ހޮޅުދޫ ބޯޓުގައި އަލިފާން ރޯވި ހާދިސާގައި ގެއްލުނު ލ. މާވަށަށް ނިސްބަތްވާ އުމުރުން 25 އަހަރުގެ އަލީ މުޝްފިގް މުހައްމަދު ޝަރީފް ހޯދުމަށް 53.04 ސްކެއާ ނޯޓިކަލް މޭލު ބަލާފައިވާ ކަމަށާއި އަދިވެސް އޭނާ ނުފެންނަ ކަމަށް އެމްއެންޑީއެފް އިން ބުނެފިއެވެ.
މުޝްފިގް ހޯދުމަށް ހިންގަމުންދާ ސާޗް އޮޕަރޭޝަންގެ އެންމެފަހުގެ މައުލޫމާތު ހިއްސާ ކުރަމުން އެމްއެންޑީއެފް އިން ބުނީ، ކަނޑު އަޑިން (ޑައިވިން) ސާޗްގެ ގޮތުގައި 64240 އަކަމީޓަރު ވަނީ ބަލާފައި ކަމަށާއި ވައިގެ މަގުން 1545 ސްކެއާ މޭލް (4000 އަކަމީޓަރު) ވަނީ ބަލާފައި ކަމަށެވެ.
ޖުމްލަ 53.04 ސްކެއާ ނޯޓިކަލް މޭލް ބަލާފައިވާ ކަމަށް އެމްއެންޑީއެފް އިން ބުނެއެވެ. މުޝްފިގް ހޯދުމުގެ މަސައްކަތް އެމްއެންޑީއެފް ސެންޓްރަލް އޭރިއާ ކޮމާންޑް ކޯސްްޓްގާޑުން ކުރަމުން އަންނައިރު އެ މަސައްކަތުގައި ޑްރޯން ވެސް ބޭނުން ކުރަމުންދާ ކަމަށް އެމްއެންޑީއެފް އިން ބުނެއެވެ. މީގެ އިތުރުން ވެސް އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުންވެސް އޭނާ ހޯދުމުގެ މަސައްކަތް ކުރަމުން ދެއެވެ.
'ހޮޅުދޫ ބޯޓު' ގައި ރޯވީ ހިރިލަންދޫ އިން ފުރައިގެން މާލެ ދަނިކޮށް ތ. ކަނޑޫދޫ ކައިރިންނެވެ. 11 ދިވެހިން އަދި 7 ބިދޭސީންނާއެކު ޖުމްލަ 18 މީހުން އެ ބޯޓުން ދަތުރު ކުރި އިރު ސަލާމަތްވެފައި ވަނީ 17 މީހުންނެވެ.
މިހާދިސާގައި ބައެއް މީހުންނަށް ޒަހަމްވެފައިވާ އިރު، ދެ މީހަކަށް ތ.ކަނޑޫދޫ މަރުކަޒުގައި ފަރުވާވެސް ދީފައި ވެއެވެ.
އެ ބޯޯޓުގައި އަލިފާން ރޯވީ ކަނޑޫދުއަށް ވަދެ މުދާ އަރުވައިގެން ހިރިލަންދުއަށް ގޮސް، އެ ރަށުން ފުރި ފަހުންނެވެ. ނަމަވެސް ބޯޓުގައި ރޯވާން ދިމާވި ސަބަބެއް މިހާތަނަށް އެއްވެސް އިދާރާއަކުން ހާމަކޮށްފައި ނުވާއިރު ބޯޓުގައި ހުރި މުދަލާ ގުޅޭ ތަފްސީލެއް ވެސް ލިބިފައި ނުވެއެވެ.