ހއ. ހޯރަފުށި ސިއްހީ މަރުކަޒުން ތުއްތު ކުއްޖަކަށް "އޮޅިގެން" ނުބައި ވެކްސިނެއް ދިން މައްސަލައެއް ފެންމަތި ވެއްޖެ އެވެ.އެ ކުއްޖާގެ ބައްޕަ އެކަމުގެ ކަންބޮޑުވުން ފާޅުކޮށް ސޯޝަލް މީޑިއާގައި ކުރު ޕޯސްޓެއްގައި ބުނީ އޭނާގެ 9 މަހުގެ ތުއްތު ދަރިފުޅަށް ސިއްހީ މަރުކަޒުން ނުބައި ވެކްސިންނެއް ދީފައިވާކަމަށެވެ. އެގޮތުން 9 މަހުގެ ތުއްތު ކުއްޖާގެ ގަޔަށް ސިއްހީ މަރުކަޒުން ދީފައިވަނީ 18 މަހުގެ ކުއްޖެއްގެ ގަޔަށް ޖަހަންޖެހޭ ވެކްސިންކަމަށް އެ ކުއްޖާގެ ބައްޕަ ވަނީ ބުނެފަ އެވެ.މީގެކުރިން އެހެން ވެކްސިނެއް ދިން އިރުވެސް އޮޅުވާލާފައިވާކަމަށް ކުއްޖާގެ ބައްޕަ ވަނީ ބުނެފަ އެވެ.އެ އާއިލާ އިން ބުނީ މި މައްސަލަ ސީރިއަސް މައްސަލަ އެއްގެ ގޮތުގައި ބަލަން ބޭނުންވާ ކަމަށާއި މި މައްސަލަ ގެންދެވުނު ހިސާބަކަށް ގޮސްގެން އިހުމާލުވާ ފަރާތްތައް ޒިންމާދާރުކުރުވަން ބޭނުންވާ ކަމަށެވެ. ސަބަބަކީ ދެން ތަކުރާރު ވުމަށް ނޭދޭތީ ކަމަށް ވެސް އާއިލާ އިން ވަނީ ބުނެފަ އެވެ.މިކަމާއި ގުޅިގެން ހޯރަފުށީ ސިއްހީ މަރުކަޒުން "ހޯރަ" އަށް ބުނީ ކުޑަކުއްޖަކަށް ވެކްސިން ދިނުމުގައި މިފަހުން "އޮޅުމެއް" އެރިކަމަށާއި މިކަމާއި ގުޅިގެން ގުޅުން ހުރި އިދާރާތަކުގެ ސަމާލުކަމަށް އެކަން ގެނެސްފައިވާނެ ކަމަށެވެ. އަދި އިދާރީ ގޮތުން މިފަދަ ކަމެއް ތަކުރާރު ނުވުމަށް އަޅަން ޖެހޭ ފިޔަވަޅު އަޅަމުން އަންނަ ކަމަށެވެ.މަރުކަޒުން އިތުރަށް ބުނީ ސިއްހީ މާހިރުންގެ ލަފަޔާއި އިރުޝާދު ހޯދާ ގޯސް ވެކްސިން ދެވުނު ކުއްޖާ އަށް ނުރައްކާ ވާ ފަދަ ކަމެއް މި މައްސަލައިގައި ނެތް ކަން ކަށަވަރު ކުރެވިފައިވާ ކަމަށެވެ.