އިންޑިއާގެ ޖީއެމްއާރުން އިބްރާހިމް ނާސިރު އިންޓަރނޭޝަނަލް އެއަރޕޯޓް އަތުލުމަކީ ޤާނޫނީ މައްސަލައެއްވެސް ނޫންކަމަށާއި ނަމަވެސް އެއީ ރައީސް ވަހީދު މިވަގުތު ނިންމަވަން ޖެހިވަޑައިގަންނަވާނެ ސިޔާސީ ނިންމެވުމެއްކަމަށް ޕީޕީއެމްގެ އިންތިޤާލީ ނައިބު ރައީސް އުމަރު ނަސީރު ވިދާޅުވެއްޖެއެވެ.
އެއަރޕޯޓްގެ މައްސަލާގައި ދިޓީވީގައި މިރޭ ވާހަކަ ދައްކަވަމުން އުމަރު ވިދާޅުވީ ސިންގަޕޫރުގެ އާރބިޓްރޭޝަން ކޯޓްގައި އޮތީ 27 ޑޮލަރުގެ މައްސަލަކަމަށާއި އެއަރޕޯޓްގެ މައްސަލާގައި ދައުލަތުގެ ބަންޑާރަ ނައިބު ސްޕްރީމް ކޯޓަށް ވަޑައިގަންނަވަން ޖެހިވަޑައި ނުގަންނަވާކަމަށް އުމަރު ވިދާޅުވިއެވެ. އަދި މިމައްސަލާގައި އަޅާނެ ޤާނޫނީ ފިޔަވަޅެއް ނެތްކަމަށާއި އެއަރޕޯޓްގެ މައްސަލާގައި ނިންމަންޖެހޭ ނިންމުމަކީ ގާނޫނީ ނިންމުމެއް ނޫންކަމަށާއި އެއީ ސިޔާސީ ނިންމުމެއްކަމަށް ބަންޑާރަ ނައިބު އާޒިމާ ޝަކޫރު ވިދާޅުވެފައިވާކަމަށްވެސް އުމަރު ވިދާޅުވިއެވެ.
މީގެ އިތުރުން ކޯނީގެ ރިޕޯޓްގެ ކުރިން އެއަރޕޯޓްގެ މައްސަލާގައި ގޮތެއް ނުނިންމުމަށް ތާއީދު ކުރެއްވިކަމަށާއި ނަމަވެސް ކޯނީގެ ރިޕޯޓަށްފަހު އިތުރު ފުރުސަތެއް ނުދެވޭނެކަމަށާއި މިއީ އެއަރޕޯޓްގެ މައްސަލާގައި ގޮތެއް ނިންމަންޖެހޭ ވަގުތުކަމަށް އުމަރު ވިދާޅުވިއެވެ. އަދި ނިންމުން ނިންމަންޖެހޭ ފަރާތަކީ ރައީސް ވަހީދުއާއި ރައީސް ވަހީދުގެ ކެބިނެޓްކަމަށްވެސް އުމަރު ވިދާޅުވިއެވެ.
ޖީއެމްއާރުން އެއަރޕޯޓް އަތުލުމަކީ ބޮޑެތި ވިޔަފާރިވެރިން ރާއްޖެއައުމަށް ޖެހިލުންވާނެކަމަށާއި އެއިީ ވަރަށް ބޮޑު ޑެމޭޖެއްކަމަށްވެސް އުމަރު ވިދާޅުވިއެވެ. ނަމަވެސް އަހަރެއް ނުވަތަ ދެ އަހަރެއްގެ ތެރޭގައި އެކަންކަން ހަމައަކަށް އެޅިގެން ދާނެކަމަށްވެސް އުމަރު ވިދާޅުވިއެވެ.
އަދި އެއަރޕޯޓްގެ މައްސަލާގައި އެގްރިމެންޓް ސައްހަތޯ ބެލުމުގެ އިހްތިޔާރު އެންޓިކޮރަޕްޝަން ކޮމިޝަނަށް ލިބިގެން ނުވާކަމަށާއި ނަމަވެސް ނަމަވެސް ޑީއާރުޕީގެ ލީޑަރ އަހުމަދު ތަސްމީން އަލީއާއި ރައްޔިތުންގެ މަޖިލީހުގެ ރައީސް އަބްދުﷲ ޝާހިދު ފަދަ ބޭފުޅުން ޖީއެމްއާރުން ފައިސާ ނެންގެވިކަމަށް ތުހުމަތުކުރެވޭ ކުރުން ބަލަންޖެހޭކަމަށް އުމަރު ވިދާޅުވިއެވެ.
މީގެ އިތުރުން އެއަރޕޯޓްގެ މައްސަލަ ކޯޓަށް ވައްދައިފިނަމަ ތަސްމީން ބޭންކް އޮފް މޯލްޑިވްސްއިން ނެންގެވި އެއް ބިލިއަން ރުފިޔާގެ ލޯނަށް ވީގޮތަށް ކޯޓްގައި މައްސަލަ ދިގުދެމިގެން ނާނެކަމަށްވެސް އުމަރު ވިދާޅުވިއެވެ. އަދި އެއަރޕޯޓް އަތުލުމުގެ މައްސަލަ ދިގުދެމިގެން ދާނަމަ ރާއްޖޭގެ ސިޔާސީ މައިދާނުގައތިބި ކޮރަޕްޓް ބޭފުޅުން ޖީއެމްއާރާއި ޑީލްތައް ހަދައި އެކަމުގެ ފައިދާ ނަގަމުން ގެންދާނެކަމަށްވެސް އުމަރު ވިދާޅުވިއެވެ.