އެމެރިކާއިން ހުށަހެޅި ހަނގުރާމަ ހުއްޓާލުމުގެ ހުށަހެޅުން އީރާނުން ދިރާސާކުރަމުން ދިޔަ ނަމަވެސް، އެމެރިކާއާ އެކު ސީދާ މަޝްވަރާތަކެއް ނުކުރާނެ ކަމަށް އީރާނުން މިއަދު ބުނެފި އެވެ.
ސަރަހައްދީ ފެންވަރުގައި ކުރިއަށްދާ ކުރިމަތިލުންތަކާ ގުޅޭ ގޮތުން ވާހަކަދައްކަވަމުން، އީރާނުގެ ހާރިޖީ ވަޒީރު އައްބާސް އަރަގްޗީ ވިދާޅުވީ، ގަލްފް ހަނގުރާމަ ނިމުމަކަށް ގެނައުމަށް އެމެރިކާއިން ހުށަހަޅާފައިވާ ހުށަހެޅުންތައް ދިރާސާކުރަމުންދާ ކަމަށެވެ.
ދައުލަތުގެ ޓީވީ މެދުވެރިކޮށް ދެއްވި ބަޔާނެއްގައި އޭނާ ކަށަވަރުކޮށްދެއްވި ގޮތުގައި، މެދުވެރިން މެދުވެރިކޮށް ދެ ގައުމުގެ ދެމެދުގައި މެސެޖުތައް ބަދަލުކުރެވެމުންދެ އެވެ.
ނަމަވެސް، މެދުވެރިން މެދުވެރިކޮށް ކުރެވޭ މުއާމަލާތްތަކަކީ އެމެރިކާއާ އެކު ކުރެވޭ ސީދާ މަޝްވަރާއެއް ނޫން ކަމަށް އޭނާ ބާރުއަޅުއްވައި ވިދާޅުވި އެވެ. އަދި މެދުވެރިން މެދުވެރިކޮށް ލިބިފައިވާ ހުށަހެޅުންތައް އީރާނުގެ އިސް ލީޑަޝިޕާ ހިއްސާކޮށްފައިވާ ކަމަށާއި، ބޭނުންވެއްޖެ ހިނދެއްގައި އެކަމާ ގުޅޭ ގޮތުން ރަސްމީ ނިންމުމެއް އިއުލާނުކުރާނެ ކަމަށް ވެސް އޭނާ ވިދާޅުވި އެވެ.
ސަރަހައްދީ އޮފިޝަލިން ބުނާ ގޮތުގައި، އެމެރިކާ އާއި އިޒްރޭލާ އެކު ކުރެވޭ ހަނގުރާމަ ހުއްޓާލުމުގެ އެއްވެސް އެއްބަސްވުމެއްގައި ލުބުނާން ވެސް ހިމަނަންޖެހޭނެ ކަމަށް އީރާނުން ވަނީ ޝަރުތުކޮށްފަ އެވެ.
މިކަމާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާނުގެ ވެރިން އެއްބަސްވުމަކަށް އަންނަން ބޭނުންވި ނަމަވެސް، އެކަން ފާޅުގައި ހާމަކުރަން ފަސްޖެހެނީ ކަމަށެވެ.
"އެ މީހުން ދަނީ މަޝްވަރާ ކުރަމުން އަދި އެއްބަސްވުމަކަށް އަންނަން ވަރަށް ބޮޑަށް ބޭނުންވޭ،" ޓްރަމްޕް ވިދާޅުވި އެވެ.
އޭނާ އިތުރަށް ވިދާޅުވި ގޮތުގައި، އީރާނުން ޖެހިލުންވަނީ އެ ގައުމުގެ އެތެރޭގެ ފިއްތުންތަކަށާއި އެމެރިކާގެ އަސްކަރީ ހަމަލާތައް އިތުރުވެދާނެތީ އެވެ.
އެމެރިކާއިން ހުށަހެޅި ކަމަށް ބުނާ 15 ނުކުތާގެ ހުށަހެޅުމުގައި، އީރާނުން ޔުރޭނިއަމް މުއްސަނދިކުރުން ހުއްޓާލުމަށާއި، މުއްސަނދިކޮށްފައިވާ ޔުރޭނިއަމްގެ ރައްކާކޮށްފައިވާ މިންވަރު ނައްތާލުމަށާއި، ބެލިސްޓިކް މިސައިލް ޕްރޮގްރާމް މަޑުޖައްސާލުމުގެ އިތުރުން ސަރަހައްދީ އެކުވެރި ޖަމާއަތްތަކަށް ދޭ އެހީތެރިކަން ކަނޑާލުމަށް ބާރުއަޅާފައިވެ އެވެ.
