އެކްސްޕޯ މޯލްޑިވްސް 2015 ގެ ނަމުގައި މައުރަޒަށް އުފައްދާ ތަކެތި ފޮނުވުމުގެ ސުންގަޑި މިއަދު 4 ޖެހުމާ ހަމައަށް އިތުރު ކޮށްފިއެވެ.
މިކަން އިއުލާނކޮށްފައިވަނީ މައުރަޒު އޮފީހުންނެވެ. އެ އޮފީހުން ހާމަކުރިގޮތުގައި އެ ފުރުސަތު އިތުރު ކޮށްދީފައިވަނީ ރާއްޖެއަށް މިދޭތެރޭގައި ކުރި ވިއްސާރައާއި ގުޅިގެން ގިނަ އަދަދެއްގެ ފަރާތްތަކަށް ދަތިތަކާ ކުރިމަތި ލާން ޖެހުމުގެ ސަބަބުންނާއި، އަދިވެސް ގިނަ ފަރާތްތަކުން ފޯމް ހުށަހަޅަމުންދާތީ ކަމަށެވެ.
މި ބަދަލާއި ގުޅިގެން އެ މައުރަޒުގައި ބައިވެރި ކުރުމަށް ފޮނުވާ ތަކެތި ފޮނުވުމަށް ކުރިން ކަނޑައެޅިފައިވާ ތާރީހަށް ބަދަލެއް ނާންނާނެ ކަން މައުރަޒް އޮފީހުން ފާހަގަކުރެއެވެ. އެހެންކަމުން މައުރަޒްގައި ބައިވެރި ކުރުމަށް ފޮނުވާ ތަކެތި ފޮނުވުމަށް ކަނޑައެޅިފައިވާ ތާރީހަކީ ކުރިއެކޭ އެއްފަދައިން މިމަހުގެ 5 ވަނަ ދުވަހެވެ.
މިމަހުގެ 22 ވަނަ ދުވަހުން ފެށިގެން 28 ވަނަ ދުވަހާއި ހަމަޔަށް ކުރިޔަށް ގެންދިއުމަށް ހަމަޖެހިފައިވާ މި މައުރަޒަށް ގިނަ ބައެއްގެ ތަރުހީބު ލިބެމުންދާއިރު މައުރަޒްގައި ބައިވެރިވުމަށްޓަކައި އެކި ފަރާތްތަކުން މިހާރުވެސް ދަނީ ފޯމް ހުށަހަޅައި، ދިވެހި އުފެއްދުންތައް ތައްޔާރު ކުރުމުގެ މަސައްކަތް ވަރަށް ފޯރިއާއި އެކީ ކުރަމުންކަން ފާހަގަކޮށްލެވެއެވެ.