ރޭގެ ވަގުތެއްގައި ށ. އަތޮޅު ބިލެތްފައްސަށް ވަގުތީ ގޮތުން ކަރަންޓުގެ ޚިދުމަތް ދީފިއެވެ.
މިދިޔަ ހޮނިހިރު ދުވަހުގެ ރޭ ދަންވަރުގެ ވަގުތެއްގައި އެރަށު ޖަނެރޭޓަރުގައި އަލިފާން ރޯވުމުގެ ސަބަބުން އެރަށުގަިއ ދިރިއުޅެމުންދާ 700 ވަރަކަށް ރައްޔިތުން އުޅެމުން ދިޔައީ ވަރަށް ދަތި ހާލެއްގައެވެ. މިހާދިސާ ހިނގީ އެރަށު 112 ކިލޯވޮޓްސްގެ ޖަނެރޭޓަރުގެ ޓަރބޯ ދޮންގަދަވެ އަލިފާން ރޯވުމުގެ ސަބަބުންނެވެ.
އެރަށު ކައުންސިލުން މަޢުލޫމާތު ދިން ގޮތުގައި އެރަށަށް ކަރަންޓުގެ ޚިދުމަތް ލިބިފައި ވަނީ ރޭ ދަންވަރު 00:18 ހާއިރުގައެވެ. އަދި އެއްވެސް ދައްޗަކާއި ނުލާ އެރަށުގެ ހުރިހާ ގެތަކާއި ސަރުކާރުގެ އިދާރާތަކާއި ސްކޫލްތަކަށް ވެސް ކަރަންޓުގެ ޚިދުމަތް މިހާރު ލިބޭނެ ކަމަށް އެފަރާތުން ވަނީ ބުނެފައެވެ.
ކަރަންޓުގެ ޚިދުމަތް ފޯރުކޮށްދިނުމަށްޓަކައި ބިލެތްފައްސަށް ޖަނެރޭޓަރެއް ގެނެސްފައި ވަނީ އެއަތޮޅު ފޭދޫ އިންނެވެ.