އައު އެއްބަސްވުމުގެ ދަށުން އިސްރާއީލުގެ ސިފައިން އުތުރު ޣައްޒާއިން އަނބުރާ ގެންދިއުމާއެކު، މަޖުބޫރުން ގެދޮރު ދޫކޮށް ދިޔަ އެތައް ހާސް ފަލަސްތީނު ރައްޔިތުން، ވީރާނާވެފައިވާ އުތުރު ޣައްޒާގެ ރަށްތަކާއި ސިޓީތަކަށް އަނބުރާ ދަތުރުކުރަން ފަށައިފިއެވެ.
ނަމަވެސް، އެމީހުންގެ ވަޒަން ހުރި ގޮތެއް ނޭނގި، ވަދެވޭނެ ތަނެއް ވެސް ނެތި ހާސްކަމެއްގެ ތެރޭގައި ތިބި ކަމަށް ޚަބަރުތައް ބުނެއެވެ.
ހުކުރު ދުވަހުގެ ކުރީކޮޅު ހަމަލާ ހުއްޓާލުމަށް ގެނެވުނު ފަހުން، އެތައް ހާސް ފަލަސްތީނު ރައްޔިތުންތަކެއް ވަނީ އުތުރު ޣައްޒާގައިވާ އެމީހުންގެ ގެދޮރަށް އަނބުރާ ދިޔުމުގެ ދަތުރު ފަށާފައެވެ. އިސްރާއީލުގެ ސިފައިންގެ ފަރާތުން ބުނެފައިވަނީ، ހަމާސްއާއެކު ވެވުނު އެއްބަސްވުމުގެ ދަށުން، އެއްބަސްވެވުނު ސަރަހައްދުތަކުން ސިފައިން އަނބުރާ ގެންގޮސްފައިވާ ކަމަށެވެ.
އަލްޖަޒީރާއިން ޣައްޒާގެ މެދުތެރޭގައި އޮންނަ ނުސައިރާތު ކޭމްޕުން އުތުރަށް އަނބުރާ ދިޔަ ފަލަސްތީނުންނާ ވާހަކަ ދައްކައިފައިވެއެވެ. އެގޮތުން ޢަހުމަދު އަބޫ ޝަނަބް ބުނެފައިވަނީ، ދެކުނުން އުތުރަށް ކުރި ދަތުރު ވަރަށް އުނދަގޫވެ، ވަރަށް ބޮޑަށް ތަކުލީފު އުފުލަން ޖެހުނު ކަމަށާއި، ޖާގައިގެ ދަތިކަން ވަރަށް ބޮޑުވެ ނިދާލަން ވެސް ނުވީ ކަމަށެވެ.
މަރްޔަމް އަބޫ ޖަބަލް ބުނެފައިވަނީ، އެމީހުން އެނބުރި އައީ ނޭނގޭ ކަމަކަށް ކަމަށާއި، އެމީހުންގެ ގެތައް އަދިވެސް ހުރިކަން ނޭނގޭ ކަމަށެވެ. އަދި އޭނާ އުއްމީދު ކުރަނީ އެމީހުންގެ ގެ އަދިވެސް ހުރިކަމަށެވެ.
މުހައްމަދު ޝަރަފް ބުނެފައިވަނީ، ހުރިހާ އެއްޗެއް ބަދަލުވެފައިވާ ކަމަށާއި، އެމީހުންނަށް ވިސްނައިނުގަނެވޭ ވަރުގެ ހަލާކެއްގެ ތެރެއަށް އެނބުރި އައިސްފައިވާ ކަމަށެވެ. އަދި މިހާރު ކުރާނެ ކަމެއް ނޭނގޭ ކަމަށާއި، ހީކުރީ މަދު ދުވަސްކޮޅަކަށް ދާން ޖެހުނީ ކަމަށް ނަމަވެސް، މިހާރު އެނބުރި އައިސް ބަލައިލިއިރު އެއްވެސް އެއްޗެއް ނެތް ކަމަށް ޝަރަފް ބުނެފައިވެއެވެ.
2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ޣައްޒާއަށް ކުރަމުންދާ ހަނގުރާމައިގައި މަދުވެގެން 67,211 މީހުން ވަނީ ޝަހީދުވެފައެވެ. އަދި 169,961 މީހުންނަށް ޒަޚަމްވެފައިވާއިރު، އެތައްހާސް ބަޔަކު ފުނޑުފުނޑުވެފައިވާ އިމާރާތްތަކުގެ ދަށުގައި ވަޅުލެވިފައިވެއެވެ.
މި ބޮޑު ހަލާކާއި ގެއްލުންތަކުގެ ތެރޭގައި ފަލަސްތީނުގެ ރައްޔިތުން އެނބުރި އައިސްފައިވާއިރު، އެމީހުންގެ ކުރިމަގުވަނީ ނޭނގުމެއްގެ ތެރޭގައިކަން ފާހަގަކުރެވެއެވެ.
Thiladhun © 2019 – 2025| Made with in #Thiladhunmathi
Thiladhun © 2019 – 2025
Made with ❤️ in #Thiladhunmathi