ފީފާ ވޯލްޑް ކަޕް ފުޓްބޯޅަ މުބާރާތުގެ ގްރޫޕް ބީގައި ބޮސްނިއާ އެންޑް ހެރްޒެގޮވީނާ އަތުން 4-1 ގެ ބޮޑު ނަތީޖާއަކުން މޮޅުވެ، މުބާރާތުގައި އުނދަގޫ ފެށުމަކާ ކުރިމަތިލާން ޖެހުނު ސްވިޒަލެންޑުން ސަލާމަތްވެއްޖެއެވެ. ގްރޫޕްގެ ފުރަތަމަ މެޗުގައި ފަހު ވަގުތު ގަތަރާ 1-1 އިން އެއްވަރުވުމުން، މުބާރާތުގެ ކޮންޓްރޯލް ހޯދުމަށް ސްވިޒަލެންޑަށް މި މެޗުން މޮޅުވުން އޮތީ މަޖުބޫރުވެފައެވެ. ލޮސް އެންޖެލްސް ސްޓޭޑިއަމްގައި ކުޅުނު މި މެޗު ފަށައިގެން ދެ ޓީމުންވެސް އަވަސް ކުޅުމެއް ދައްކައި ގޯލެއް ޖެހޭތޯ މަސައްކަތް ކުރަމުންދިޔައިރު، މެޗުގެ ބޮޑުބައި ސްވިޒަލެންޑުން ކުޅެން ޖެހުނީ ބޮޑު ޕްރެޝަރެއްގައެވެ. މެޗުގެ ފުރަތަމަ ހާފާއި ދެވަނަ ހާފުގެ ކުރީކޮޅުގައި ދެ ޓީމުގެ ކީޕަރުންގެ ފަރާތުން މޮޅު ކުޅުމެއް ފެނިގެންދިޔައެވެ. ސްވިޒަލެންޑުގެ ކީޕަރު ގްރެގޯރީ ކޮބެލް އާއި ބޮސްނިއާގެ ކީޕަރު ނިކޯލާ ވަސީލް ދިޔައީ އިދިކޮޅު އެޓޭކަރުންގެ ނުރައްކާތެރި ހަމަލާތައް ހުޝިޔާރުކަމާއެކު ދިފާއުކުރަމުންނެވެ. ބޮސްނިއާ އާއި ސްވިޒަލެންޑް ބައްދަލުކުރި މެޗުގެ ތެރެއިން-- އެގޮތުން ސްވިޒަލެންޑްގެ ޑޭން އެންޑޯއީ އޭރިއާ ތެރެއިން ފޮނުވާލި އެކްރަބެޓިކް ހަމަލާއެއް ބޮސްނިއާ ކީޕަރު މަތަކުރިއިރު، ބޮސްނިއާގެ އަމާރު ޑެޑިޗް އޭރިއާ ބޭރުން ފޮނުވާލި ބާރު ހަމަލާ ކީޕަރު ކޮބެލް ވަނީ ހުއްޓުވާފައެވެ. މީގެ އިތުރުން ފުރަތަމަ ހާފުގައި އެންޑޯއީ ފޮނުވާލި އެހެން ހަމަލާއެއް ގޯލުގެ ދަނޑިއަށްވެސް އަމާޒުވިއެވެ. ސްވިޒަލެންޑުން މެޗުގެ ފުރަތަމަ ލަނޑު ޖެހީ މެޗުގެ 74 ވަނަ މިނިޓްގައެވެ. ބަދަލު ކުޅުންތެރިއެއްގެ ގޮތުގައި ކުޅެން އެރިތާ އެންމެ 3 މިނިޓު ތެރޭ، އުމުރުން 20 އަހަރުގެ ޒުވާން ފޯވާޑް ޖޯހާން މަންޒަމްބީ ވަނީ އޭރިއާ ތެރެއިން ލިބުނު ބޯޅައެއް ވޮލީއަކުން ގޯލުގެ ތެރެއަށް ފޮނުވާލާފައެވެ. ބޮސްނިއާއަށް އިތުރު މައްސަލަތަކެއް ކުރިމަތިވީ މެޗުގެ 80 ވަނަ މިނިޓްގައި، ސްވިޒަލެންޑްގެ ބްރީލް އެމްބޯލޯއަށް ކުރި ފައުލަކާ ގުޅިގެން އެ ޓީމުގެ ޑިފެންޑަރު ޓަރީކް މުހަރެމޮވިޗަށް ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ. އެއާއެކު ކުޅުންތެރިއަކު މަދުވުމުގެ ފައިދާ ނަގައި، 83 ވަނަ މިނިޓްގައި އެމްބޯލޯ ދިން ބޯޅައަކުން ރުބެން ވާގާސް ވަނީ ސްވިޒަލެންޑުގެ ލީޑު ފުޅާކޮށްދީފައެވެ. އިތުރު ވަގުތުގެ ފުރަތަމަ މިނިޓްގައި ވާގާސް ނަގައިދިން ހުރަހަކުން މަންޒަމްބީ ވަނީ އޭނާގެ ދެވަނަ ލަނޑާއެކު ސްވިޒަލެންޑަށް 3-0 ގެ ލީޑެއް ހޯދައިދީފައެވެ. އޭގެ ކުޑަ ހިނދުކޮޅެއް ފަހުން ބޮސްނިއާގެ ބަދަލު ކުޅުންތެރިޔާ އެރްމިން މަމިޗް ކޯނަރަކުން ލިބުނު ބޯޅައެއް ފުރަތަމަ ޓަޗުން ގޯލުގެ މަތީ ދާގަނޑަށް ފޮނުވާލައިގެން ހިތްގައިމު ސުންކަނޑުވާލިއެވެ. ނަމަވެސް މެޗު ނިމެން އުޅެނިކޮށް ލިބުނު ޕެނަލްޓީއަކުން ސްވިޒަލެންޑްގެ ކެޕްޓަން ގްރަނިޓް ޝަކާ ވަނީ 4-1 އަށް ނަތީޖާ ބަދަލުކޮށްލާފައެވެ. މިއީ 1994 ވަނަ އަހަރުގެ ވޯލްޑް ކަޕަށްފަހު ސްވިޒަލެންޑުން މެޗެއްގައި 4 ލަނޑު ޖެހި ފުރަތަމަ ފަހަރެވެ.