީ ޒާހިރު އަދި ފަނޑިޔާރު މުހައްމަދު އިބްރާހިމެވެ.