އެމެރިކާގެ ނިއުޔޯކްގައި ހުންނަ ދިވެހިރާއްޖޭގެ މިޝަންގެ އިސް ބޭފުޅުން، ދިވެހި ހެދިކާ ތައްޔާރުކޮށް ޑިޕްލޮމެޓުންނަށް ހަވީރުގެ ސައި ދެއްވައިފިއެވެ.
ނިއުޔޯކްގައި ހުންނަ ދިވެހިރާއްޖޭގެ ދާއީމީ މިޝަން އިން ކޮށްފައިވާ ޓްވީޓެއްގައި ވިދާޅުވީ ދިވެހިރާއްޖޭގެ ސަގާފަތް އދ.ގައި ކޮންމެވެސް ވަރަކަށް ހިއްސާ ކުރުމުގެ މަޤުޞަދުގައި ދިވެހި މަހުން އެކުވެރިންނަަށް ހަވީރު ސައި ތައްޔާރުކޮށްފައިވާ ކަމަށެވެ.
މެހެމާނުންނަށް ސައި ފޯރުކޮށްދެއްވުމުގައި އދ.އަށް ރާއްޖެ އިން ކަނޑައަޅުއްވާފައި ހުންނަވާ ސަފީރު ޑރ.އަލީ ނަސީރު މުހައްމަދު ވެސް ބައިވެރިވެ ވަޑައިގެންނެވިއެވެ.
ދިވެހިރާއްޖޭގެ މިޝަން އިން ކުރި ޓްވީޓްގައި ރާއްޖެ އދ.ގެ ސަލާމަތީ މަޖިލީހަށް އިންތިޚާބު ވުމަށް ކުރާ ކެމްޕޭންގެ ހޭޝްޓެގެއް ބޭނުންކޮށްފައި ވެއެވެ.
ސަލާމަތީ މަޖިލީހުގެ އިންތިހާބުގައި ރާއްޖެ އިން ވާދަކުރަން ނިންމާފައިވަނީ އަންނަ އަހަރުން ފެށިގެން 2020 ވަނަ އަހަރުގެ ނިޔަލަށް އޮންނަ ދައުރަށެވެ. އެ އިންތިހާބު މި އަހަރު ބާއްވާނެ އެވެ. މިއީ އެ ކައުންސިލްގެ މެމްބަރު ކަމަށް ރާއްޖެ އިން ވާދަކުރާ ފުރަތަމަ ފަހަރެވެ.
އދ.ސަލާމަތީ މަޖިލީހުގެ މެމްބަރު ކަމަށް ހޮވޭނީ އދ.ގެ ޖެނެރަލް އެސެމްބްލީގައި ނަގާ ވޯޓުގައި މެމްބަރު ގައުމުތަކުގެ ތެރެއިން ތިންބައި ކުޅަ ދެބައި ގައުމުގެ ވޯޓު ލިބިގެންނެވެ. އިންތިހާބުގައި އެ ކައުންސިލަށް އޭޝިއާ ރީޖަނުން ރާއްޖޭގެ އިތުރުން ވާދަކުރަނީ އިންޑޮނީޝިއާ އެވެ.
ސަލާމަތި މަޖިލީހުގެ ދާއިމީ މެމްބަރުންގެ ގޮތުގައި ފަސް ގައުމެއް އޮންނައިރު ބާކީ ތިބޭ 10 މެމްބަރުންނަކީ ދެ އަހަރުގެ މުއްދަތަށް އިންތިހާބު ކުރާ މެމްބަރުންނެވެ. ވަގުތީ މެމްބަރު ކަމަށް އިންތިހާބު ކުރަނީ އެކި ސަރަހައްދުތަކުންނެވެ.