މިނިސްޓްރީތަކުގެ މަސައްކަތްތައް އެންމެ ރަނގަޅަށް ހިނގާނީ އެ މިނިސްޓްރީއެއް ގައި މަސައްކަތްކުރާ ސިޔާސީ މުވައްޒަފުންނާއި، ސިވިލް މުވައްޒަފުން ގުޅިގެން ކަމަށް ސިވިލް ސަރވިސް ކޮމިޝަން (ސީއެސްސީ)ގެ ރައީސް މުހައްމަދު މުޖްތާޒް ވިދާޅުވެއްޖެއެވެ.
ސިވިލް ސަރވިސް ކޮމިޝަންގެ ރައީސް މިހެން ވިދާޅުވީ މިނިސްޓްރީ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވަރކްސްގެ ‘އަހަރީ ރިވިޔު’ ފެށުމަށް މިއަދު ހެނދުނު ސިޓީސް މިނިސްޓްރީގައި ފެށި އަހަރީ ރިވިއުގެ އިފްތިތާހީ ރަސްމިއްޔާތު ޝަރަފުވެރިކޮށް ދެއްކެވި ވާހަކަފުޅުގައެވެ.
މިނިސްޓްރީގެ މުވައްޒަފުންނާ މުހާތަބުކުރައްވާ ވާހަކަފުޅު ދައްކަވަމުން ސީއެސްސީގެ ރައީސް ވިދާޅުވީ، ސިޓީސް މިނިސްޓްރީއަކީ ސިވިލް މުވައްޒަފުންނާއި، ސިޔާސީ މުވައްޒަފުން ވަރަށް ގާތްކޮށް ގުޅިގެން މަސައްކަތްކުރާ މުވައްޒަފުންތަކެއް ހިމެނޭ މިނިސްޓްރީއެއް ކަމަށެވެ.
މުޖުތާޒްގެ ވާހަކަފުޅުގައި ސިވިލް މުވައްޒަފުންނާ މެދު މިނިސްޓަރ އާދަމް ޝަރީފް ޢުމަރު ބަހައްޓަވައި ގުޅުން ފާހަގަކުރެއްވިއެވެ. އަދި އެ ކަމަށް އެ މަނިކުފާނު ވަނީ މިނިސްޓަރ އާދަމް ޝަރީފު ޢުމަރަށް ޝުކުރު އަދާކުރައްވާފައެވެ.