ވަޓްސްއެޕްގެ ނުކިޔާ (އަންރީޑް) މެސެޖުތައް ޚުލާސާކޮށްދޭ އޭއައި ފީޗާއެއް މެޓާއިން ތައާރަފްކޮށްފިއެވެ. މެޓާ ކުންފުނިން ތައާރަފް ކުރި މި އާ ފީޗާގެ ސަބަބުން، ޗެޓެއްގައި ހުރި ނުކިޔާ މެސެޖުތަކުގެ ކުރު ޚުލާސާއެއް 'މެޓާ އޭއައި' ބޭނުންކޮށްގެން ހޯދޭނެއެވެ. މެޓާއިން ބުނީ މި ފީޗާ ބޭނުންކުރުމަކީ އިޚްތިޔާރީ ކަމެއް ކަމަށާއި، މިގޮތަށް ހޯދާ ޚުލާސާ ފެންނާނީ ހަމައެކަނި އެކަން ކުރާ ބޭނުންކުރާ ފަރާތަށް އެކަނި ކަމަށެވެ. ޗެޓްގައި ހިމެނޭ އެހެން އެއްވެސް މީހަކަށް އެ ޚުލާސާ އަދި އެކަން ކުރިކަން ވެސް ނޭނގޭނެއެވެ. މި ފީޗާގެ އެންމެ ބޮޑު އެއް ކަމަކީ ޕްރައިވެސީއަށް ދީފައިވާ ސަމާލުކަމެވެ. މެޓާއިން ބުނި ގޮތުގައި، "ޕްރައިވެޓް ޕްރޮސެސިން ޓެކްނޮލޮޖީ" ގެ އެހީގައި، މެޓާ ކުންފުންޏަށާއި ވަޓްސްއެޕަށް ވެސް މެސެޖުތައް ނުފެނި، އޭއައި އިން ޚުލާސާ ތައްޔާރުކޮށްދޭނެއެވެ. މިއީ ވަޓްސްއެޕްގެ އެންޑް-ޓު-އެންޑް އެންކްރިޕްޝަނަށް އެއްވެސް އަސަރެއް ނުކުރާ ގޮތަށް ފަރުމާކޮށްފައިވާ ނިޒާމެކެވެ. އާންމުކޮށް މި ފީޗާ އޮންނާނީ އޮފްކޮށްފައެވެ. ނަމަވެސް، މި ޚިދުމަތް ލިބެން ހުރިނަމަ، އެކަން އަންގައިދިނުމުގެ ގޮތުން ކުޑަ އައިކޮންއެއް ވަޓްސްއެޕުން ފެންނާނެއެވެ. މި ފީޗާ އޮން/އޮފް ކުރުމަށް، Settings > Chats > Private Processing އަށް ގޮސް، ބޭނުންވާ ގޮތެއް ހެދޭނެއެވެ. މި ޚިދުމަތް އެންމެ ފުރަތަމަ ފަށާފައިވަނީ އެމެރިކާގައި، އިނގިރޭސި ބަހަށެވެ. ނަމަވެސް، މިއަހަރުގެ ފަހުކޮޅު އިތުރު ގައުމުތަކަށާއި ބަސްތަކަށް މި ފީޗާ ފުޅާކުރާނެ ކަމަށް މެޓާއިން ބުނެއެވެ. މީގެ ކުރިން 'މެޓާ އޭއައި' ވަޓްސްއެޕް ޗެޓްތަކުގައި ބޭނުންކުރެވުނު ނަމަވެސް، އޭއައި އަށް ޗެޓްގައި ދެކެވޭ ވާހަކަތައް ކިޔުމުގެ ގާބިލުކަން ލިބިފައިނުވެއެވެ. ނަމަވެސް، މި އާ ނިޒާމުގެ ދަށުން، ޗެޓްގެ 'ކޮންޓެކްސްޓް' އަށް ޕްރައިވެޓްކޮށް އެކްސެސްވެ، މެސެޖުތައް ޚުލާސާކުރުމާއި، ލިޔުމަށް އެހީތެރިވެދިނުން ފަދަ ޚިދުމަތްތައް ފޯރުކޮށްދެވޭނެއެވެ. މި ފީޗާއަކީ، ޓެކްނޮލޮޖީގެ ބޮޑެތި ކުންފުނިތައް ކަމަށްވާ ގޫގުލް، މައިކްރޮސޮފްޓް، އަދި އެޕަލް ފަދަ ކުންފުނިތަކާ ވާދަކޮށް، އާޓިފިޝަލް އިންޓެލިޖެންސް (އޭއައި)ގެ ދާއިރާއިން ކުރިއެރުން ހޯދުމަށް މެޓާއިން ކުރަމުންދާ މަސައްކަތުގެ އެއް ހިއްސާއެވެ. މެޓާ ކުންފުނިން ދަނީ އެ ކުންފުނީގެ މައި ޕްލެޓްފޯމްތައް ކަމަށްވާ ފޭސްބުކް، އިންސްޓަގްރާމް، އަދި މެސެންޖާއަށް 'މެޓާ އޭއައި' ގެ ޚިދުމަތްތައް ފުޅާކުރަމުންނެވެ. ވަޓްސްއެޕްގެ އެންމެ ޚާއްސަ އެއް ސިފައަކީ 'އެންޑް-ޓު-އެންޑް އެންކްރިޕްޝަން' ގެ ސަބަބުން ލިބިދޭ ޕްރައިވެސީއާއި ސަލާމަތްތެރިކަމެވެ. އެހެންކަމުން، މެސެޖުތަކުގެ މައުލޫމާތު ބޭނުންކުރާ މިފަދަ ފީޗާއެއް ތައާރަފްކުރުމުގައި، ޔޫޒަރުންގެ އިތުބާރު ދެމެހެއްޓުމަކީ މެޓާއަށް އޮތް އެންމެ ބޮޑު ގޮންޖެހުމެވެ. އެކުންފުނިން 'ޕްރައިވެޓް ޕްރޮސެސިން' ޓެކްނޮލޮޖީ ބޭނުންކުރަނީ މި ސަބަބަށް ޓަކައެވެ. މިއީ މެސެޖިން އެޕްލިކޭޝަންތައް ހަމައެކަނި މުއާސަލާތު ކުރުމުގެ ވަސީލަތަކުން، އުފެއްދުންތެރިކަން އިތުރުކޮށްދޭ ޒަމާނީ ޓޫލްތަކަކަށް ބަދަލުވަމުންދާ ދިއުމުގެ ހެއްކެކެވެ.