ވައިޓް ހައުސްގެ ޕްރެސް ސެކްރެޓަރީ ކެރޮލިން ލީވިޓް އިންޒާރު ދެއްވި ގޮތުގައި، އީރާނުން މި ހުށަހެޅުންތަކަށް އިޖާބަ ނުދީފި ނަމަ، މީގެ ކުރިން ދުވަހަކު ވެސް ނުދޭ ފަދަ ވަރުގަދަ ހަމަލާތަކެއް އެ ގައުމަށް އަމާޒުވާނެ އެވެ.
އެމެރިކާގެ ސެންޓްރަލް ކޮމާންޑުން ހާމަކުރި ގޮތުގައި، އީރާނުގެ އެތެރޭގެ 10,000އަށް ވުރެ ގިނަ އަމާޒުތަކަށް ވަނީ ހަމަލާދީފަ އެވެ. އެޑްމިރަލް ބްރެޑް ކޫޕާ ވިދާޅުވި ގޮތުގައި، އީރާނުގެ ކަނޑުގެ އަސްކަރިއްޔާގެ ބޮޑެތި އުޅަނދުފަހަރުގެ %92 ވަނީ ހަލާކުކޮށްލާފަ އެވެ. އަދި މިސައިލާއި ޑްރޯން ފޮނުވާ މިންވަރު %90އަށް ވުރެ ބޮޑަށް ދަށްކުރެވިފައިވާ ކަމަށް ވެސް އޭނާ ވިދާޅުވި އެވެ.
މި ހުށަހެޅުންތަކާ އެކު ވެސް ހަމަލާތައް މެދުނުކެނޑި ކުރިއަށްދެ އެވެ. އެގޮތުން، އިޒްރޭލުން އީރާނުގެ އަސްކަރީ އުމްރާނީ ވަސީލަތްތަކަށް ހަމަލާދެމުންދާއިރު، އީރާނުން ދަނީ އިޒްްރޭލަށާއި އެމެރިކާގެ އެކުވެރި ގައުމުތަކަށް މިސައިލާއި ޑްރޯން ހަމަލާތައް ފޮނުވަމުންނެވެ. ތެހެރާނުގެ މީހުން ދިރިއުޅޭ ސަރަހައްދުތަކަށް ގެއްލުން ލިބިފައިވާ ކަމަށް ރިޕޯޓުތައް ބުނާއިރު، ކުވައިތާއި ސައުދީ އަރަބިއްޔާ ފަދަ ގައުމުތަކުން ވަނީ އެ ގައުމުތަކަށް އަމާޒުވި ޑްރޯން ހަމަލާތައް ހުއްޓުވާފަ އެވެ.
މި ހަމަނުޖެހުންތަކުގެ ސަބަބުން މުޅި ސަރަހައްދަށް ހަނގުރާމަ ފެތުރިގެންދިއުމުގެ ބިރު ވަނީ ބޮޑުވެފަ އެވެ. އީރާނުގެ މަސްދަރުތަކުން ވަނީ ބާބުލް މަންދަބު ކަނޑުއޮޅީގައި ފިޔަވަޅުތަކެއް އަޅާފާނެ ކަމުގެ އިންޒާރު ދީފަ އެވެ. އަދި އެމެރިކާގެ އަސްކަރިއްޔާއަށް އެއްބާރުލުންދޭ އަވަށްޓެރި ގައުމުތަކަށް ހަމަލާދީފާނެ ކަމަށް ވެސް އީރާނުގެ އޮފިޝަލުން ވަނީ ބުނެފަ އެވެ.
މި ހުށަހެޅުމުގެ ހަބަރާ އެކު ބައިނަލްއަގްވާމީ ބާޒާރުތަކަށް ވަނީ ހެޔޮ ބަދަލުތަކެއް އައިސްފަ އެވެ. ހަނގުރާމަ ހުއްޓާލުމުގެ އުއްމީދާ އެކު ދުނިޔޭގެ ހިއްސާގެ ބާޒާރު ކުރިއަރައި ތެލުގެ އަގު ވަނީ ދަށްވާން ފަށާފަ އެވެ.
ނަމަވެސް، އެމެރިކާއިން ދަނީ ގަލްފު ސަރަހައްދަށް އިތުރު ސިފައިން ފޮނުވުމަށް ތައްޔާރުވަމުންނެވެ. މިއީ އަސްކަރީ ކުރިމަތިލުންތައް އިތުރަށް ވަރުގަދަވެދާނެ ކަމުގެ ނިޝާނެކެވެ.