އިއްތިހާދު އެއާވޭސްގެ ތަފާތު އާ ފްލައިޓެއް ރާއްޖެ އަތުވެއްޖެ އެވެ.އެކުވެރި ޢަރަބި ޢިމާރާތް ( ޔޫއޭއީ)ގެ ކުންފުނި، އިއްތިހާދު އެއާވޭސްގެ ފަރާތުން ރާއްޖެއަށް ކުރާ ދަތުރުތައް ފުޅާ ކުރުމަށް ކުރާ މަސައްކަތުގެ ތެރެއިން އިއްޔެ ރާއްޖެ އައިސްފައި ވަނީ އެއާބަސް 330 މަރުކާގެ މަތިންދާ ބޯޓެކެވެ.މި ބޯޓު ރާއްޖޭގެ އިބްރާހިމް ނާސިރު އިންޓަނޭޝަނަލް އެއާޕޯޓުގައި ޖެއްސުމާއި އެކު ބޭއްވި ރަސްމީޔާތު ޝަރަފުވެރި ކޮށްދެއްވަމުން އިކޮނޮމިކް މިނިސްޓަރު މުހަންމަދު ސައީދު ވިދާޅުވީ މި އެއާލައިންގެ ސަބަބުން ދިވެހި ރާއްޖެ ދަތުރުކުރާ ފަތުރުވެރިންގެ އަދަދު އިތުރުވެގެން ދާނެ ކަމަށެވެ.މި ރަސްމީޔާތުގައި އިއްތިހާދު އެއާވޭސްގެ ޖެނެރަލް މެނޭޖަރު ހަސަން އަލް ހާޝިމީ ވިދާޅުވީ އަލަށް ފެށުނު ދަތުރުތަކުގެ ސަބަބުން ރާއްޖެއާއި ޔޫއޭއީއާއި ދެމެދު އޮތް ގުޅުން ވަރުގަދަވެ ބަދަހި ވެގެން ދާނެ ކަމަށެވެ. ހާޝިމީ ވިދާޅުވީ 22 ބިޒްނަސް ކްލާސް ސީޓާއި 240 އިކޮނޮމީ ކްލާސް ސީޓާއި އެކު އިއްތިހާދު އެއާވޭސް އިން ދަތުރުކުރާ ފަސިންޖަރުންގެ އަދަދު 1904 އިން 3368 އަށް މައްޗަށް ދާނެ ކަމަށެވެ.