މާޗް މަހު ބާއްވާ ރައްޔިތުން މަޖިލީހުގައި އިންތިހާބުގެ ކެމްޕޭންގައި "ހަވީރު"ގެ އެކި މީޑިއާ ބޭނުންކޮށްގެން އިސްތިހާރު ކުރަން ބޭނުންވާ ފަރާތްތަކަށް ހާއްސަ ޕެކޭޖްތަކެއް މިއަދު ތައާރަފްކޮށްފި އެވެ. "ހަވީރު"ގެ ކުޑައިގެ ދަށުން ހިންގަމުން އަންނަ ޗާޕްހާނާ، ލޯމާފާނު ޕްރިންޓުން ކެމްޕޭންގެ އެއްޗެހި ކުޑަ އަގެއްގައި ޗާޕްކުރެވޭ ގޮތަށް ތައާރަފްކުރި ޕެކޭޖްތައް ނަގާ ކެންޑިޑޭޓުންނަށް ރާއްޖޭގައި އެންމެ ގިނަ ބަޔަކު ޒިޔާރަތްކުރާ އޮންލައިން ވެބް ސައިޓް، "ހަވީރު އޮންލައިން"ގެ އިތުރުން "ހަވީރު" ނޫހުގައި ވެސް އިސްތިހާރު ކުރެވޭނެ އެވެ. ހާއްސަ ޕެކޭޖެއްގެ ގޮތުން ނޫހުގެ ބޭރުގަނޑާއި އޮންލައިންގެ މުޅި ކަވަރު އެއް ދުވަހަށް ނެގުމުގެ ފުރުސަތު ވެސް ލިބެ އެވެ. އަދި އޮންލައިންގެ މުހިންމު ތަންތަނުގައި ވެސް އިސްތިހާރު ކުރެވޭނެ އެވެ. ލޯމާފާނު ޕްރިންޓުން ސްޓީކާ އާއި ޕޯސްޓަރު އަދި ފްލަޔާތައް ޗާޕްކުރުމުގެ ހެޔޮ އަގުތަކެއް ވަނީ ހަމަޖައްސައިފަ އެވެ. "ހަވީރު"ގެ އިސް އޮފިޝަލަކު ވިދާޅުވީ މަޖިލީހުގެ އިންތިހާބަށް ހާއްސަކޮށް ޕެކޭޖްތައް ވިއްކަނީ 5000ރ. އަށް ވުރެ މަތީގެ އަގުތަކެއްގައި ކަމަށެވެ. އޭނާ ވިދާޅުވި ގޮތުގައި އެއީ އިސްތިހާރުކުރުމަށް މިވަގުތު ރާއްޖެ އިން ލިބޭނެ އެންމެ ރަނގަޅު އަގުތަކަށް ވާނެ އެވެ. އަދި ހަވީރުގެ ޕެކޭޖްތަކުގެ ސަބަބުން ކެންޑިޑޭޓުންނަށް ސަޕޯޓަރުންނާ ހަމައަށް ވާސިލްވުމަށް އިތުރު ފުރުސަތުތައް ހުޅުވޭނެ ކަމަށް ވެސް އޭނާ ވިދާޅުވި އެވެ. "ގިނަ ބަޔަކަށް ކެމްޕޭން މެސެޖްތައް ގެންގޮސްދޭން މިއީ ލިބޭ ރަނުގެ ފުރުސަތެއް. ރާއްޖޭގެ އެންމެ ރަނގަޅު ދެ މީޑިއަމްގައި އިސްތިހާރުކޮށްލަން މިއީ ރަނގަޅު ވަގުތެއް ކަމަށް އަޅުގަނޑުމެން ބަލަނީ. އަނެއްކާ އާންމު އިންތިޚާބު ވީމާ އެ ފުރުސަތު ކެންޑިޑޭޓުންނަށް ދެވޭނެ އެންމެ ފުޅާކޮށް ދޭން އަޅުގަނޑުމެން ވިސްނާފައި އޮތީ،" އޮފިޝަލް ވިދާޅުވި އެވެ.