ރާއްޖޭގައި ކަރަންޓްގެ ހިދުމަތް ފޯރުކޮށްދޭއިރު މިހިދުމަތަކީ އަގުބޮޑު ހިދުމަތެއް ކަމަށް މިނިސްޓަރ އޮފް އެންވަޔަރަމަންޓް އެންޑެ އެނާޖީ ތޯރިޤް އިބްރާހިމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މިއަދު ހެނދުނު ނަސަންދުރަ ޕެލެސް ހޮޓެލްގައި ކުރިއަށްދިޔަ ޑިސްޓްރިބިޔުޝަން އޮފް ރިނިއުބަލް އެނާޖީ އެންޑް އެފިޝިއެންސީ އެކްސްޕެރިމެންޓަލް ކިޓްސްތައް ސްކޫލްތަކާ ހަވާލުކުރުމަށް ބޭއްވި ހާއްސަ ހަފްލާގައި ވާހަކަ ދައްކަވަމުންނެވެ.
މިނިސްޓަރު ވިދާޅުވީ ސަރުކާރުން އަދި މިނިސްޓްރީން މިހާރު ދަނީ ކަރަންޓް އެންމެ ހަރަދު ކުޑަކޮން ނުވަތަ އެފިޝިއެންޓް ކޮން ފޯރުކޮށްދެވޭނެ ގޮތަކީ ކޮބައިތޯ ބަލަމުން ކަމަށާއި އެގޮތުން ރާއްޖެއަކީ އީކުއޭޓާރގެ މެދުތެރޭގައި އޮތް ގައުމަކަށްވާތީ ރާއްޖެއަށް ބޭނުންވާ ވަރަށް އިރުގެ އަލިކަން ލިބޭތީ ރާއްޖޭގައިވެސް އިރުގެ އަލިން ކަރަންޓް އުފެއްދޭނެ ކަމަށެވެ. އަދި އެގޮތުން ރާއްޖޭގެ މިހާތަނަށް 4 މެގަވޯޓް ކަރަންޓް ސޮލާރަ ޕެނަލް ބޭނުންކޮށްގެން ކަރަންޓު އުފައްދާކަން މިނިސްޓަރު ފާހަގަކުރެއްވިއެވެ.
"ރާއްޖޭގައި ކަރަންޓްގެ ހިދުމަތް ފޯރުކޮށްދޭއިރު މިހިދްމަތަކީ އަގުބޮޑު ހިދުމަތެއް. ރާއްޖޭގެ ޖީޑީޕީ ގެ 30 އިންސައްތަ ކަރަންޓް ފޯރުކޮށްދިނުމަށް ތެޔޮ އެތެރެ ކުރުމަށް ބޭނުންކުރާ އިރު މިއީ ވަރަށް ބޮޑު އަދަދެއް. މިއަދުގެ ސަރުކާރުން އަދި މިނިސްޓްރީން މިހާރު ދަނީ ކަރަންޓް އެންމެ ހަރަދު ކުޑަކޮން ނުވަތަ އެފިޝިއެންޓް ކޮން ފޯރުކޮށްދެވޭނެ ގޮތަކީ ކޮބައިތޯ ބަލަމުން. އެގޮތުން ރާއްޖެއަކީ އީކުއޭޓާރގެ މެދުތެރޭގައި އޮތް ގައުމަކަށްވާތީ ރާއްޖެއަށް ބޭނުންވާ ވަރަށް އިރުގެ އަލިކަން ލިބޭތީ ރާއްޖޭގައިވެސް އިރުގެ އަލިން ކަރަންޓް އުފެއްދޭނެ" ތޯރިދް ވިދާޅުވިއެވެ.
ސަރުކާރުގެ އަމާޒަކީ ކުރިއަށް އޮތް ހަތަރު އަހަރު ތެރޭގައި ރާއްޖޭގައި މީހުން ދިރިއުޅޭ 5 ސަރަހައްދެއްގައި އިޔާދަކުރަނިވި ހަކަތަ ބޭނުންކޮށްގެން ކަރަންޓް އުފެއްދުން ކަމަށް މިނިސްޓަރ ވިދާޅުވިއެވެ.
އިޔާދަކުރުވަނިވި ހަކަތަ ބޭނުންކޮށްގެން ކަރަންޓު އުފެއްދުމުން އެތައް ވަޒީފާގެ ފުރުސަތުތަކެއްވެސް ހުޅުވިގެންދާނެ ކަމަށް ތޯރިގް ވިދާޅުވިއެވެ. އިޔާދަ ކުރުވަނިވި ހަކަތަ ބޭނުންކޮށްގެން ކަރަންޓް އުފެއްދުމަށް ބޭނުންވާ އެއްވެސް އެއްޗަކުން ޑިޔުޓީ ނުނަގާނެ ކަމަށްވެސް އޭނާ ވިދާޅުވިއެވެ.
"ސޯލާ އެނާޖީ އުފެއްދުމަށް މި ބޭނުންވާ ތަކެއްޗާ އެ އިންސްޓޯލް ކުރަން ބޭނުންވާ ތަކެއްޗާ، މި ތަކެތިން މިހާރު ޑިއުޓީ ނުނަގާނެ،" މިނިސްޓަރު ވިދާޅުވިއެވެ.
ރާއްޖޭގެ އެކި ސަރަހައްދުތަކަށް 270000 އެލްއީޑީ ލައިޓް މިހާރު ފޮނުވާފައިވާނެ ކަމަށާއި ރަށްރަށުގެ ބަނދަރު ބައްތިތައް ވެސް އެލްއީޑި ލައިޓްތަކަށް ބަދަލު ކުރުމުގެ މަސައްކަތް މިހާރު ކުރަމުން އަންނަ ކަމަށް ވެސް މިނިސްޓަރު ވިދާޅުވިއެވެ. މި ލައިޓްތަކަށް 60 މިލިއަން ރުފިޔާ ހަރަދުވެފައިވާ ކަމަށް ވެސް މިނިސްޓަރު ވިދާޅުވިއެވެ.